ADECHHÜ 30 - Kemethajüh (N) (Re-editing) Bible (BSI)

¹ Isala Rachel tsü atsanga pvügha pi Jakob ncü, tsalina ma ma pvünonwa miwi anyonsa shagha nu Jakob wi khi, “Atsanga pi hi cülo, nyelethu hi shüa tendha.”

² Jakob na Rachel miwi ma leben minuya nu khi, “Hi Anyiza kuti saya nben. Ma no ya atsanga nmu thsüla kesawa tsüle.”

³ Rachel na khi, “Imaghale Bilha hewi ben, no wa ma ssijen nu ma yala ighena atsa kesü muya thsülo. Tsütinu ma ghena hi ajja kesü sayaden.”

⁴ Tsalina ma Bilha pi ma wuba cüa, nu Jakob na wa Bilha ssijen.

⁵ Bilha na atsa-npvüya nu atsa kesü pvügha pi Jakob cüa.

⁶ Rachel na khi, “Anyiza na hi nantizen cüdha; ma hi kekhie kina cü nu atsa kesü pi hi cüdha; ” tsalina ma nyan pi Dan. cia.

⁷ Bilha na kheneng atsa-npvüya nu atsa keniwa pvügha pi Jakob cüa.

⁸ Rachel na khi, “Hi ipvünonwa ssikaghashen ntsa sa nu hi khangyadha; ” tsalina ma nyan pi Naftali cia.

⁹ Leah na ma npvüghadha kesa chükeya wi ma maghale Zilpa pi Jakob wubvü ti sa thsü.

¹⁰ Zilpa na atsa kesü pvügha pi Jakob cü.

¹¹ Leah na khi, “Hi icenpvü bendha; ” tsalina ma nyan pi Gad cia.

¹² Zilpa na atsa kepa wi kesü pvügha pi Jakob cü.

¹³ Leah na khi, “Khatila inonghe nu! Nzathu na hi pi kemihhi jjawa isa ci tendha; ” tsalina ma nyan pi Asher cia.

¹⁴ Awhengsu kewwitsü wi Reuben na alli wi wa nu atsueghe muya nu sengho ma jja Leah cü. Rachel na Leah wi khi, “Ntsawa na pvükegho atsueghe tsü pahan pi hi cülo.”

¹⁵ Leah na luneng “No iwuba ssibvü kesa tsü lekete kwe? No khili itsawa tsueghe ha la sen bvüale ben kwe?” Rachel na khi, “Keujüla no ntsawa tsueghe tsüpi hi cü lethu no shita wi Jakob ssijenya mehai.”

¹⁶ Minulen wi Jakob na alli wina gho, Leah na shhu ma metu nu khi, “No shita wi hi gweghe njenthu yishü, kepaghenanye hi itsawa ji atsueghe pi no melliyadha.” Tsalina tsü ghaja Jakob na wa ma ssijen.

¹⁷ Anyiza na Leah kekhie kina cü, nu ma atsa-npvüya nu atsa mangawa pvügha pi Jakob cü.

¹⁸ Leah na khi, “Anyiza na akutimen pi hi cüdha, kepaghenanye hi imaghale pi iwuba cü kesalina:” tsalina ma tsawa nyan pi Issakhar cia.

¹⁹ Leah na kheneng atsa-npvüya nu atsa tughowa pvügha pi Jakob cü.

²⁰ Ma khi, “Anyiza na aju kemehai ntsa pi hi cüdha. Iwuba na khilitsü hi ghaliwa tendha, kepaghenanye hi atsa tugho pvügha pi ma cüdha; ” tsalina ma nyan pi Zebulun cia.

²¹ Ma tsaseng wi anga kesü pvüghaya nu ma nyan pi Dina ci.

²² Tsaseng wi Anyiza na Rachel meshenchi, nu ma kekhie kina cü nu ma sapi atsa muya kemehai sa thsüa.

²³ Ma atsa-npvüya nu atsa kesü pvüghaya. Ma khi, “Anyiza na atsa kesü pi hi cü nu hi wi nyu pangbi kesawa tsü sen bvüdha.

²⁴ Apvüwa na hela atsa pi hi kecüwa sa; ” tsalina ma nyan pi Josef cia.

Jakob na Laban Ssinu Keccünengli

²⁵ Josef pvügha keya seng wi Jakob na Laban wi kiza, “Hi teshichi nu hi ya ijjen wi wha thsü yilo.

²⁶ Hi no kekuli sa nu mellikeya iwubvü keni nu itsangathu pi hi cü nu hi wha thsülo. Hi no kekuli mehaitsü kesa tsü no chüben.”

²⁷ Laban na ma wi khi, “Hi yala ha khi thsülo; hi chükeya Apvüwa na nghena sawegü pi hi cüdha.

²⁸ Mangwa pi nkutimen sa cüten khe khilo, hi pi no cüaden.”

²⁹ Jakob na khineng “Hi khati no kekuli sa nu hi nmesüsithu kenoncca ghena jikayi ya khe no chüben.

³⁰ Hi npi kegho witsü keu sa keben tsüna jikayi ntsa sadha, nu Apvüwa na hi khiewa wa khe sawegü pi no cü. Khili ha hi ketanla ighena kidenkeya tsü sadhale!”

³¹ Laban na khi, “Hi mang pi no cü nu?” Jakob na luneng “Hi akutimen mangla ya nten. No hi kekhi ha sa lethu hi nsahangthu noncca benden.

³² Hi yala nansü nsahangthu jawi wa thsü nu khaghaneni zza kenimegho, aneni zza kishenki nyelela kinaqhe tsüdi khuya thsülo. Ikutimen keyamvu tsüdi tsüna tsüdha.

³³ Tsaseng wi hi atsentsa sala nye khe no muya mehai. No ikutimen tsü ghang kegho wi keujüla hi aneni kinaqhe nyelela kishenki nkenye na benla nyelela khaghaneni kenimegho nkenye na benla lethu tsüna hi ghanfü yale kesa no chüyalo.”

³⁴ Laban na khineng “Tsüna mehaiben. No kekhi tsüti sa na.”

³⁵ Isala Laban na tsü ghanan aneni süpon mathu miwi kinaqhe nyelela kishenki keben, nu aneni ghala mathu miwi kinaqhe nu kishenki nyelela kemiki keben; nu kenimeghothu tsüdila khupi makepa sa nu ma tsathu yala tsüthu hie thsü.

³⁶ Tsaseng wi ma Jakob teshi theng nu ghanan kecheng lenketsen wi wa; nu Jakob na Laban neni kepathu tsü noncca.

³⁷ Jakob na alicü, mcüshüli, nu amton chan cünathu khuya nu tsüthu kwe pahan shipi nkiqhe-nkighe sa thsüa.

³⁸ Ma achan cünathu tsüpi anenithu na atssü jjüketen khu tuwi chi, kepaghenanye anenithu na atssü jjü kegho wi jigü ketenlina.

³⁹ Isanu anenithu na achan tsüthu kete wi jigüthu mathu zza nkiqhe-nkighe, kishenki nu kinaqhe tsüti ca cü.

⁴⁰ Jakob na anenithu nu khaghanenithu kepapa sa thsü nu tsüthu kupi Laban ji nkiqhe-nkighe nu kenimeghothu wiwa peghe thsü. Tsütinu Jakob na ma sahang kuya nu pi Laban ji manyi kepapa sa.

⁴¹ Asahang kekunonthu na jigü lethu Jakob na achan cüna tsüpi mathu atssü kejjükhu tuwi chi isanu tsüthu ya achan cünathu jawi ca thsü.

⁴² Isala ma achan cünathu tsüpi asahang qan-yi kesathu tuwi tsü nchi. Matsü keu jüna asahang kekunon tsüdila Jakob ji sa, nu qan-yi kesathu tsüna Laban ji sa.

⁴³ Tsütinu Jakob na keban ntsa saya. Ma amesüsi, nssümagha, sunsiesa, nu gadathu kejon ben.