AMOS 7 - Kemethajüh (N) (Re-editing) Bible (BSI)

Kemanthi wi Ashiqathu Kemu

¹ Kemisintsa Apvüwa wi hi kemanthi kesü mu. Ciwi tsü kadimiwa shei accani hanya nu aghang shigü neng shagha keten wi ma ashiqa tenti kesü sa kechi hi mu.

² Hi kemanthi witsü ashiqa na ayyiwa wi aghang kemejjü tsüdila dsakhi kesa hi mu, nu hi tsaseng wi khi, “Kemisintsa Apvüwa, n-nyithu kesami teshi pi cülo! Mathu na khati hangya mehai nu? Mathu na kezeng-u nu nzütha le!”

³ Apvüwa na ma leben kemili nu khi, “No kemuwa tsü sa nbendha.”

Kemanthi wi anni Kemu

⁴ Kemisintsa Apvüwa wi hi kemanthi kepa wi kesü mu. Ciwi tsü ma anni pi ma nyithu meten le kiden keben hi mu. Anniwa tsüna ayyi cakhu wi atssükedone keti tsü mecang nu ayyiwa la mecang shagha.

⁵ Tsaseng wi hi khi, “O Kemisintsa Apvüwa, tsü khenlo! N-nyithu na khati hangya mehai nu? Mathu na kezeng-u nu nzütha le!”

⁶ Apvüwa na ma leben kemili wi khi, “Hawa ha lela sa nbendha.”

Kemanthi wi Kemece ketegüji Kemu

⁷ Apvüwa wi hi kemanthi kepa wi kesü mu. Ciwi ma kemece ketegüji sennu sa ketheng ajjen-keshon kete wi ngan, nu ma kwen wi kemece ketegüji sen keben hi mu.

⁸ Ma hi wi keü, “Amos, no mangwa muben nu?” Hi luneng, “Kemece ketegüji kesü le.” Tsaseng wi ma khi, “Hi tsü sennu inyithu na ajjen-keshon nkemece kesü ti le kesa pi ccücale saben. Hi mathu meten cüale keben ghena hi kemeshen kemili neng ntendha.

⁹ Isak shicübvüghathu na kekinyi penthu tsü yasa ben. Israel wi kemetha penthu tsü dedi pi teshiaben . Hi Kadimi Jeroboam kadishi pi asakhen saacüden.”

Amos nu Amaziya

¹⁰ Bethel wi keqhaikediwa Amaziya na kheneng chüthsüjüh kesü kesun pi Israel Kadimi Jeroboam wi chi: “Amos na anyithu jawi acho sapi no shun benle. Ma jühthu na mizzatentiwa yasa ben.

¹¹ Ma khi kebenwa na ha: ‘Jeroboam na aghi wi shüaben, nu Israel nyithu tsü mathu yyi wina ssinu kushiyyi wi wa ben.’ ”

¹² Tsaseng wi Amaziya na Amos wi khi, “Atusenjüh-kechüwa, tsüna mehaidha! Judah wi kheneng wa ciwi atusenjüh-khilo. Mathu ya tsüghena akutimen pi no cü thsülo.

¹³ Hewi Bethel wi atusenjüh nkhila yilo. Hawa hana kadimiwa kekinyipen, mizzatenti na kinyi keten kekinyijjen le.”

¹⁴ Amos na luneng, “Hi akutimen mule kesa ghena atusenjüh- khi keten atusenjüh-kechüwa nyele. Hi anenikehie nyi kesü, nu hi khhaghabvü tonthu nonccaden.

¹⁵ Isala Apvüwa na hi anenikehie nyi kesü kekuli sa keten wi hi ssiya nu hi wala ma nyi Israel wi atusenjüh-khilo ahza khuchi.

¹⁶ Tsalina khili Apvüwa na mangwa khiben khe kina yalo. No na hi atusenjüh nkhila nu Israel nyithu keshunjüh nkhila yilo kiza.

¹⁷ Tsalina Amaziya, Apvüwa na no wi khiben, ‘Nwubvü na anyunutiwa wi keqheza menkedsa kesü sa, nu aghi wi ntsangathu pathiaben. N-yyi tsü gishü pi anyi kepathu cüaben, nu no lethu Anyiza nkechü yyi kesü wi shüaben. Nu Israel nyithu na mathu yyi wina ssinu kushiyyi wi wa metsiben.’”