ADECHHÜ 40 - Kemethajüh (N) (Re-editing) Bible (BSI)

Josef na Atssüzüthu man khikemilikechi

¹ Matsü pahan seng wi Ejipt wi kadimi hyi kepiewa nu amesa gü keten kediwa keni na kadimiwa nkenen sa.

² Kadimiwa na kedi ha keni miwi ma leben minu ya,

³ nu manyi pi kadipen kehiethu meza miwi kediwa jjen wi Josef pi chi ketheng pen wi gweghe atssüzü sa thsüa.

⁴ Mathu na matsü kesie atssüzü sa, nu meza miwi kediwa na Josef pi mathu ketsikina thsü.

⁵ Ghaja kesü ciwi atssüzüjjen wi ahyi kepiewa nu amesa gü keten kediwa manyi qho aman kesüsü man, nu manyi man ma jjügi kepapa.

⁶ Ghanenwa Josef na manyi wi gho nan manyi hathanathi keben muya.

⁷ Ma manyi keü, “Mangkesa na nansü nshinyi ahathanathi keben mu ben nu?”

⁸ Manyi khineng “Ishinyi qho aman kesüsü man nu hewi thola tsü jjügi khikemili keya nmi le!” Josef na khi, “Anyiza na aman khikemiliya kemehai kekhang khuchiden, nshinyi man khipi hi kizalo.”

⁹ Tsalina ahyi kepiewa na khi, “Iman wina kemeshentsse ton kesü ituwi ben,

¹⁰ ma cüna kecheng na ma miwi ben. Ma ji shigü shagha meyi pvü shagha, nu ma bi na nyünben.

¹¹ Ikwen wi kadimi hyi khusenden, tsalina kemeshentsse bithu tsü misügü pi ahyi wi chiya nu piewa kadimiwa cüa.”

¹² Josef na ma wi kiza, “Tsü ma jjügi hati le: ma cüna kecheng tsüna ghanan kecheng.

¹³ Ghanan kecheng jüwi kadimiwa na no kesami teshi cü nu no khushi sen wa kheni pen wi chi cüaben. No kheni ma hyi kepiewa kesa ti ahyi piewa ma cüben.

¹⁴ Isala no ghena tsüdila mehaikeya wi hi meshenchilo, tizenthu kadimiwa wi inyan khichi nu hi kiqa pi atssüzüjjen he wina shhuya thsülo.

¹⁵ Kepaghenanye Ibri yyi wina hi ghanfü sen bvüa, nu he Ejipt wi la hi mangla nsazzi lela mathu na hi pi atssüzü sa thsü theng.”

¹⁶ Amesa gü keten kediwa na ahyi kepiewa man khikemili tsüna mehai le kesa mukeya wi ma Josef wi kiza, “Hi la aman kesü man le; hi ashijü kecheng pi ili wi tonpvü den.

¹⁷ Ashijü miwa wi tsü kadimiwa ghena amesa alen kepapa kesa na ben, nu awathu na tsü mcüben.”

¹⁸ Josef na khineng “Tsü ma jjügi na hati le: nshijü kecheng tsüna ghanan kecheng.

¹⁹ Ghanan kecheng jüwi kadimiwa na no khushi sen wa — nli widhiaben. Isanu nkamang pi achan wi hagi, nu awathu na gho nkamang mcüben.”

²⁰ Ghanan kecheng seng wi kadimiwa na ma kepvügha tsathang sa nu ma kekhu wi kedithu ghena kemishu kesü sa. Ma ma hyi kepiewa nu ma mesa gü keten kediwa keni khushi sen nu kedithu tuwi gho.

²¹ Ma ahyi kepiewa pi kheni pen wi ben wa thsüa,

²² isala amesa gü keten kediwa tsüpi hanthia. Ha tsüdila Josef na kekhi tsüti sa.

²³ Isala ahyi kepiewa na Josef meshen meyala — ma Josef cüki malitha sa.