ADECHHÜ 4 - Kemethajüh (N) (Re-editing) Bible (BSI)

Kain Nu Abel

¹ Tsaseng wi Adam na ma wubvü Eve manyi gweghe nu ma wubvü na atsa-npvüya. Ma atsa kesü pvüghaya nu khi, “Apvüwa kekiqa ghena hi atsa kesü muyadha.” Ma atsawa nyan pi Kain ciya.

² Tsaseng wi ma atsa kesü mu nengya nu ma nyan pi Abel ciya. Abel na aneni hie isala Kain na allikeca nyi sa.

³ Matsü pahan seng wi Kain na abikehai pahan sengho Apvüwa kinyi.

⁴ Nu Abel la ma neni tssütsewa tsü pathi nu ma sa kemehai ntsawa sengho kinyi. Apvüwa na Abel nu ma kinyi kechi tsü nen,

⁵ isala ma Kain nu ma kinyi kechi tsü meyala. Tsalina Kain na ma lebenminu nu ma mmijan wa.

⁶ Apvüwa na Kain kiza, “Mangkesa na nlebenminu nu n-mmijan ben nu?

⁷ Keujüla no kekuli meshon lethu, no n-nonghe kesa; isala no kekuli nkemehai ghena kesami na no tetsaki bendha. Tsüna no yaya mvu saben, isala no tsü miwi khangya nsathu yishü.”

⁸ Kain na ma cünyuwa Abel kiza, “Ishinyi alli wi wa na.” Ciwi manyi alli wi keben wi Kain na ma cünyuwa Abel pathia.

⁹ Apvüwa na Kain keü, “Ncünyuwa Abel na khiewi ben nu?” Ma khineng “Hi nchüle, hi icünyuwa kehiewa kwe?”

¹⁰ Apvüwa na khi, “No mangkesa na kemessi kekuli hati ha satheng nu? Ncünyuwa jjü na ayyi wina hewi magha shagha bendha.

¹¹ Kishen-keshi na nmiwi bendha nu no ayyi ha cakeya nmi. Ayyi na ma pang ka pi no ncünyuwa kepathi jjü tsü tsenyadha.

¹² No allica lela ayyi na mangla shigü cü nben; no ayyi wi ajjenlli nmila kegoedeja thsüden.”

¹³ Kain na Apvüwa kiza, “Kemeten hawa ha ighena di mtsüdha.

¹⁴ No ayyi hawi nu ntu wina hi jügüshi bendha. Hi ayyi hawi ajjenlli nmila kegoe waden, nu anyi thowa na hi muya khe hi pathiaben.”

¹⁵ Isala Apvüwa na khineng “Nyele, anyi thowa na no pathi khe ma miwi ajukhi tagü tughu yaben.” Anyi kesüle kesü lela Kain metu keyawa ma npathi thsüle kesalina Apvüwa na zensu kesü pi Kain miwi chia.

¹⁶ Tsalina Kain na Apvüwa tu wina bvü nu wa ayyi kesü “Kegoedejapen” kesa Eden na nishuwa wi hang wa.

Kain Shicübvüghathu

¹⁷ Kain nu ma wubvü manyi na atsa kesü muya nu ma nyan pi Enok ciya. Kain na anyunuti kesü saya nu tsüpi ma tsawa nyan ci.

¹⁸ Enok tsa na Irad, Irad na Mehujael ba, nu Mehujael tsa na Methushael, Methushael na Lamek ba.

¹⁹ Lamek na ma wubvü keni, manyi nyan na Ada nu Zila.

²⁰ Ada na anyi asahang kecen nu anithsüjjen wi hang ketenthu baqhaiwa Jabal tsü pvügha.

²¹ Ma cünyuwa na harp nu lalali khou ketenthu baqhai Jubal.

²² Zila na lezza nu amighe pi atsanqaithu tsüdi cü ketenwa Tubal Kain pvüghaya. Tubal Kain tssüggüwa na Namah.

²³ Lamek na ma wubvü keni kiza, “Ada nu Zila nshinyi ijüh kinalo, anyi kepvünyi kesü na hi misamina kecü ghena hi ma pathidha.

²⁴ Keujüla anyi Kain kepathiwa miwi kahangli tagü yalethu, hi kepathiwa miwi kahangli achentagü nu tagü yaben.”

Seth nu Enosh Manyi

²⁵ Adam nu ma wubvü manyi atsa kepa wi la kesü muya. Eve na khi, “Kain na pathi kesawa Abel mithon wi Anyiza na atsa kesü pi hi cüdha.” Nu ma nyan pi Seth ciya.

²⁶ Seth tsa na Enosh. Tsü nten anyi na Apvüwa kemetha nyan sen nu kinyi wa.