ADECHHÜ 3 - Kemethajüh (N) (Re-editing) Bible (BSI)

Anyi Na Ajüh nkeya

¹ Apvüwa Anyiza na aghangsathu sa kechi jawi amaghangwa tsüna acho kepvü ntsawa. Amaghang na nzawa keü, “Anyiza na asanku wi kedsau bi mangla ndsa lalo no kiza kwe?”

² Nzawa khineng “Ma ishinyi na asanku wi kedsau bi tsüdila dsaya mehai;

³ isala Anyiza kekhi na, ‘Nshinyi na achan asanku non wi kebenwa tsü ndsala nu tsü la nkidhenla, isalethu nshinyi shüaben’ tsüti kizale.”

⁴ Amaghang na khineng “Tsü ntsakhiwa nye; nshinyi shü nben.

⁵ Kepaghenanye Anyiza na chüben, nshinyi na kusi kedsau tsü dsa khe nshinyi nyon sha chi nu nshinyi la Anyiza ti kemehai-keteshi chüyaben.”

⁶ Tsaseng wi nzawa na achanton tsüna khatila tsimehai nu ma bi tsüna mehaiben khe muya nu ma metsa shaghaya mvuthi sa. Tsalina ma kedsau tsü lapi dsaya, nu gishü pahan pi ma wuba cü nu ma wuba la tsü dsaya.

⁷ Manyi tsü dsaya meyi manyi nyon shachi cü nu manyi kemissü kesa chüya; tsalina manyi khhaghabvü wa du pi kewenkili pi manyi wheng bhonya.

⁸ Minulen wi manyi Apvüwa Anyiza na asanku wi kegoe keten hhai zaya, nu manyi wa achan jawi ma kuthi wa.

⁹ Isala Apvüwa Anyiza na npvüzawa tsü cichi nu khi, “No khiewa ben nu?”

¹⁰ Ma khineng “Hi no asanku wi keten hhai zaya nu hi kemissü ghena no messi nu kuthi benle!”

¹¹ Anyiza na ma keü, “Thowa no kemisüle kiza nu? Hi no kedsau ndsa lalo kekhi tsü dsadha kwe?”

¹² Npvüzawa na khineng “No pi hi kaghanpfü sa kecü nzawa tsüna kedsau pi hi cü nu hi tsü dsadhale!”

¹³ Apvüwa Anyiza na nzawa keü, “No mangkesa na tsüti sa nu?” Nzawa na khineng “Amaghang na hi mechu pi tsü dsa thsüle!”

Anyiza jühkekaghaten

¹⁴ Tsaseng wi Apvüwa Anyiza na amaghang kiza, “No ha ghena ketizensa den; aghangsathu tsüdi miwi no ketan kishen-keshi ha pvüden, khili nten npvü pi ayyi kizzanu kegoe, nu no kahang chu ayyinikhu dsaben.

¹⁵ Hi no sapi nzawa nshinyi nankemeghüli thsüaden; nshinyi shicübvügha na keshüthangla nankemeghüli den. Ma shicübvügha na nli cücha cüben, nu no mathu ccümeccen mcüben.”

¹⁶ Ma nzawa kiza, “Hi no yala atsanga kenpvü wi ketizensa nu kepvügha wi agüccü ntsa sa thsüden. Isalela no tsü miwi nwuba nmvuthi saben nu ma cakhu wi ben thsüben.”

¹⁷ Kheneng ma npvüzawa kiza, “No nwubvü jühkina nu hi ndsa lalo kesa kedsau tsü dsadha. No tsüti kesa ghena hi kishencü pi ayyi miwi chidha. No kahang chu n-güccü ntsa kuli nu kedsakejjü muyaben.

¹⁸ Ciwi kepagha nu aghazüthu na shhugho nu no aghangwen tsü dsaben.

¹⁹ Ayyi pi no zhü ketheng ti no ayyi npi ceng neng kewa chu agüccü nu kekuli wi shishü nu ayyi miwi pala mu dsaben. Ayyi pi no zhütheng nu no ayyi ceng neng wa ben.”

²⁰ Adam na ma wubvü nyan pi Eve ciya, kepaghenanye ma anyi tsüdi jjawa.

²¹ Apvüwa Anyiza na asahyu thsümeni saya nu pi Adam nu ma wubvü manyi mphi thsü.

Asanku Wina Adam nu Eve Manyi Kejügüshi

²² Tsaseng wi Apvüwa Anyiza na khi, “Anyi na khilitsü ikhang ti sa nu kemehai-keteshi chü bendha. Ma yala kahang chanton bi tsü dsanu anuphan hang thsü nten.”

²³ Tsalina Apvüwa Anyiza na Eden Sanku wina ma jügüshi nu kheni pi ma zhüketheng ayyiwa tsü ceng wa thsüa.

²⁴ Ma anyiwa jügüshi; nu Eden Sanku nishuwa tsü cherubim nu njünnu nnikeqhe apen tsüdi wila muya kemehaiwa tsüpi hie thsüa. Tsüna anyi thola kahang chanton tsüwa kete wi ngho thsüle kesalina.