AMOS 6 - Kemethajüh (N) (Re-editing) Bible (BSI)

Israel Keyasa

¹ Nthu ghena khatila qhethiketen saaten nu, nthu Zion wi lekete hang nu Samaria wi yazishu benle meshen ketenthu, nthu mizzatenti keti Israel hawa wi anyi kedithu, anyithu na nthu wi kekiqa bha wa ketenthu!

² Wala Kalne nyunuti wi ghangchilo. Tsaseng wi Hamath nyunuti ketiwa wi wa nu Filistin nyunuti Gath wi cülo. Tsü manyi na Judah nu Israel kadinyu keni miwi mehaiki kwe?

³ Nthu na wan ketizensa keten tsathang kesü gho tendha kesa tsü n-nondi mvu, isala nthu kekuli na tsü tsathang ssinu tetsaki gho tendha.

⁴ Tsüna nthu na awe kemehai kecca miwi kechusügü jen nu amesü nu khaghaneni zza pi mishu ketenthu ghena khatila qhethiketen saaten nu!

⁵ Nthu na David na kesa ti akhwithu cü nu tsüthu pi harp wi khou mvuden.

⁶ Nthu na kisengtssü ahyi kepong jjü nu hankedemvu kemehai ntsa sen, isala nthu na Israel kededi ghena tsü anongü nten.

⁷ Tsalina kushiyyi wi wa keten tsü nthu na atuwa saaben. Nthu kho nu kemishuthu tsüna asakhen saaden.

⁸ Anyiza Kemisintsa Apvüwa na ajühkedhu kekitsan ha khu chiben: “Hi Israel nyithu wikesa tsü nanmvu nten; hi mathu nonkekwen jjenthu tsü khichi nten. Hi mathu ghazen nyunutiwa nu ciwi keben tsüdila pi ghinyiwa cüaden .”

⁹ Keujüla atheghi kesü wi meshu tagha na ben lethu, mathu na shüaben.

¹⁰ Keshü shiliwa akamang pi kevhü tsüna ma kuti, anyi tsüwa na ajjen wi akamangwa tsü pieshi yaben . Ashiliwa na anyi kesü le kesü lela ajjen wi kebenwa wi hati khiben, “Ciwila anyi pahan no gweghe ben kwe?” Anyi tsüwa na “Nyele” lunengben! Ashiliwa na “Ceen benlo” khiben! Ithu na kiden-kesha nu Apvüwa nyan lela khichi yishü.

¹¹ Khathansha wi Apvüwa na ajühkhuchi khe ajjen keti le kizza lela pacha zigheaben.

¹² Goruthu na alonshi miwi bvüten kwe? Anyi na amesü süpon ssinu atssükedone chhüten kwe? Isala nthu na ajühtsentsa pi aji ceng, nu kemeshon pi kesazzi sadha

¹³ Nthu na Lodebar nyuti yakeya ghena ashhüsa. Nthu na “Ithu na khang ntsa nu Karnaim yaya le,” kapvüden.’

¹⁴ Anyiza Kemisintsa Apvüwa na ma ketanla khiben, “Israel nyithu, hi asang süpahizi kesun pi nthu diyyiwa nkaya thsüaden . Tsüna aghawa Hamath Pass wina cüla acülawa Araba Ghaku kecu wi nthu pashaden.”