ADECHHÜ 32 - Kemethajüh (N) (Re-editing) Bible (BSI)

Jakob na Esau Metu le Kidenkeya

¹ Jakob na ma len wi wa keten tangnyilothu pahan gho ma metu.

² Jakob na mathu mukeya wi khi, “Ha Anyiza kemnan pen; ” tsalina ma apen tsü nyan pi Mahanaim le cia.

³ Jakob na ma tu wina nyilothu kesun pi Edom diyyiwa wi ma cünyuwa Esau wi chi.

⁴ Ma mathu kecükegwe pi khi thsü; “Hi nmaghawa Jakob, ajüh pi ipvüwa Esau kizaben, Laban gweghe ben wa nu kheneng gho minuten nu nansü ccüna tenle.

⁵ Hi amesüsi, gadathu, khaghaneni, anenithu nu amaghathu ben, kediwa, hi no kenen pvüyale kesalina ajüh kesun pi no wi chibenle!”

⁶ Nyilothu na Jakob wi kheneng gho nu khi, “Ikhang na ncünyuwa Esau wi wa, nu ma no metule gho tendha. Ma anyi meza mejü ssinu ghoden.”

⁷ Jakob na messi nu ma leben güccü. Ma anyi ma gweghe ketenthu, amesüsi, khaghaneni, anenithu, nu sunsiesa tsüdila gishü pi akhang keni saya.

⁸ Ma kemeshen “Keujüla Esau na gho akhang atuwa ssisa lethu akhang kepawa na bvüya mehai.”

⁹ Tsaseng wi Jakob na kekhie sa, “Ibaqhai Abraham Nyiza nu iba Isak Nyiza, hi kekhie kina cülo! Apvüwa, no hi diyyi wi nu ishilithu wi wha nenglo kiza, nu no alentagha wi ighena kemehaiwa sacü tenle khi.

¹⁰ No pi nmaghawa ccüca kechi nanketizen nu jüh- tsentsathu tsü hi nmu qole. Hi akhhatssü kesütan khe mangla sen nu Jordan Ghaku npvüdhi, nu khili anyi khang keni ssinu gho neng tendha.

¹¹ Ibi Esau kwen wina hi hangsha cülo khieben. Hi messiben— ma gho ikhang ssikesali nu ikhang tsüdi nzale ghanyithu lela pathikhi cüden.

¹² No hi wi khishi ketheng, ‘Hi alentagha wi nghena kemehaiwa sa cüden, nu nshicübvügha sapi atssükedone ghüsa wi ahachan ti si nkeyakhi sa cüden’ kesa tsü meshenchilo.”

^13-15 Ghaja kesü ciwi keben seng wi Jakob na asahang hathu pi ma biwa Esau cüle kesa kessiya; aneni ghala 200 nu asüpon 20, khaghaneni ghala 200 nu asüpon 20, sunsiesa tsenitssü misügü keten ma zza kesaghu 30, amesü ghala 40, nu asüpon 10, gada ghala 20 nu asüpon 10.

¹⁶ Ma tsüthu gishü pi athu kepapa sa nu ma maghathu kesüsü pi athu kesüsü hie thsü. Ma mathu wi kiza, “Ituwi walo, athu kesüsü temeja nu kesenielo.”

¹⁷ Ma amagha atuwa wi kiza, “Ibiwa Esau na no metuya nu no wi ‘Npvüwa thowa nu? No khiewa waten nu? Asahangthu ntu wi keten ha thowa ji nu?’ hati keü lethu,

¹⁸ no hati ma nlunengthu yishü, ‘Hathu ha nmaghawa Jakob ji. Ma tsüthu kesun pi ma pvüwa Esau ju saben. Jakob na ikhang seng wi ghoten le.’”

¹⁹ Ma tsü makesü amagha keniwa, kechengwa, nu kepa wi asahangthu hie keten tsüdi kizala: “No khathansha wi Esau metuya khe ha makesü nkhithu yishü.

²⁰ ‘Nmaghawa Jakob na ikhang seng wi ghoten le’ tsüti khi metsilo.” Jakob kemeshen, “Hi itu wina aju kesun chi cü kebenthu hapi ma leben satecca cüthu nkhe wi hi ma metu keya wi ma hi kesami teshi cüaben.”

²¹ Tsalina Jakob na ajuthu tsü kesun pi ma tuwi wa thsü, isala ma tsü ghaja kemnanpen ciwi ben wa.

Jakob na Tangnyilo Ssinu Kekaghanpfü

²² Tsü ghaja Jakob na shagha nu ma wubvü keni, ma wubvü meshibvü keni, nu ma tsangathu taghakhen ssiya nu Jabbok Ghaku pvüdhi wa.

²³ Ma mathu kesun pi pvüdhi wa thsü nu ma tsanqaithu la tsüdi kesun pi pvüdhi wa thsüa;

²⁴ isala Jakob na ma ketan aseng wi ben wa. Tsaseng wi anyi kesü na gho ma ssi kaghanpfü sen wa ghanenwa thangtheghi cu.

²⁵ Anyi tsü wa na ma khangya ntendha kesa chü keya wi ma Jakob kanku wheng teguwen.

²⁶ Anyi tsüwa na khi, “Hi ya bvü thsülo, thangtheghi shaghadha.” Isala Jakob na khineng “No sawegü pi hi npi kecü chu hi no teshi chi ntenle.”

²⁷ Anyi tsüwa ma keü, “N-nyan thowa nu?” Ma luneng “Inyan na Jakob.”

²⁸ Anyi tsüwa khi, “N-nyan pi Jakob le nkhidha. No Anyiza na anyi ssikesali wi khangyadha; tsalina n-nyan pi Israel sadha.”

²⁹ Jakob na keü, “N-nyan pi hi kizalo.” Isala ma luneng “No inyan keü pi mangsa nu?” Tsaseng wi ma sawegü pi Jakob cü.

³⁰ Jakob na khi, “Hi Anyiza metuti yadha, isala hi hangben; ” tsalina ma apen tsü nyan pi Peniel cia.

³¹ Jakob na Peniel keteshi wi aghani na shhugho, ma kanku keguwen ghena ma kesonben.

³² Tsalina nansü kecu Israel nyithu na kanku-zü tsü dsa nten, kepaghenanye Jakob kanku-zü miwi wheng kecü ghena.