ADECHHÜ 6 - Kemethajüh (N) (Re-editing) Bible (BSI)

Anyi Kahang Nkemehai

¹ Anyi na ayyi tsüdi wi bvüzighe kewa wi mathu ngathu pvüghaya.

² Anyiza tsathu na nza atsimehai ntsa kesathu kemu wi mathu kenenthu kessi pi mathu wubvü saya.

³ Tsalina Apvüwa na khi, “Hi anyithu ya anuphan nhang thsüdha; mathu na shü wa keten nyi. Nansü nten na mathu amapi meza nu ngwe miwi nhang thsüdha.”

⁴ Tsü tsüwi nu tsü seng wi lela Anyiza tsathu nu nzathu shicübvügha anyi khüton kemehai ayyi wi ben. Mathu na wakesa tsüwi anyi kedi kekhang nu kemechan sa.

⁵ Apvüwa na ayyi wi anyi tsüdila hang nmehai nu matsü tsüdi wi mathu kemeshen nmehai kesa mukeya wi,

⁶ ma mathu sapi ayyi wi hang thsü kesa ghena ma leben güccü. Ma asengmeshen,

⁷ nu khi, “Hi ayyi miwi anyi sahang kechithu, aghangsathu nu awathu la nmi thsü laden, kepaghenanye hi mathu sakechi ghena ileben güccüdha.”

⁸ Isala Apvüwa na Noah nen.

Noah

^9-10 Hana Noah cüki. Ma atsa kecheng ben, Shem, Ham, nu Jafeth. Noah na kesazzi mangla nmi nu ma tsüwi ma ketan anyi kemehai. Ma Anyiza ssi ghanpfü nu hang,

¹¹ anyi kepa wi tsüdila Anyiza tuwi meghangmeghe nu yasayala na ayyi pong.

¹² Anyiza na ayyi ghang kechi wi nmehaila kesa muya, kepaghenanye anyi tsüdila meghangmeghe wa.

¹³ Anyiza na Noah kiza, “Hi anyi tsüdi yasa piale cenyadha. Hi mathu tsüdi yasatha saden, kepaghenanye yasayala kekuli na ayyi pongdha.

¹⁴ Achan kemehai pi n-ghena ahunjjen kesü cühya; ma non wi shondhi kepapa saya nu anie pi ahunjjen non nu amei wila nyen yalo.

¹⁵ Ahunjjen kesie 133 meter kemeza 22 meter nu kemisi 13 meter isalo.

¹⁶ Ahunjjen keshon wi 44 sentimeter na meiwa wi jjenkubhi kesü saya. Ashha kecheng sa nu ma keshon wi ajenka kesü saya.

¹⁷ Hi atssüdon kesun pi ayyi miwi kahangli tsüdi meyanthi thsüaden. Ayyi miwi pala tsüdila shüaben,

¹⁸ isala hi no ssinu cenkethenjüh kesü saden. No, nwubvü, ntsathu, nu mathu wubvüthu ssinu ahunjjen non wi duya.

^19-20 No aghangsathu nu awathu alen kepapa kesa tsüdi hang ben thsüle kesalina npvüzawa kesüsü nu nzawa kesüsü ssinu ahunjjen non wi duya.

²¹ Nthu nu tsüthu ghena kedsakejjü kepapa kesa tsüdi sen du tsanqaiya.”

²² Noah na Anyiza ma kekiza ti tsüdila saya.