ADECHHÜ 27 - Kemethajüh (N) (Re-editing) Bible (BSI)

Isak na Sawegü pi Jakob kecü

¹ Isak na khilitsü qhai wa nu ma nyon nmuladha. Ma ma tsa keqhaiwa Esau cichi nu ma wi khi, “Itsa!” Ma nusha, “Hi hewi benle.”

² Isak na khi, “Hi qhai wadha nu wan shüa tendha.

³ Nlamugho nu nlakusü khuya nu wa agheja wi ighena asa kesü gathi pvü gholo.

⁴ Nu hi dsa mvu ketenwa tsü nyankate shvu sengho hi cülo. Hi tsü dsakeya seng wi hi npi keshü wina kesawegü sakhenwa pi no cüten na.”

⁵ Isak na Esau ccüneng keben witsü Rebeka na kinaben. Tsalina Esau na asajügü kewa seng wi

⁶ Rebeka na Jakob wi khi, “Nba na nbi Esau wi hati khi keben hi zayale,

⁷ ‘Ighena asa kesü gathi pvügho nu nyankate shvu sengho hi cülo. Hi tsü dsakeya seng wi hi npi keshü wina Apvüwa tu wina sawegü pi no cüten na.’

⁸ Tsalina itsa, hi khili mangwale no kiza khe no tsü salo.

⁹ Anenithu jawi ma zza asa kemehai keni pathi sen gholo, hi tsüpi nba na nen ketenwa nyankate shvu cü na.

¹⁰ No tsü sen wa ma dsa thsülo, nu ma npi keshü wina sawegü pi no cü thsülo.

¹¹ Isala Jakob na ma jja wi khi, ‘Ibiwa Esau na ma gwo wi assen kejon ben, isala igwo tsü chenchen.

¹² Iba na hi mejjen nan nu hi ma mechu benle kesa chüyathu kesawegü nyela hi ketanla kishen-keshiwa sengho imiwi chiyaben.’ ”

¹³ Ma jja na ma wi khineng “Nghena kishen-keshiwa tsü ya imiwi gho thsülo, itsa; no ijühkina nu wa aneni ssigho hi kekhi ti salo.”

¹⁴ Tsalina ma wa tsüthu khuya nu sengho ma jja cü, nu ma jja na ma ba kenenwa atsse tsü kiden pi ma cü.

¹⁵ Tsaseng wi Rebeka na Esau thsü kemehai ntsa pi ajjen wi ketheng tsü khuya nu tsüthu pi Jakob mphiya thsüa.

¹⁶ Ma aneni hyu pi ma hacü nu ma sun chenchen kesa miwi chi cü.

¹⁷ Atsse nyankate sa ketheng nu amesa gü ketheng tsü saghu pi Jakob kwen wi chi cü.

¹⁸ Tsaseng wi Jakob na ma ba wi wa nu khi, “Iba!” Ma luneng “Hi he wi benle. No itsa thowa nu?”

¹⁹ Jakob na ma luneng “Hi ntsa keqhaiwa Esau le; no hi kekiza ti hi tsü sa senghodha. Donki nu hi nghena asa sen kegho ha dsayalo, isanu no sawegü pi hi cülo.”

²⁰ Isak na khi, “Itsa, no khati nu wan muya nu?” Jakob khineng “NPvüwa Anyiza hi kiqa chi nu hi wan muyale.”

²¹ Isak na Jakob kiza, “Hi tetsaki gholo hi no pa nan na. No ntsakhiwa Esau kwe?”

²² Jakob na ma ba tetsaki wha nu ma ba na ma pa nan nu khi, “Nhhai na Jakob hhai ti, isala nhacü tsü Esau hacü tile.”

²³ Ma Jakob chüshi meyala, kepaghenanye ma hacü na Esau hacü ti assen sha kesalina. Ma sawegü pi cüle keben wi,

²⁴ kheneng keü, “No ntsakhiwa Esau kwe?” Ma khineng. “Hi Esau le.”

²⁵ Isak na khi, “Asa sengholo. Hi tsü dsakeya seng wi sawegü pi no cüden.” Jakob na tsü pie nu ma wi gho, nu kisengtssü pahan sengho ma jjü thsü.

²⁶ Tsaseng wi ma ba na ma wi khi, “Itsa, hi tetsaki gho hi kimang cülo.”

²⁷ Ma ma ba kimang kegho wi Isak na ma thsü kahan nan — isa nu sawegü pi ma cü. Ma khi, “Itsawa, hankedemvu na Apvüwa na sawegü pi alli kesü miwi kechi han kemehai tile!

²⁸ Apvüwa na tang wi akejan pi no cü nu alli sapi ayyi mehai keyawa sa. Ma asu nu kisengtssü kejon pi no kecüwa sa!

²⁹ Mizzatentithu na nmagha sa nu anyi kejon no kekinyiwa sa. No nshilithu tsüdi miwi kekhang sen nu njja shicüthu na no kekinyiwa sa. No kishenkecüthu na kishen-keshi pvükeyawa sa, nu sawegü pi no kecüthu na kesawegü pvükeyawa salo.”

Esau na Isak Kesawegü Kekhie

³⁰ Isak na ma kesawegü khidhi nu Jakob na bvü meyi Esau na asajügü wa nu gho.

³¹ Ma la atsse nyankate saya nu pie nu ma ba wi wa. Ma khi, “Iba, donki nu hi nghena asa sen kegho ha dsayalo, isanu no kesawegü tsüpi hi cülo.”

³² Isak na keü, “No thowa nu?” Ma khineng “Hi ntsa keqhaiwa Esau le.”

³³ Isak na kedheggüwa nu khi, “Tsüna thowa na asa pathi nu shvu sengho hi cü nu? Hi khili hatu no npi kegho wi dsayadha. Hi sawegü pi ma cüdha, nu tsüna anuphanla ma ji sadha.”

³⁴ Esau na ha zakeya wi sashü na magha ntsa qai nu khi, “Iba, no kesawegü pi hi la cülo.”

³⁵ Isak na khineng “Ncünyuwa na gho hi mechuyadha. Ma no kesawegü sen pvüdha.”

³⁶ Esau na khi, “Ma nansü ha keni tughuwa hi mechu bendha. Ma nyan pi Jakob ci jiketsü. Ma hi tssütsewa shei khuya nu khili la hi kesawegü sen bvüdha. No ighena kesawegü kesüla mesha pi ntheng kwe?”

³⁷ Isak na khineng “Hi ma sapi nmiwi apvüwa sa thsüdha, nu ma shilithu tsüdi pi ma maghathu sa thsüdha. Hi asu nu kisengtssü pi ma cüdha. Khili mangla nmidha nu hi nghena mangla sa meyadha, itsawa!”

³⁸ Esau na ma ba wi khie khvu sa; “Iba, no ighena kesawegü kesütanla nmidha kwe? Sawegü pi hi la cüne, iba!” Esau na qai wa.

³⁹ Tsaseng wi Isak ma wi khi, “Tang wi nghena akejan nmidha, nu nghena ayyi lli kemehai la nmidha.

⁴⁰ No njünnu ghena hangben, nu ncünyuwa magha saben, isala no matang keshagha wi no ma kekhang wina pvükhhi bvü shaben.”

⁴¹ Esau na Jakob nanmeghü, kepaghenanye ma ba na kesawegü pi Jakob cü kesalina. Ma ketanla khi, “Iba keshü ghena nonke-ü tsü tsakidha; tsaseng wi hi icünyuwa Jakob pathi cüden.”

⁴² Isala Rebeka na Esau na acho kiden keben tsü zakeya wi Jakob cichi nu khi, “Kinalo, ncünyuwa Esau na no pathi cüle kidenben.

⁴³ Tsalina itsa, hi kekhi ti salo. Shagha nu Haran wi ibaghawa Laban jjen wi bvü walo,

^44-45 Ncünyuwa na ma leben keminu npi kagha chu, nu no ma miwi kuli kechi tsü npi kemali chu no Laban gweghe benlalo. Tsaseng wi hi anyi pahan kesun pi no ssi neng gho thsüaben. Mangsale hi itsa keni qho ghanan kesütan dedi thsüa nu?”

Isak na Jakob Kesun pi Laban wi Kewa thsü

⁴⁶ Rebeka na Isak wi kiza, “Hi Esau wubvü Hitti nyiwa ghena inonhi nu iccükwenshüdha. Keujüla Jakob la Hitti nyi ghala kesü yalethu hi shü kesawala mehaile!”