ADECHHÜ 50 - Kemethajüh (N) (Re-editing) Bible (BSI)

¹ Josef na ma ba miwi nkhwendu qai nu ma mmi kimang.

² Tsaseng wi Josef na dawa pi ma ba kamang tsü noncca yalo kiza.

³ Dawa pi akamang kenoncca matsü kejon yaketen ti tsüna ghanan jügha ya. Ejipt nyithu na ma ghena ghanan achentagü anongü.

⁴ Anonke-ü tsü cenkeya seng wi Josef na kadimi kekhu wi kedithu wi kiza, “Wa kadimi tuwi ajüh ha pi kizalo:

⁵ ‘Iba na ma shü keten pang wi hi ma pvü wa Kanaan yyi wi ma ashüjjen kiden ketheng wi tsü vhülo nu hi ya kishen thsü theng. Tsalina hi ya iba pvü wa vhü nu kheneng gho thsülo’ kizalo.”

⁶ Kadimiwa na khineng “No khishi ketheng ti nba pvü wa vhüyalo.”

⁷ Tsalina Josef na ma ba vhüle wa. Kadimi kekhu wi kedithu, ma jühkaghaten pen wi kedithu, nu Ejipt wi accülikesathu tsüdila Josef gweghe wa.

⁸ Ma theghithu, ma cünyuthu, nu ma ba theghithu tsüdila ma gweghe wa. Mathu na ghanyithu, khaghaneni, anenithu, nu amesüsi teshi pi Goshen yegu wi chitheng nu wa.

⁹ Anyi, gorugari nu goru meiwi kebenthu la ma gweghe wa; tsüna anyitenti keti sa.

¹⁰ Mathu na wa Jordan na nishuwa Atad wi aniegi kesü cu keya wi mathu matsü kesiela anongü, nu Josef na anonkegü keccüna ghanan tagü sa.

¹¹ Kanaan nyithu na Atad wi anyi tsüthu na anongü keben muya nu khi, “Ha Ejipt nyithu ghena anonkegü keccüna keti kesü sadha!” Tsalina apen tsü nyan pi Abel Mizraim cia.

¹² Tsalina Jakob tsathu na ma mathu kekiza ti sa.

¹³ Mathu na ma kamang pvüwa Kanaan wi Abraham na Hitti nyiwa Efron wi shüjjenpen sale shü ketheng lli Mamre na nishuwa Makhpela Lonshiku wi tsü vhüa.

¹⁴ Josef na ma ba pi kevhü seng wi ma cünyuthu nu ma ba pi vhüle kesalina ma gweghe kewathu tsüdi gweghe Ejipt wi wha neng.

Josef na Ma Cünyuthu wi Khishi neng kechi

¹⁵ Mathu ba keshü seng wi Josef cünyuthu na khi, “Josef na ikhang nanmeghü nu ikhang kheni ma miwi kuli kechi kutimen pi ikhang cü neng lethu khati sa nu? ”

¹⁶ Tsalina mathu na nyilo kesü kesun pi Josef wi chi nu khi, “Ikhang ba npi keshü wi

¹⁷ ma ikhang na hati no wi khilo kiza theng, ‘Ncünyuthu ntu wi sazzi ketheng tsü mathu kesami teshi pi cülo.’ Khili kesami teshi pi ikhang, nba Nyizawa maghathu ha cülo.” Josef na ajüh tsü za keya wi qai wa.

¹⁸ Tsaseng wi ma cünyuthu na ma tuwi gho kukedu nu khi, “Ikhang na hewi nmaghathu ti nu ntuwi ben le.”

¹⁹ Isala Josef na mathu wi khi, “Nmessi lalo, hi ketanla hi pi Anyiza mithon saya nben.

²⁰ Nthu na imiwi nkemehai sachi, isala nansü hati kesa wi ha anyi kahangli kejon hangsha yathsüle kesalina Anyiza na tsü pi kemehaiwa sa cüdha.

²¹ Nthu na mangla nmessila mehai, hi nthu nu nthu tsangathu nonccaya ben.” Tsütinu ma ma cünyuthu wi khishi neng chi nu mathu leben satecca cü.

Josef Keshü

²² Josef na ma ba theghithu ssinu Ejipt wi hang, ma amapi meza nu tagha hang nu shü.

²³ Josef na hang wa Efraim tsanga tsangathu, nu Manasseh tsawa Makhir tsangathu la gweghe hangya.

²⁴ Ma ma cünyuthu wi kiza, “Hi shü wa tendha, isala Anyiza na nthu ssi benden nu nthu ssi wala ma kheni khipi Abraham, Isak, nu Jakob cü ketheng yyi wi tsü chi cüben.”

²⁵ Tsaseng wi Josef na Jakob tsathu ya kishen thsü nu ma khi, “Anyiza na nthu ssinu ayyi tsüwa wi keshu wi nthu na ikamang pvü nu nthu gweghe shulo.”

²⁶ Isanu Josef na ma kahang mapi meza nu tagha wi Ejipt wi shüa. Mathu na dawa pi ma kamang tsü nonccaya nu pi akamang-nku wi chia.