ADECHHÜ 26 - Kemethajüh (N) (Re-editing) Bible (BSI)

Isak na Gerar wi Kahang

¹ Kheni Abraham tsüwi azeng tsü miwi azeng kepa wi la ayyi ciwi gho. Isak na Gerar wi Filistia kadimiwa Abimelek wi wa.

² Apvüwa na Isak tuwi gho nu khi, “Ejipt wi nwala; ayyi hewi benlo no kekiza pen wi benlo.

³ Hewi hanglo, hi no ssiden nu sawegü pi no cüden. Hi ayyi ha tsüdi pi no nu nshicüthu cüaden, nu hi nba Abraham tuwi khishi ketheng tsü sacen cüden.

⁴ Hi tang wi ghotsithu ti ashicübvügha kejon pi no cüden, nu hi ayyi ha tsüdi pi mathu cüaden. Mizzatentithu tsüdila hi sawegü pi nshicübvüghathu kecü ti sawegü pi mathu la cülo khieben.

⁵ Hi sawegü pi no cüden, kepaghenanye Abraham na ijühkina nu iyenkhukechi tsüdila nie cencu kesalina.”

⁶ Tsalina Isak na Gerar wi hang.

⁷ Ciwi anyithu na ma wubvü cüki kekeü wi ma nzawa tsüna ma tssüggüwa le khi. Ma tsüpi ma wubvü le nkhi, kepaghenanye anyithu na ma pathi nu Rebeka atsikemehaiwa tsü ssiyathu kemessi ghena.

⁸ Isak na ciwi kahang matsü pahan seng wi kadimiwa Abimelek na ajjenkubhi wina ghang chinan Isak nu Rebeka manyi kenenli keben muya.

⁹ Abimelek na Isak cichi nu khi, “Nzawa tsüna nwubvü lela! Mangkesa na ma ntssüggüwa le khiten nu?” Ma khineng “Hi kemeshentsü ma iwubvü le khithu nyu na hi pathiaben le sa.”

¹⁰ Abimelek na khi, “No ikhang miwi mangwa satheng nu? Inyi meshu kesü yazishu nu nwubvü ssijen lethu no ikhang kesazzi pvükesa.”

¹¹ Abimelek na ma nyithu tsüdila satemessi chi, “Anyi kesü le kesü lela anyi hawa nu ma wubvü nkenen kesawa pi shü thsüaden.”

¹² Isak na ciwi allica, nu tsü mapi apvüya ntsa sa nu kheni miwi meza tughu jikayi wwiya, kepaghenanye Apvüwa na sawegü pi ma cü.

¹³ Ma mehai pfüpfü sa nu keban kesü sa shagha.

¹⁴ Ma khaghaneni nu amesüsithu, nu amaghathu kejon keben lina Filistin nyithu ma ghang pi anyonsa wa.

¹⁵ Tsalina mathu na ma ba Abraham na hang keben wi ma maghathu na atssükhang chhü ketheng tsü tsüdi chhübhon.

¹⁶ Tsaseng wi Abimelek na Isak wi kiza, “No ithu diyyiwa ha teshi nu bvülo, kepaghenanye no ikhang miwi khangkidha.”

¹⁷ Tsalina Isak na apen tsü teshi theng nu wa Gerar yyiketijü wi kemnanpen sa nu matsü pahan ciwi hang wa.

¹⁸ Isak na kheni ma ba Abraham hang keben wi atssükhang kechhü tsü Filistin nyithu na Abraham keshü seng wi chhübhon kesathu tsü chhü neng. Isak na atssükhang nyanthu tsüpi kheni ma ba na keci tsü makesü ci neng.

¹⁹ Isak maghathu na ayyiketijü wi atssükhang kesü chhü nu atssü muya.

²⁰ Gerar neni kehiethu na Isak neni kehiethu ssikitagha nu khi, “Atssü ha ikhang jile.” Tsalina Isak na atssükhang tsü nyan pi “Kekitagha” isa cia.

²¹ Isak maghathu na kepa wi la atssükhang kesü chhü nu tsü ghena la kitagha, tsalina ma tsü nyan pi “Nankemeghü” isa cia.

²² Ma apen ketsen wa atssükhang kepa wi kesü chhü neng. Ciwi tsü ghena kicennali mangla nmi, tsalina ma tsü nyan pi “Kekivvü nmi” isa cia. Ma khi, “Khili Apvüwa na ayyi kekivvü nkemi pen wi ikhang ya hangya thsüdha, nu ikhang hewi mehai kayi wa tendha.”

²³ Isak na tsü teshi theng nu Beersheba wi wa.

²⁴ Tsü ghaja Apvüwa na ma tuwi gho nu khi, “Hi nba Abraham Nyiza le; hi no ssiden nmessi lalo. Hi imaghawa Abraham wi khichi ketheng ti sawegü pi no cü nu nshicübvügha sapi ji ntsa sa cüden.”

²⁵ Isak na ciwi kekinyipen kesü sa nu Apvüwa kinyi. Tsaseng wi ma kemnanpen saya nu ma maghathu na atssükhang kepa wi la chhüya.

Isak nu Abimelek manyi Ajühcenkeya

²⁶ Abimelek na Gerar wina ma lenkhiwa Ahuzzath nu ma süpahizi benchüwa Fikol manyi ssinu Isak metu le gho.

²⁷ Tsalina Isak na keü, “No kheni hi nanmeghü nu diyyiwa wina hi kesun pi bvü thsü nu khili mangkesa na hi metule gho ben nu?”

²⁸ Mathu khineng “Apvüwa na no ssiden kesa ikhang na chüben, tsalina ithu jüwi kekishen kesü ben nu ikhang no ssinu cenkethenjüh kesü sa na.

²⁹ Ikhang no nkenen nsala kemehaiwa wina no kesun pi bvü thsü kesa tsüti no la ikhang nkenen nsa lalo. Apvüwa na sawegü pi no cüle kesa khili chütiyadha.”

³⁰ Isak na mathu ghena kemishu kidenchi nu mathu dsajjüya.

³¹ Dhitsüwa ghanen mitu na shagha mathu pahan pahan tuwi kishen. Isak na mathu kemehai sa whalo kiza nu mathu keteshilia.

³² Tsü ghanan Isak maghathu na gho mathu atssükhang kechhü cüki khipi ma kiza. Mathu khi, “Ikhang na atssü muyadha.”

³³ Ma atssükhang nyan tsüpi “Kekishen” isa cia. Tsütinu anyunutiwa Beersheba nyan cishiya.

Esau Wubvü Asangthu

³⁴ Esau na amapi jügha kesa wi Hitti nyi ghala keni Beeri nga Judith nu Elon nga Basemath manyi yaya.

³⁵ Manyi ghena Isak nu Rebeka manyi leben sameshü ntsa sa.