ADECHHÜ 24 - Kemethajüh (N) (Re-editing) Bible (BSI)

Isak Wubvü Ghena

¹ Abraham na khilitsü qhai wadha, nu Apvüwa na alentagha wi sawegü pi ma cü.

² Abraham na ma keben tsüdi kenonccawa magha keqhai ntsawa wi kiza, “Nkwen pi ipedhi cakhu wi chiyalo.

³ Hi no ya Apvüwa Anyiza nu ayyi sakechiwa nyan wina kishen thsü mvuben; tsüna no hewi Kanaan nyithu jawi itsawa ghena awubvü kessi pi ncü thsüle kesalina.

⁴ Isala no hi kepvügha pen diyyiwa wi wa nu ishilithu jawi itsawa Isak ghena awubvü yapi cülo.”

⁵ Amaghawa na khineng “Keujüla nzawa na ajjen teshi nu hi niesen hewi ngho mvuthu khati sa nu? Hi ntsawa kesun pi no kegho yyiwa wi tsü wa neng thsüala?”

⁶ Abraham na khineng “No itsawa kesun pi ciwi nwa neng thsüla metsilo!

⁷ Apvüwa, atssan Nyiza na iba jjen nu ishilithu yyi wi na hi ssi shhugho kishen nu khi, ‘Hi ayyi hapi nshicübvüghathu cüden.’ Ma nyilo kesun pi ntuwi chi nu no ciwi itsawa ghena awubvü muyaben.

⁸ Keujüla nzawa na no gweghe ngho mvu lethu kekishen hawa ha nmiwi nmi. Isala no katsü sa lela itsawa ssinu ciwi nwa nengla metsilo.”

⁹ Tsalina amaghawa na ma kwen pi ma pvüwa Abraham pedhi keni jüwi chiya nu Abraham na kekhi tsü sale khila kishen.

¹⁰ Abraham keben kenonccawa amaghawa na ma pvüwa ji sunsiesa tagha ssiya nu Nahor na hang keten nyunuti Mesopotamia na aghawa tsü wa.

¹¹ Ma wa cukeya wi sunsiesathu ya anyunuti bendi atssükhang wi akhhutsüdu thsüa. Tsüna minulen wi nzathu na atssü kagha tsü wi sadha.

¹² Ma kekhie sa, “Apvüwa, ipvüwa Abraham Nyiza, nansü hi yala haicenya thsülo, nu no nmaghawa Abraham wi khichi ketheng tsü sa chilo.

¹³ Hi hewi anyunutiwa wi ghalathu na atssü ghaketen tssükhang wi nganben.

¹⁴ Hi mathu meshu kesü wi hati khiden, ‘No nchala nlakhü piesha chi nu hi ya atssü jjüya thsülo.’ Keujüla ma khi, ‘Jjüyalo, nu hi atssü pi sunsiesathu la jjü thsüna,’ isa lethu nza tsüwa ya nmaghawa Isak ghena kessi ketheng tsü saya thsülo. Tsüti sa lethu no nmaghawa wi khichi ketheng tsü sacendha kesa hi chüyaben.”

¹⁵ Ma kekhie npi sadhila Rebeka na alakhü pi ma depfü wi donpvü nu gha. Rebeka na Abraham cünyuwa Nahor nu ma wubvü Milka manyi tsa Bethuel nga.

¹⁶ Ma ghala tegü pvünyimetha pi atsimehai ntsa saben. Ma dula atssükhang wi atssü deya theng nu kheneng shhugho.

¹⁷ Amaghawa na wa ma metu nu khi, “No nchala hi ya nlakhü wi atssü jjüya thsülo.”

¹⁸ Nzawa na khi, “Jjüyalo, kediwa,” nu ma shishi ma depfü wi alakhü piesha pi ghansen nu ma ya jjüya thsüa.

¹⁹ Ma tsü jjükeya seng wi nzawa na khi, “Hi atssü piegho sunsiesathu tsüdila jjüya thsü na.”

²⁰ Ma kaghayila atssü pi asahangthu kejjükhu wi keshuchi khi nu ma lakhü ghacang, nu kheneng bvü wa atssükhang wi atssü de, ma atssü pi sunsiesathu tsüdi jjüya thsüa.

²¹ Apvüwa na ma yala haicenya thsütenla nye khe sala anyi tsüwa na ceen nu nza tsüwa ghangben.

²² Nzawa na tsü sacen keya seng wi anyi tsüwa na suna qei menkedhu khushi pi nzawa mitsan wi chi nu suna khwesa keni pi ma kwen wi chi cüa.

²³ Ma khi, “No thowa nga khe hi kizalo. Nba jjen wi shita ikhang keben pen muya ben ma?”

²⁴ Nzawa na luneng “Iba na Nahor nu Milka manyi tsawa Bethuel le!

²⁵ Ikhang jjen wi amatsi nu amesü tsse kejonla ben, nu nthu ghena apen la ben.”

²⁶ Tsaseng wi anyi tsüwa na kukedu nu Apvüwa kinyi.

²⁷ Ma khi, “Apvüwa sengle, ipvüwa Abraham Nyiza na jühtsentsa sa nu ipvüwa wi khichi ketheng sacen cüdha. Apvüwa na meshonqhe hi ssi ghala ipvüwa shilithu jjen wi chi cüdha.”

²⁸ Ghalawa na bvü sen nu ma jja jjen wi wa ha cüki maben khipi kiza.

²⁹ Rebeka na ma bagha kesü ma nyan Laban na ben, nu Laban na bvü sen nu Abraham maghawa keben pen atssükhang wi wa.

³⁰ Laban na ma tssüggüwa mitsan wi suna qei nu ma kwen wi akhwesa muya nu anyi tsüna mangwale nzawa kiza lakhe ma kekhi tsü zayadha. Ma Abraham maghawa na atssükhang wi ma sunsiesa kete wi ngan keben wi wa.

³¹ Nu khi, “Hi gweghe ijjen wi ghalo. Apvüwa na sawegü pi no kecü nyi kesü. Mangkesa na hewi ngan ben nu? Ijjen wi nghena apen kesü kiden pi theng, nu ciwi sunsiesathu ghena la apen na ben.”

³² Tsalina anyi tsüwa na ajjen wi du, Laban na sunsiesathu khhi piesha nu amatsi nu atsse pi mathu dsa thsü. Tsaseng wi ma wa atssü senghola Abraham maghawa nu ma nyithu ccü bhuya thsü.

³³ Tsaseng wi kedsakejjü sen nu gho nan anyi tsüwa na khi, “Hi khile kebenwa npi kekhi chu hi dsajjü ntenle.” Laban na khi, “Khi nanlo.”

³⁴ Tsalina ma khi wa, “Hi Abraham maghawa.

³⁵ Apvüwa na sawegü pi ipvüwa cü ntsa sa nu ma ya keban sa thsü. Apvüwa na khaghaneni nu anenithu, amesüsi, rükatssü, suna, maghalo nu maghalethu, sunsiesa nu gadathu pi ma cü.

³⁶ Ipvüwa wubvü Sarah na ma keqhai seng wi atsa kesü pvügha pi ma cü, nu ipvüwa na ma keben tsüdi pi atsawa cüdha.

³⁷ Ipvüwa na hi ya ma jühkhukechi tsü kinalo nu hi ya kishen thsüdha. Ma khi, ‘No Kanaan yyi wi itsawa wubvü ghena nza nkessila.

³⁸ Isala iba jjen nu ishilithu wi wa nu itsawa ghena awubvü kesü yapi cülo.’

³⁹ Nu hi ipvüwa keüchi, ‘Keujüla nzawa tsüna hi nie ngho mvuthu khati sa nu?’

⁴⁰ Ma hi luneng ‘Apvüwa, hi keshüthangla ma jühkina ketenwa na ma nyilo kesun pi no gweghe wa nu no ya haicenya thsüden. No ishilithu nu iba theghithu wi itsawa ghena awubvü kesü muyaben.

⁴¹ Ciwi ajjügi kesütan ghena no kekishen ha npvülaya mehai; keujüla no ishilithu wi wa nu mathu nzawa pi no ncü mvu lethu kekishen ha nmiwi nmi.’

⁴² “Hi nansü atssükhang wi kekhie sa, ‘Apvüwa, ipvüwa Abraham Nyiza, hi kekuli hawi haicenya thsülo.

⁴³ Hi hewi atssükhang wi nganben. Ghala kesü atssü gha lethu hi ma wi nlakhü wi atssü pi hi jjüya thsülo isa khiden.

⁴⁴ Keujüla ma anlo khi nu atssü piegho hi sunsiesathu la jjüya thsüthu, ghala tsüwa yala ipvüwa tsawa ghena awubvü kessi kethengwa tsü saya thsülo.’

⁴⁵ Hi ileben wi kekhie sa keben tsü npi kecen wi Rebeka na alakhü pi ma depfü wi donpvü nu gha atssükhang wi atssü deyale sa. Hi ma wi khi, ‘Atssü pi hi jjüya thsülo.’

⁴⁶ Ma shishi ma depfü wi alakhü pieshaya nu khi, ‘Jjüyalo, nu hi atssü pi no sunsiesathu la jjü thsü na.’ Tsalina hi jjüya, nu ma atssü pi sunsiesathu la jjüya thsüa.

⁴⁷ Hi ma keüchi, ‘Nba thowa nu?’ Ma luneng ‘Iba na Nahor nu Milka manyi tsawa Bethuel le.’ Tsaseng wi hi suna qei nu akhwesa pi ma mitsan nu ma kwen wi chi cüa.

⁴⁸ Hi kukedu nu Apvüwa kinyi. Hi Apvüwa seng, ipvüwa Abraham Nyiza, no meshonqhe hi ssigho ipvüwa shilithu jjen wi chi cü, nu hi ipvüwa tsawa ghena awubvü muyadha.

⁴⁹ Khili nthu na ipvüwa ssinu ajühkeyali nu atsentsa sa lethu hi kizalo; nyelethu tsü la khilo, isathu hi khati kesau khe saden.”

⁵⁰ Laban nu Bethuel manyi na khi, “Ha jjügi hana Apvüwa wina kegho ghena ishinyi na mangla kekhiu nyele.

⁵¹ Rebeka na hewi ben na ma ssiya nu walo. Apvüwa na kekhi ti ma yala npvüwa tsawa wubvü saya thsülo.”

⁵² Abraham maghawa na ha za keya wi ma kukedu nu Apvüwa kinyi.

⁵³ Tsaseng wi ma athsü, rükatssü, nu suna yan tsüthu pi Rebeka cü. Ma aju menkedhu pi ma baghawa nu ma jja la cü.

⁵⁴ Tsaseng wi ccüna Abraham maghawa nu anyi ma gweghe ketenthu na dsajjüya nu mathu tsü ghaja ciwi ben wa. Mathu na ghanenwa shagha nu ma khi, “Hi yala ipvüwa wi wha neng thsü yilo.”

⁵⁵ Rebeka baghawa nu ma jja manyi khi, “Ghalawa yala ghanan tagü nyelela tagha ithu gweghe benla thsü nu tsaseng wi ma ya wa thsülo.”

⁵⁶ Isala ma khi, “Ikhang ya nminu thsüla yilo, Apvüwa na hi yala haicenya thsüdha; hi ya ipvüwa wi wha neng thsü yilo.”

⁵⁷ Manyi khineng “Ghalawa na mangwale khiten khe ma ci chinan na.”

⁵⁸ Tsalina mathu Rebeka cichi nu keü, “No anyi ha gweghe wa mvu ben ma?” Nzawa na khi, “Hi waden.”

⁵⁹ Tsalina mathu Rebeka nu ma maghale yala Abraham maghawa nu ma nyithu gweghe wa thsüa.

⁶⁰ Mathu hatinu sawegü pi Rebeka cü; “Ikhang tssüggüwa, no anyi khalatsi jja sakeyawa sa! Nshicüthu ya mathu ghinyi nyunutithu nkakeyawa sa!”

⁶¹ Tsaseng wi Rebeka nu ma maghale manyi kidenya, nu sunsiesa miwi benya nu Abraham maghawa mathu tsüdi gweghe nu wa.

⁶² Isak na “Hangbennu hi mukebenwa tssükhang” ghansha wi tsü gho nu Kanaan yyi acülawa witsü benden.

⁶³ Ma minulen wi alli wi kegoe ten nan sunsiesathu ghoketen muya.

⁶⁴ Rebeka na Isak mu chinan ma sunsiesa miwi na ayyi wi dugho nu

⁶⁵ Abraham maghawa wi keü, “Anyi kesü ka alli wi alentsen sen nu ikhang wiwa ghoketen katsü thowa nu?” Amaghawa na luneng “Ma ipvüwa le.” Tsalina nzawa na athsü khusha pi ma mmi shanbhonya.

⁶⁶ Amaghawa na ma kekuli cüki tsüdi khipi Isak kizachia.

⁶⁷ Tsaseng wi Isak na Rebeka ssinu ma jja Sarah na hang kegho nithsüjjen witsü du, nu Rebeka na ma wubvü sa wa. Isak na Rebeka nen ntsa sa nu ma jja na shü lela ma lebencca sa.