ADECHHÜ 35 - Kemethajüh (N) (Re-editing) Bible (BSI)

Bethel wi Anyiza na Sawegü pi Jakob Kecü

¹ Anyiza na Jakob wi kiza, “No wa Bethel wi hang walo. Ciwi kekinyipen kesü sapi no kheni ncünyuwa Esau wina bvü keten ntuwi keghowa Anyiza tsü cülo.”

² Tsalina Jakob na tsü khipi ma theghi nu ma gweghe ketenthu tsüdila kiza, “Nthu asang cenpvüthu keben tsü khupi khalalo, nthu samethaya, nu athsümeni ketheü pvüyalo.

³ Ithu apen ha teshi theng nu Bethel wi wa tendha, ciwi hi kekinyipen kesü sapi Anyiza igükeccü wi hi kiqa nu hi khiewi wa khe hi ssi keghowa cüden.”

⁴ Tsalina mathu sen keten asang cenpvüthu tsüdi nu mathu khuna thighithu la khupi Jakob cüa. Jakob na tsüthu khupi Shekhem kete wi ayangton kekhu wi chhüvhüa.

⁵ Jakob nu ma tsathu na apen tsü keteshi wi kemessi na anyuti tsü kevü anyithu miwi gho nu mathu Jakob nu ma tsathu jügü nwala.

⁶ Jakob na ma nyithu tsüdi ssinu Kanaan yyi wi khili pi Bethel le khi keten Luz wi ghoya.

⁷ Ma ciwi kekinyipen kesü saya nu apen tsüpi Bethel Nyizawa nyan ci, kepaghenanye ma kheni ma bi wina bvü keten Anyiza na apen ciwi ma tuwi gho.

⁸ Rebeka maghalewa Deborah shü nu pi Bethel na acülawa ayangton cakhu wi vhüa. Tsalina tsüpi “Kiqai yangton” tsüti cia.

⁹ Jakob na Mesopotamia wina kegho wi Anyiza na kheneng ma tuwi gho nu sawegü pi ma cü.

¹⁰ Anyiza na ma wi khi, “N-nyan na Jakob, isala khili nten pi Israel sa tendha.” Tsalina Anyiza na ma nyan pi Israel ci cüa.

¹¹ Nu Anyiza na ma wi khi, “Hi kekhang ntsawa Nyiza. Atsanga kejon benyalo. No wina mizzatentithu shhugho ben, nu no kadimithu baqhai saben.

¹² Hi ayyi pi Abraham nu Isak kecü tsüpi no cüden, nu pi nseng wi nshicübvüghathu la cüden.”

¹³ Tsaseng wi Anyiza na ma teshia.

¹⁴ Ciwi Anyiza na ma keccüneng pen wi Jakob na meshenkeben lon kesü pi sheng, nu kisengtssü nu oliv deli pi tsü miwi zügüchi nu sametha.

¹⁵ Ma apen tsü nyan pi Bethel cia.

Rachel Keshü

¹⁶ Jakob nu ma theghi na Bethel teshi nu mathu wa Efrath cule kesa kesiela keben wi Rachel na atsa kepvügha tsü gho, nu aggüsakinaa ghena agüccü ntsa sa.

¹⁷ Kinaa agüccü ntsa sa keben wi ma kenonccawa na ma wi khi, “Rachel, nmessi lalo, no atsa kesü mu nengyadha.”

¹⁸ Isala ma shü wa tendha nu ma jüh sakhenwa wi ma tsa nyan pi Benoni ci, isala ma ba na ma nyan pi Benjamin cia.

¹⁹ Rachel na shü nu pi Efrath kewalen wi khili pi Bethlehem le khi keten kete wi tsü vhüa.

²⁰ Jakob na ciwi meshenkeben lon kesü pi sheng nu tsüna Rachel shüjjen le kesa nansü kecu lela ben.

²¹ Jakob na apen ketsen sen wa Eder ducü kaghapi wi ma kemnanpen saya.

Jakob Tsathu

²² Jakob na ciwi hang keben wi Reuben na ma ba wubvü meshibvüwa Belha ssimehai; Jakob na tsü cüki zakeya wi ma aghepvü ntsa sa. Jakob ma tsa taghakeni na ben.

²³ Leah tsathu na Reuben (Jakob tsa keqhaiwa), Simeon, Levi, Judah, Issakhar, nu Zebulun.

²⁴ Rachel tsathu na Josef nu Benjamin.

²⁵ Rachel maghalewa Belha tsathu na Dan nu Naftali.

²⁶ Leah maghalewa Zilpa tsathu na Gad nu Asher. Atsa hathu ha Mesopotamia wi pvüghaya.

Isak Keshü

²⁷ Jakob na Abraham nu Isak manyi kahang pen Hebron kete Mamre wi ma ba Isak wi wa.

²⁸ Isak na amapi meza nu achentazen hang.

²⁹ Isak na qhai nu shü, nu ma tsa Esau nu Jakob manyi ma chhüvhüa.