ADECHHÜ 34 - Kemethajüh (N) (Re-editing) Bible (BSI)

Dina Messameshükesa

¹ Jakob nu Leah manyi nga Dina na ghanan kesü Kanaan nzathu hhainan wa.

² Hivi nyiwa Hamor tsa Shekhem, ayyi ciwi kediwa na Dina mukeya wi ma ghan pi messameshüa.

³ Ma ghalawa tsüna atsimehaitsü mukeya wi ma nenya nu ma kenen pvüyale sa.

⁴ Shekhem na ma ba wi kiza, “No ghala hawa ha yapi iwubvü saya thsülo.”

⁵ Jakob na nyu ma nga Dina messameshü dhale kesa chüya, isala ma tsathu na alli wi asahangthu hie wa kesalina mathu npi kegho chu ma ceen ben wa.

⁶ Shekhem ba Hamor na Jakob ccünengle wa,

⁷ tsü meyi Jakob tsathu na alli wina kheneng gho. Mathu na tsü cüki zakeya wi mathu leben minu nu aghepvü ntsa sa, kepaghenanye Shekhem na Jakob nga messameshü nu Israel nyithu nkekhichi kekuli ha sa ketheng lina.

⁸ Hamor na ma wi khi, “Itsa Shekhem na n-ngawa Dina nenben, tsalina manyi ben thsülo.

⁹ Gweghe ajühcenya nu ithu jajü wi keyali wa na.

¹⁰ Isalethu nthu na hewi ithu diyyiwa wi gweghe hangya mehai; nthu na khiewa hang mvu ben khe hang, kekhenkeghe mangla nmila asensaya, nu keben la bhaya mehai.”

¹¹ Tsaseng wi Shekhem na Dina ba nu ma baghathu wi kiza, “Hi kenen ha sa cülo, isathu nthu na mangwa yamvu ben khe pi nthu cüben.

¹² Nthu na aju mangwa yamvu ben khe hi kizalo, nu awubvü men khaju yamvu khe khieya mehai. Hi nthu kekhie tsüpi nthu cüaben na, ma pi iwubvü sa thsülo.”

¹³ Shekhem na mathu tssüggüwa Dina kejüghe yathsü ketheng lina Jakob tsathu na Shekhem nu ma ba Hamor manyi mechu nu khi.

¹⁴ Mathu na ma wi khi, “Ikhang tssüggüwa pi ahyu nkahan nyi wi n-nuwa thsüya nben, tsüna ikhang nkekhichi nkenyuwa saben.

¹⁵ Ikhang ajjügi kesütan wi anlo khiya mehai, tsüna nthu npvüzathu tsüdila ahyuhan nu ikhang ti sa lethu.

¹⁶ Tsaseng wi ccüna ithu jajü wi keyali le cenya mehai. Ikhang na nthu jawi hang nu nthu gweghe kesütan saben.

¹⁷ Isala keujüla nthu na ikhang kekhi jjügi tsü meya nu ahyuhan nben lethu ikhang na Dina ssiya nu bvüaben.”

¹⁸ Ajjügi ha Hamor nu ma tsawa Shekhem manyi nen,

¹⁹ nu pvüzawa na kaghaji wala khi kechi ti kulia, kepaghenanye ma Jakob ngawa nen ntsa kesalina. Ma ma theghi jawi anyi kemechan ntsawa.

²⁰ Hamor nu ma tsawa Shekhem manyi na anyunuti khweti-jenka ajüh keccünengli pen wi wa nu ajühkhi pi ma nyithu kiza:

²¹ “Anyi hathu ha ayenkecathu; mathu yala ithu yyi wi ben nu cüshuya thsülo. Mathu ghena la nsenthu keyishü ayyi keti la ben. Ithu na mathu ngathu yaya, nu ithu ngathu la pi mathu cü na.

²² Isala mathu na ahyuhan keten ti ithu la npvüzathu tsüdi ahyuhan lethu tsü jjügi ghena mathu na ithu jawi hang nu ithu gweghe kesütan saben.

²³ Mathu sahangthu nu keben tsüdila ithu ji sa nben kwe? Tsalina mathu na ithu jawi hangya mehaile cen na.”

²⁴ Anyunuti wi kahang nyithu tsüdila Hamor nu Shekhem manyi kekhi tsü anle isanu npvüzathu tsüdila ahyuhan.

²⁵ Ghanan kecheng seng wi anyithu na mathu hyukahan yisü khuma keben wi Jakob tsa Dina baghawa Simeon nu Levi manyi na njünnu khuya nu nyu na mathu meshensa nkeben wi anyunuti wi du npvüza tsüdi süthikhia,

²⁶ Hamor nu ma tsawa Shekhem la saghu. Tsaseng wi manyi na wa Shekhem jjen wi Dina ssiya nu bvüa.

²⁷ Anyi pathikhi kesa seng wi Jakob tsa kepathu na mathu tssüggüwa kejügheya kecü jukhi wina anyunuti keben tsüdi shuya.

²⁸ Mathu na asahang kepathu, amesüsi, gadathu nu anyunuti nu alli wi lela keben tsüdi khuya.

²⁹ Mathu na ajjen wi ma men keben tsanqaithu, nzathu nu ghanyithu tsüdila ghanya nu ssisen bvüa.

³⁰ Jakob na Simeon nu Levi manyi wi kiza, “Nshinyi na agükeccü sengho hi cüdha, khili Kanaan, Periz, nu ayyi hewi anyi tsüdila hi nanmeghü tendha. Hi anyi kejon nmi, keujüla mathu saghuya nu hi ssikaghashen lethu hi nu itheghi maben la yasa ben.”

³¹ Isala manyi na khineng “Ma ishinyi tssüggüwa pi keqheza menkedsa nza ti saya mehai kwe?”