AMOS 2 - Kemethajüh (N) (Re-editing) Bible (BSI)

Moab

¹ Apvüwa na khiben, “Moab nyithu na samila sami neng sa, tsalina hi ha ghena mathu meten cü metsiden. Mathu na Edom kadimiwa güthu tsü nyuwakü nsala mecang pi ayyinikhu ceng thsüa.

² Hi anni kesun pi Moab yyi miwi chi nu Kerioth khweti kezhüthu tsü mecang thsüaden . Süpahithu na jisha nu tutuwa khou keben wi aghikesa hhai ghena Moab nyithu na shüaben.

³ Hi Moab wi kekhang kesenwa nu ayyiwa wi ccülikesathu tsüdila pathiaben .”

Judah

⁴ Apvüwa na khiben, “Judah nyithu na samila sami neng sa, tsalina hi ha ghena mathu meten cü metsiden. Mathu na hi pi kesansijüh nkhichi nu ijühkhukechi tsü n-nie. Mathu na mathu baqhaithu na kinyi kegho atsentsa nkenye cenpvüthu ya mathu ssi deja bvü thsüa.

⁵ Tsalina hi anni kesun pi Judah miwi chi nu Jerusalem khweti-kezhüthu tsü mecang thsüaden .”

Anyiza Jühkekaghaten na Israel miwi Keben

⁶ Apvüwa na khiben, “Israel nyithu na samila sami neng sa, tsalina hi ha ghena mathu meten cü metsiden. Mathu na anyi kemeshon nyu menkepvü nkedhichathu, ketha-uthu mathu ccüguwen men lela nkedhichathu tsüpi nssümagha sa jeüden.

⁷ Mathu na anyi nkekhang nu kekiqa nkemithu cüten nu alen wina ketha-uthu tsü khushi pi den. Anyi kesü ma batsa saghula nssümaghale ghala kesü ssinu nkemetha sa, isanu inyan kemethawa kekinyen sa.

⁸ Kekinyipen tsüdi wi anyithu na ketha-uthu na pi mathu men kepvü khiteshan ketheng thsümeni khukeya miwi tsü jenden. Mathu Nyiza kekinyijjen wi mathu na apisa pi mathu kecü-u sa kebenthu wi khukeya kisengtssü tsü jjüden.

⁹ “Isala inyithu, hi nthu ghena Amor nyithu mathu na sie pi sedar chanton ti nu zü pi ayang chanton ti kesathu tsü yasatha sale.

¹⁰ Hi Ejipt wina nthu ssi shhugho nu amapi jügha nthu ssinu ayyikeshü pvüdhi, nu Amor nyithu yyi pi nthu ji sa yalo pi nthu cüa.

¹¹ Hi nthu tsathu pahan kessi pi atusenjüh-kechüthu sa, nu nthu jawi kepvüzathu pahan kessi pi Nazirit nyi sa thsü. Tsüna ntsakhiwa nye kwe, Israel nyithu? Hi Apvüwa, hi khidha.

¹² Isala nthu na Nazirit nyi pi kisengtssü jjü thsü, nu atusenjüh-kechüthu na hi ketsijüh nkhi lalo ahza pi cüa.

¹³ Hi khili nthu pacha pi ayyi wi chiaben, nu nthu na gari kesü na shenthabvü pi ma khhi sapvü keten ti ghadhiben.

¹⁴ Mbhi ntsa kebvüthu lela bvüya nben; kezüthu na mathu kezü nmilaben, nu süpahithu lela mathu ketanla mathu kahang hangshaya nben.

¹⁵ Anyi alamugho kepiethu na ngan meyala ben, mbhi ntsa kebvüthu na bvüya nben, nu anyi goru miwi kebenthu la mathu kahang hangshaya nben.

¹⁶ Tsü tsathang wi süpahi kempvüza ntsathu lela mathu ghitsanqai teshi nu bvüaben.” Apvüwa na khidha.