ADECHHÜ 21 - Kemethajüh (N) (Re-editing) Bible (BSI)

Isak Kepvügha

¹ Apvüwa na khichi ketheng ti ma sawegü pi Sarah cü,

² Abraham na keqhai seng wi Sarah na atsa-npvüya nu pvügha pi ma cü. Anyiza na khi kechi ti matsü wi atsawa tsü pvüghaya.

³ Abraham na ma tsawa nyan pi Isak ciya.

⁴ Anyiza yenkhukechi ti Abraham na tazen ghanan wi Isak hyuhan.

⁵ Abraham ma kahang amapi meza wi Isak pvüghaya.

⁶ Sarah na khi, “Anyiza na nonkeghe nu kekiqhe sengho hi cüdha. Ha cüki zakeyathu tsüdila hi nankeqhe ben.”

⁷ Ma kheneng khi, “Thowa na Sarah na atsa ssitenle tsüti Abraham kizaya mehai nu? Isala ma keqhai seng wi hi atsa pvügha pi ma cüdha.”

⁸ Ghanyiwa na qhai shagha, nu ma qhai keshagha wi Abraham na kemishu keti kesü sachi.

Hagar Nu Ishmael Manyi Kesun Pi Bvü thsükesa

⁹ Ghanan kesü wi Ejipt nyiwa Hagar na pvügha pi Abraham kecüwa Ishmael na Sarah tsawa Isak nkhichi saben.

¹⁰ Sarah na manyi muya nu Abraham wi kiza, “Maghalewa ha nu ma tsa manyi kesun pi bvü thsülo. Kepaghenanye maghale hawa tsa na khiela itsa Isak gweghe nu no keben tsü ghongya nben.”

¹¹ Abraham na ha ghena ma leben güccü ntsa sa, kepaghena- nye Ishmael ha la ma tsa.

¹² Isala Anyiza na Abraham wi kiza, “N-maghalewa Hagar nu ma tsawa ghena nleben güccü nsala, Sarah na khatile no kiza lakhe tsüti salo, kepaghenanye hi khi ketheng ti Isak miwi na no ashicübvüghathu ben waden.

¹³ Hi ashicü kejon pi maghale tsawa la cüden, isanu mathu ya mizzatenti kesü saya thsüden. Ma la ntsa kesü ghena.”

¹⁴ Ghanenwa wi mitu na Abraham na kedsakejjü pahan nu atssü pi asahyu khüti wi chi pi Hagar cü. Ma atsawa pi ma ghatsü wi cügi cü nu kesun pi bvü thsüa. Hagar na bvü wa Beersheba ghansha wi kegoedeja wa.

¹⁵ Akhüti wi atssü nmila kesa seng wi ma tsawa pi aghangbhon kesü cakhu wi teshi theng nu

¹⁶ ma wa meter mezau wi tsü donki wa. Ma ketanla ma ccüneng nu khi, “Hi itsawa keshü ghangya nten.” Ma atsawa kaghapi wi donki nu ma qai wa.

¹⁷ Anyiza na ghanyiwa kiqai hhai zaya, nu Anyiza nyilowa tang wina Hagar ccüneng “Hagar, mang ghena nleben güccü ben nu? Nmessi lalo. Anyiza na ghanyiwa kiqai hhai zayadha.

¹⁸ Shagha nu wa ma pieya nu ma kecükeni yalo. Hi ma shicübvüghathu wina mizzatenti keti kesü saya thsüden.”

¹⁹ Tsaseng wi Anyiza na ma nyon shachi nu atssükhang kesü muya thsü. Ma asahyu khüti tsü sen wa atssü yiya nu sengho pahan pi ghanyiwa jjüya thsüa.

²⁰ Anyiza na ma ssiketen ti ghanyiwa na pvüza shagha. Ma Paran ghansha wi hang nu asakejügü kemehai nyi kesü sa.

²¹ Ma jja na Ejipt nza kesü ya pi ma cü.

Abraham nu Abimelek Manyi Ajühcenkeya

²² Tsü tsüwi Abimelek na ma süpahizi miwi kediwa Fikol ssiya nu wa Abraham wi kiza, “No kekuli tsüdi wi Anyiza na no ssiden.

²³ No khiela hi, itsangathu, nu ishicübvüghathu mechu nbenle khi Anyiza tuwi na kishenlo. Hi njühkina kegho ti no la hi nu no hang keben diyyiwa ha jühkina benle khishi chilo.”

²⁴ Abraham na khi, “Hi kishenben.”

²⁵ Abimelek maghathu na atssükhang kesü nkaya kesalina Abraham na tsü khipi Abimelek kiza.

²⁶ Abimelek na khi, “Thowa tsüti sa khe hi nchüle. No tsü cüki pi hi nkiza, nu hi khili ha atuwa tsü zayaben.”

²⁷ Tsaseng wi Abraham na khaghaneni nu mesüsi pahan pi Abimelek cü, nu manyi jüwi ajühcenya.

²⁸ Abraham na ma neni jawi ma zza tagü kupi ma kepa saya,

²⁹ nu Abimelek na ma keü, “No mangkesa na tsüti saben nu?”

³⁰ Abraham na khineng “Aneni zza tagü ha khuyalo. No ha yalethu majjügi hi atssükhang ha chhüle.”

³¹ Tsalina apen tsüpi Beersheba le khi, kepaghenanye apen ciwi manyi qho kekishen sa.

³² Manyi Beersheba wi kekishen kesa seng wi Abimelek nu Fikol manyi Filistia wi wa neng.

³³ Tsaseng wi Abraham na Tamarisk ton kesü pi Beersheba wi sheng nu anuphan Nyiza Apvüwa kinyi.

³⁴ Abraham na matsü kesie Filistia wi hang.