AMOS 4 - Kemethajüh (N) (Re-editing) Bible (BSI)

¹ Ha kinalo, nthu Samaria nzathu kunon pi Bashan wi amesübvü kekunon ti, nkezüthu nkenen sa, ketha-uthu pasha, nu nthu wubathu na adikinatssü pi nthu cülo khie ketenthu!

² Kemisintsa Apvüwa na metha kesa ti ma khishidha, “Mathu na adhasü pi nthu vüya keten tsathangthu na gho tendha; nthu tsüdila anga kesü na kenniji pi vüsen keben ti saaben.

³ Nthu vüsen nu ajjen wikeshon kebi tetsaki wi wa nu pi ciwi khala ben

Israel na Chü meyala

⁴ Kemisintsa Apvüwa na khiben, “Israel nyithu, nthu na nsathu yishü lethu Bethel wi kemetha pen wi wa nu kesami salo! Gilgal wi wa nu nthu kekhang tsüdi pi kesami salo! Wa nu ghanen kaghapen ahhansha sale kesa ghena asahangthu sengho, nu ghanan kecheng kaghapen gishü tagha wi kesü tsü sengholo.

⁵ Wa nu nthu mesa pi Anyiza nkesengcha kekinyi sachi, nu nthu na khukechi gilli sengho keya ghena ammisa lo! Nthu na pala hawa ha sa mvuden.

⁶ “Azeng sengho nthu nyunutithu tsüdi wi kechiwa tsüna hi, isala nthu na hi wi kheneng ngho.

⁷ Nthu lli na atsankegho nsenthu yishü ntsa keben wi hi tsü khunengya. Hi atsankegho kesun pi anyunuti kesü miwi chi, isala kepawa miwi tsü nchi. Atsan na alli kesü miwi gho thsü, isala kepawa na keqha thsüa.

⁸ Dighe pi nzüla, anyunuti keni-kecheng wi anyithu na atssü muya benshe sala anyunuti kesü wi wa, isala ciwi kejjü qo nmi. Ciwi lela nthu na hi wi kheneng ngho.

⁹ ‘Hi ameghü kisa kesun pi nthu lli mo teqha thsüa. Ashiqathu na nthu sanku nu kemeshentsse llithu, nthu khhaghabvü nu oliv tonthu dsa. Tsaseng wi lela nthu na hi wi kheneng ngho.

¹⁰ “Hi adhagha kesü kesun pi Ejipt miwi kechi tsüti kesun pi nthu miwi la chicü. Hi aghi wi n-nyi kepvüzathu pathia nu nthu goruthu ssi bvüa. Hi nthu kemnanpen wi akamangthu kebighe han pi nthu metsan pong cü. Tsaseng wi lela nthu na hi wi kheneng ngho.

¹¹ “Hi Sodom nu Gomorrah keyasa ti nthu pahan yasa cü. Nthu hang keyathu na anni wina khushikeya annishiki ti le. Isalela nthu na hi wi kheneng ngho,” Apvüwa na khiben.

¹² “Tsalina Israel nyithu, hi nthu meten cü tendha. Nu hi tsü sa wa keten ghena, hi ajühkaghaten ketenwa tsü metule kesa kidenyalo!”

¹³ Anyiza na ayikhathu nu ameghü sa kechiwa tsü. Ma ma kemeshenthu pi anyithu chüya thsüden; ma aghanan kemili pi aghaja saaden. Ma ayyi kemisithu miwi alentsenden. Anyiza Kemisintsa Apvüwa, hawa hana ma nyan!