ADECHHÜ 49 - Kemethajüh (N) (Re-editing) Bible (BSI)

Jakob Jüh Sakhenthu

¹ Jakob na ma tsathu cighu chi nu khi, “Hi vüyalo, hi ashiseng nthu miwi mangwa saten khe khipi nthu kiza na:

² “Ghola saghu nu kinalo, Jakob tsathu. Nthu ba Israel jühkinalo.

³ “Reuben, no itsa tssütsewa, no hi kezüwa. No icali tsa atuwa. Itsa tsüdi jawi kekapvü nu kezü ntsawa.

⁴ No atssüketi ti kesa, isala no kemechan ntsawa sa nben, kepaghenanye no iwubvü meshibvüwa ssijen, nu nba nküla nyankekinyen sa kesalina.

⁵ “Simeon nu Levi manyi na cünyu nyi. Manyi na manyi ghighethu sen nu yasayala saden.

⁶ Manyi kekuthi keccünengli pen witsü hi wa nten; Kepaghenanye manyi leben keminu wi anyi pathi, nu manyi gheshi sala amesü süpon kanku whengshi.

⁷ Manyi leben keminu miwi kishen-keshi yala benlo, kepaghenanye tsüna nmehai; nu manyi ghekepvü na nmehai ntsa kesalina. Hi manyi pi Israel yyi tsüdi, nu anyithu jawi bvüzighe thsüaden.

⁸ “Judah, ncünyuthu no seng ben; no nghinyithu sun tsüten ya ben. Ncünyuthu na ntuwi kukedu ben.

⁹ Judah na ssensitemi kesü ti kesa. Ma ma tssethu ghan theng nu, ma ku wi kheneng gho kuchusügü jen benden. Thola ma pamechüle kesa kempvüza nmi.

¹⁰ Judah na kadi khhatssü senden, ma shicüthu na keshüthangla kekhang senben. Mizzatentithu na khajana sen nu, ma wi gho jühkeya wina ma tuwi kukeduben.

¹¹ Ma gada zza pi kemeshentsse ton wi hugi, kemeshentsse ton jawi kemehai ntsawa. Ma ma thsümeni pi kisengtssü kenmie wi tsü ghasüden.

¹² Kisengtssü jjüpi ma nyon kenmie, nu tsenitssü kejjü ghena ma yha mikiben.

¹³ “Zebulun na atssükedone kete wi hangben. Ma tssü ghüsa na ahunjjen kenganpen saben; nu ma yyi na wa Sidon cuben.

¹⁴ “Issakhar na gada kesü ma khhi keni jüwi keben miwi nmehaiki.

¹⁵ Isala ma kemnanpen tsüna mehaitsü, nu ayyiwa tsüna canonkwen ntsa kesa muden. Tsalina ma ma ghatsü pvü wa akhhi tsü niya, nu amagha kesü sa nu meten pi kuli thsüben.

¹⁶ “Dan na ma nyi ghena kekhang kesenwa saben. Mathu na Israel mizza kepathu ti saben.

¹⁷ Dan na alen kete wi amaghang kesü saben, Tidila maghang ti alen kete wi ben, tsüna goru ccü mcü kecü ghena ma miwi kebenwa na ma seng wi khuli wa ben.

¹⁸ “Apvüwa, hi no zanshikecü tsü hieben.

¹⁹ “Gad na nyu teng kedsathu akhang kesü ssikaghashen ben, isala ma khapeghe nu mathu jügü ben.

²⁰ “Asher yyi wi asu kejon muyaben. Ma kadimi kesü tsse saya kemehai khuchi cüben

²¹ “Naftali na ameshü kesü ti bvüden, ma ameshü zza.

²² “Josef na kedsau ton kemehai kesü, atssükebvüpen kete wi ma cünathu na ajjen-keshon shigü pongca keben ti saben.

²³ Ma ghinyithu na khang ntsa nu ma ssikaghashen, nu mathu lamugho nu alakusü sen nu ma jügüben.

²⁴ Isala ma lamugho na zükeqhe nu ma kwen sapi zü cü Jakob Nyiza kekhangwa, Anenikehiewa, Israel Kekhwewa kekhang wina.

²⁵ Ha nba Nyiza na no kiqa cüle, Kekhangwa Anyiza na tang wi atsankegho kesawegü, nu ayyi non wi atssü kesawegü pi no cü. Amesüsi nu atsangathu ghena kesawegü kejon pi cü.

²⁶ Asu nu athighe kesawegü, alamyi yikhathu, nu anuphan yyishiphon thu wi canonkwen kesa ghena, kesawegü hathu ya Josef li miwi ben keyawa sa, ma cünyuthu wina bvü kesawa tie wi ben keyawa salo.

²⁷ “Benjamin na adenni pvükemenewa ti kesa kesü. Ma ghanen ghaja pala pathi nu ghan dsaben.”

²⁸ Hathu hana Israel mizza taghakeni, mathu ba na sawegü pi mathu kecü wi mathu kesüsü ghena sati kesa jüh khikechithu.

Jakob Shü nu pi Kevhü

²⁹ Tsaseng wi Jakob na ma tsathu wi khi, “Hi khili wa keshü wi inyithu saghu wa tendha, hi pi Hitti nyiwa lli wi ibathu gweghe vhülo,

³⁰ tsüna Kanaan yyi wi Mamre na nishuwa Makhpela wi tsü. Abraham na pi shüjjenpen sale Efron wi alonshiku nu alli ha shüya.

³¹ Ciwi mathu na Abraham nu ma wubvü Sarah, Isak nu ma wubvü Rebeka pi vhü, nu hi la Leah pi vhütheng.

³² Alli nu alonshiku na ciwi kebenwa tsüna Hitti nyi wi shü keya. Hi pi ciwi vhülo.”

³³ Jakob na kecükegwe ha pi ma tsathu kiza cenya nu qancadu shü wa.