ADECHHÜ 29 - Kemethajüh (N) (Re-editing) Bible (BSI)

Jakob na wa Laban Jjen Cukeya

¹ Jakob na kijünyi kewa tsü wa sen nu nishu yyiwa wa.

² Ma alli wi atssükhang kesü kete wi ghoya nu khaghaneni athu kecheng na tsü kevü wi ben. Atssükhang hawi atssü pi khaghanenithu jjü thsüden, atssükhang pang wi alon keti pi shan theng.

³ Khathansha wi khaghanenithu gho saghuya khe anenikehiethu na alon tsü khupheghe nu mathu ya atssü jjüya thsüden. Tsaseng wi mathu alon tsü kullu pi ma pen wi chi nengden.

⁴ Jakob na anenikehiethu wi keü, “Ipvüshangthu, nthu khiewa na gho nu?” Mathu na ma luneng “Ikhang Haran wina ghole.”

⁵ Ma mathu wi keü, “Nthu na Nahor tsawa Laban chüben ma?” Mathu khineng “Ikhang na ma chübenle.”

⁶ Ma keü neng “Ma kemehai saben ma?” Mathu luneng “Ma kemehai sabenle. Ghangchilo, ma ngawa Rachel na ma nenithu ssinu hewi ghoden.”

⁷ Jakob na khi, “Khili aghani tang wi ben, nu khaghanenithu kekughu tsü nye, mangkesa na atssü pi mathu jjüya thsü nu ssinu wa amou wi chi nsa nu?”

⁸ Mathu na luneng “Khaghanenithu tsüdi gho saghuya ccüla alon tsü khupheghe nu ikhang atssü pi mathu jjüya thsü nkesatsü ikhang tsüti saya nbenle.”

⁹ Jakob na mathu ccünengtu keben wi Rachel na ma ba khaghanenithu ssinu ghoa.

¹⁰ Jakob na khathansha wi Rachel na ma jja baghawa Laban khaghanenithu ssiketen muya khe ma wa atssükhang wi alon khupheghe nu atssü pi khaghanenithu jjüya thsüa.

¹¹ Tsaseng wi ma wa Rachel kimang nu anonkeghe wina qai wa.

¹² Ma Rachel wi khi, “Hi nba shiliwa Rebeka tsa le.” Rachel na bvü sen wa ma ba kiza.

¹³ Laban na ma tssüggüwa tsa cüki zakeya wi bvü sen wa Jakob metu nu ma khenteggü nu ma kimang, nu Jakob ssinu ma jjen wi gho. Jakob na khati sa khe tsü cüki tsüdi pi Laban kekiza wi

¹⁴ Laban na khi, “Ntsakhiwa no isa nu ijjü le.” Jakob na ciwi asha kesü ben wa.

Jakob na Rachel nu Leah manyi ghena Laban Kekulikesa

¹⁵ Laban na Jakob wi kiza, “No ishili ghena le sala ma men nkemi wi ighena mangla nkulila. No nkutimen khaju samvu ben nu?”

¹⁶ Laban nga ghala keni na ben; keqhaiwa nyan na Leah, nu ghanyiwa na Rachel.

¹⁷ Leah ma nyon kekü na ma jiketsü, isala Rachel na ma gwo mehai nu atsimehai.

¹⁸ Jakob na Rachel nen kesalina khi, “No hi yala Rachel yathsü lethu hi nghena amapi tagü no kekuli sa cüben.”

¹⁹ Laban na khineng “Hi ma pi nyu kepa wi kecüwa nyela pi no cüben, hewi hi gweghe benlo.”

²⁰ Rachel yale kesalina Jakob na amapi tagü kekuli sa, tsüna ma ghena ghanan keu ketan ti sa, kepaghenanye ma Rachel nen kesalina.

²¹ Tsaseng wi Jakob na Laban wi kiza, “Matsü cendha, hi yala n-nga yaya thsü yilo.”

²² Tsalina Laban na keshanyi kemishu sa nu anyi tsüdila qhechi.

²³ Isala ma tsü ghaja Rachel nyela Leah ssiwa Jakob cü, nu Jakob na wa ma ssijen.

²⁴ (Laban na ma maghale Zilpa pi ma nga Leah maghale sa thsü.)

²⁵ Ghanenwa Jakob na Leah muya. Ma Laban wi wa nu khi, “No mangkesa na hi wi hati satheng nu? Hi Rachel ghena no kekuli nsa kwe? Mangkesa na hi mechudha nu?”

²⁶ Laban khineng, “Anga ghanyiwa pi keqhaiwa tuwi n-nuwatsü kesa tsüna hewi ithu yen nyele.

²⁷ Hieben lalo, keshanyi kemishu tsü hapta hawa ha yala wa thsü, nu keujüla no hela amapi tagü hi kekuli sathu hi Rachel pi no cüaben.”

²⁸ Jakob na anlo sa, nu keshanyi kemishu hapta tsü kecen seng wi Laban na ma nga Rachel pi Jakob wubvü sa thsüa.

²⁹ (Laban na ma maghale Bilha pi ma nga Rachel maghale sa thsü.)

³⁰ Jakob na Rachel la ssijen, Leah miwi Rachel nen. Tsaseng la ma amapi tagü Laban kekuli sacüa.

Jakob Tsangathu Pvüghakeya

³¹ Leah na ma wuba kaghali pvü khang meya kesa Apvüwa na mukeya wi ma sapi atsanga ben yathsüa, isala Rachel tsü atsanga nmi.

³² Leah na atsa-npvüya nu atsa kesü pvüghaya. Ma khi, “Apvüwa na igükeccü muyadha, nu iwuba na hi nen wa tendha; ” tsalina ma nyan pi Reuben cia.

³³ Ma atsa-npvüya nu atsa kepa wi la kesü pvüghaya. Ma khi, “Apvüwa na atsa ha la pi hi cüdha, kepaghenanye hi kaghali pvü khang meya kesa tsü ma zayadha; ” tsalina ma nyan pi Simeon cia.

³⁴ Tsaseng wi ma atsa-npvüya nu atsa kepa wi la kesü pvüghaya. Ma khi, “Khili nten na iwuba na hi tetsakipfü wa tendha, kepaghenanye hi atsa kecheng pvügha cüdha,” tsalina ma nyan pi Levi cia.

³⁵ Tsaseng wi ma kheneng atsa-npvüya nu atsa kepa wi kesü pvüghaya. Ma khi, “Khilitsü hi Apvüwa seng tendha,” tsalina ma nyan pi Judah cia. Tsaseng wi ma npvüghala.