ADECHHÜ 25 - Kemethajüh (N) (Re-editing) Bible (BSI)

Abraham Shicü Kepathu

¹ Abraham na nza kepa wi ma nyan Ketura kesa yaya.

² Ma Zimran, Jokshan, Medan, Midian, Ishbak, nu Shua pvügha pi Abraham cü.

³ Jokshan na Sheba nu Dedan manyi ba, nu Dedan shicübvüghathu na Asshurim, Letushim, nu Leummim.

⁴ Midian tsathu na Efa, Efer, Hanok, Abida, nu Elda. Hathu ha tsüdi Ketura shicübvüghathu.

⁵ Abraham na ma keben tsüdi teshi pi Isak cüa.

⁶ Isala ma hang keben wi ajuthu pi ma wubvü kepa wina mukeya tsathu cü shan. Tsaseng wi ma atsa hathu kesun pi ma tsa Isak wina nishu yyi wiwa bvü thsüa.

Abraham Shü nu pi Kevhü

^7-8 Abraham na qhai ntsa nu amapi 175 wi shü.

⁹ Ma tsa Isak nu Ishmael manyi ma pila kheni Hitti nyi Zohar tsawa Efron yyi sa kegho Mamre na nishuwa Makhpela Lonshiku wi vhüa.

¹⁰ Ayyi tsüna Abraham na Hitti nyithu wi shükeya; Abraham nu ma wubvü Sarah manyi qho pi ciwi vhü.

¹¹ Abraham keshü seng wi Anyiza na sawegü pi ma tsa Isak “Hangbennu hi mukebenwa tssükhang” kete wi hang ketenwa tsü cü.

Ishmael Shicübvüghathu

¹² Sarah maghale Ejipt nyiwa Hagar na pvügha pi Abraham kecüwa Ishmael na

¹³ atsa hathu ben, mathu kepvügha nienu anyan zhütheng: Nebaioth, Kedar, Adbeel, Mibsam,

¹⁴ Mishma, Duma, Massa,

¹⁵ Hadad, Tema, Jetur, Nafish, nu Kedema,

¹⁶ mathu na amizza taghakeni bamyithu, mathu anyu nu keben pen tsüpi mathu nyan ci.

¹⁷ Ishmael na ma kahang mapi 137 wi shü.

¹⁸ Ishmael shicübvüghathu na Assiriya wi kewalen Ejipt na nishuwa ayyi Havila nu Shur manyi jüwi tsü hang. Mathu na Abraham shicübvügha kepathu ssinu temejala hang.

Esau Nu Jakob manyi Kepvügha

¹⁹ Hawa ha Abraham tsawa Isak cüki.

²⁰ Isak na ma kahang amapi jügha wi Laban tssüggüwa (Mesopotamia wi Aram nyi) Bethuel nga Rebeka yaya.

²¹ Rebeka na atsanga nkemi ghena Isak na ma ghena Apvüwa wi khie. Apvüwa na ma kekhie luneng chi nu Rebeka na atsa-npvüya.

²² Ma gweghetsa muya den, nu manyi npi kepvügha wi ma pvünon wi manyi keshunli wa. Ma khi, “Mangkesa na imiwi hati saben nu?” Tsalina ma Apvüwa wi ma jjügi keü.

²³ Apvüwa na ma wi kiza, “Npvü wi mizzatenti keni na ben; No pvügha keten keni tsüna manyi zigheaben. Kesü na kepawa miwi khangki ben; Keqhaiwa na ghanyiwa magha saben.”

²⁴ Ma kepvügha tsü na gho kecu wi ma gweghetsa pvüghaya.

²⁵ Atuwa kepvüghawa na nmieni nu ma gwoben assen kepvü, tsalina ma nyan pi Esau ci.

²⁶ Keniwa kepvügha wi ma Esau ccümeccen ghansen benla, tsalina ma nyan pi Jakob ci. Atsa ha keni pvügha keya tsü wi Isak na amapi achentugho sadha.

Esau na ma Tssütsewa Shei pi Jeükesa

²⁷ Ghanyi ha keni na pvüza shagha nu Esau na nqhonqhe keya tsü ma nen, nu asakejügü chü nyi kesü sa, isala Jakob na ceen nu ajjen wi ketan ben.

²⁸ Isak na Esau nen, kepaghenanye ma Esau sa yathipvü kegho tsü dsaden, isala Rebeka na Jakob nen.

²⁹ Ghanan kesü wi Jakob na akaha shvu ben nan Esau na asajügü wa nu gho. Ma ghamaya

³⁰ nu Jakob wi khi, “Hi picathia tendhale, hi yala awwen tsü pahan dsaya thsülo.” (Tsalina ma pi Edom le cia.)

³¹ Jakob na khineng “No atsa tssütsewa shei pi hi cü lethu hi hapi no cüaben.”

³² Esau na khi, “Hi shüa tendhathu tssütsewa shei tsü ighena kemehai mangwa ben nu?”

³³ Jakob na khineng “Atuwa sa no tsüpi hi cüaben le khishilo.” Esau na kishen nu ma tssütsewa shei tsüpi Jakob cüa.

³⁴ Tsaseng wi Jakob na amesa nu awwentssü pahan pi ma cü. Esau na dsajjüya nu shagha bvüa. Esau na tsütinu ma tssütsewa shei tsüpi ma men nkemi sa.