ADECHHÜ 19 - Kemethajüh (N) (Re-editing) Bible (BSI)

Sodom Nyithu Kesami

¹ Tsü ghanan minulen wi tangnyilo keni Sodom wi gho nan Lot na anyunuti khweti wi donki benla. Ma manyi muya meyi bvü wa manyi metu. Ma manyi tuwi kukedu

² nu khi, “Kediwa keni, hi nshinyi ketsikina tenle, ijjen wi gholo. Nshinyi ccü bhuya nu shita ijjen wi benlo. Ghanen wi mitu na shagha nu waya mehai.” Isala manyi luneng “Nye le, ishinyi shita anyunuti lentonti hawi benden.”

³ Ma mataghang manyi ci khvu sa, nu manyi ma gweghe ma jjen wi wha. Lot na amaghathu kiza nu amesa gü thsü, nu kijünyi ghena kedsakejjü kemehai kiden thsü. Kuggü cenkeya seng wi manyi na dsajjüya.

⁴ Kijünyi keni awe wi npi kedu wi Sodom nyithu na wa ajjen vüya. Anyunuti wi anyi tsüdi, ghanyi keqhai ciwi gho.

⁵ Mathu Lot cichi nu keü, “Shita njjen wi benle gho keben anyi keni tsü khiewa ben nu? Manyi ssi shhugho ikhang cülo.” Sodom nyithu na tsü keni ssimehaile sa.

⁶ Lot na akhemi wi shhu nu ajjenkhen sha.

⁷ Ma mathu wi kiza, “Ipvüshangthu, gheshighena kekuli hati nsa lalo; hi nthu wi khieben!

⁸ Ghangchilo, hi inga pvünyimetha keni ben. Hi wa manyi ssi shhugho nthu cüa na, nthu manyi pi mangwa samvu khe sayalo. Isala anyi ha keni miwi tsü mangla nsa lalo; manyi ijjen wi kijünyi ghaben, nu hi manyi khwe meyathu yishü.”

⁹ Isala mathu khi, “Ikhang wina bvülo, no asang! No thowa lenu ikhang mangwa salo kiza ben nu? Ikhang wina bvülo, nye lethu ikhang na manyi miwi la nmiwa nkemehai sa cüben.” Mathu na Lot deshen pi aseng wi chi nu ajenka pakhhile wa.

¹⁰ Isala meshu keni tsüna nduku wi ben nu Lot zan neng pi ajjen non wi chiya, nu ajenka khenya.

¹¹ Tsaseng wi manyi amei wi kebenthu tsüdi sapi anyon nmu thsüla nu ajenka bha kevüli wa.

Lot na Sodom Nyunuti Keteshi

¹² Anyi meshu keni tsüna Lot wi kiza, “Keujüla no anyi kepa wi — atsangathu, ndemyithu, nyelela nshilithu kepa lela anyunuti hewi hang ben lethu mathu ya hewi na bvü thsülo.

¹³ Kepaghenanye ishinyi na apen ha yasa tendha. Apvüwa na nyu anyi hathu shun nu kethen hhai zaya nu Sodom yasale ishinyi kesun chile.”

¹⁴ Tsaseng wi Lot na ma demmi sale kebenthu wi wa nu khi, “Shagha nu wan apen ha teshilo, Apvüwa na anyunuti ha yasale bendha.” Isala mathu na ma ponsa benle meshen wa.

¹⁵ Atsathang wa keten pang wi nyilo keni na Lot ya kaghaji thsü nu khi, “Wanlo, nwubvü nu n-nga keni ssinu bvülo, anyunuti ha keyasa wi nthu kahang ndedile kesalina.”

¹⁶ Lot na kesütu wa. Isala Apvüwa na ma nantizenya, tsalina anyi keni na ma, ma wubvü, nu ma nga keni kwen zanya nu anyunuti wina shhua.

¹⁷ Nyilo kesü kekhina, “No hangyale kesalina bvülo! Aseng wi n-ghang nengla nu yyiketijü wi khiela n-ngan lalo. Nthu nmecang ghu thsüle kesalina bvü sen nu ayikha wi walo.”

¹⁸ Isala Lot na luneng “Nyele, kediwa keni, ikhang ya tsüti nsa thsü lalo.

¹⁹ No hi kenen sachi nu hi kahangli hangsha cüdha. Ayikhathu tsüna alensie mtsü, hi wa tsü npi kecu jü agükeccü na imiwi gho lethu hi shüaben.

²⁰ No anyuti kizzau katsü mu ben ma? Tsüna akete le. Hi yala ciwi wa thsülo— tsüna apen kizzau nu hi kahangli hangsha yaben.”

²¹ Nyilowa na luneng “Anlo, no kekhie sa cü na. Hi anyuti tsü yasa nben.

²² Kaghaji bvülo! Hi no wa tsü npi kecu chu mangla sa nben.” Lot na anyuti tsüpi kizzau le kekhi ghena tsü nyan pi Zoar le cia.

Sodom Nu Gomorrah Nyunuti Kededi

²³ Lot na wa Zoar cukeya wi aghani na shhughoa.

²⁴ Apvüwa na zuli anni tsangho pi Sodom nu Gomorrah nyunuti keni miwi chi

²⁵ nu anyunuti keni nu yyiketijü maben, anyunuti wi kahang nyithu nu ayyi wi shigü keten tsüdi yasa pia.

²⁶ Isala Lot wubvü na aseng wi ghangchi nu amcü tsen ceng wa.

²⁷ Dhitsüwa ghanen mitu Abraham na bvü sen nu ma Apvüwa tuwi kangan pen witsü wa.

²⁸ Ma wa Sodom, Gomorrah nu yyiketijü maben ghangchi nan ayyi ciwi anniqhe ntsa kesa nikhu ti shhugho keben muya.

²⁹ Isala Anyiza na yyiketijü wi Lot na hang keten nyunuti keni tsü keyasa wi ma Abraham meshenya nu Lot yala bvü shhu yathsüa.

Moab nu Ammon Nyithu Hang keshagha

³⁰ Lot na Zoar wi hang kemessi ghena ma nu ma nga keni mathu na apen ketsen sen nu yyishiphon wi wa alonshi ku kesü wi hang wa.

³¹ Anga keqhaiwa na ma pvünonwa wi kiza, “Ishinyi ba na qhai wadha, ayyi he wi anyi thola ishinyi yaya nu ishinyi tsanga mukeya nmi.

³² Ghalo, ishinyi ba ya ma dinaya thsü nu ishinyi ma ssijen nu ma wina ashicü muya na.”

³³ Tsü ghaja manyi kisengtssü pi ma jjü thsü, nu anga keqhaiwa na ma ba ssijen. Isala ma adina ntsa sa kesalina ma nchü.

³⁴ Dhitsüwa wi anga keqhaiwa na ma pvünonwa wi kiza, “Hi khija iba ssijendha; shita la ma ya adinaya thsü nu no wa ma ssijenlo. Isanu ishinyi qho ishinyi ba wina ashicü muya na.”

³⁵ Tsalina tsü ghaja la manyi ma ya adinaya thsü nu anga ghanyiwa na wa ma ba ssijen. Isala ma adina ntsa sa kesalina ma nchü.

³⁶ Tsütinu Lot nga keni qho manyi ba wina atsa-npvüya.

³⁷ Anga keqhaiwa na atsa kesü muya nu ma nyan pi Moab ciya. Ma nansü Moab nyithu baqhai.

³⁸ Anga ghanyiwa la atsa kesü muya nu ma nyan pi Benammi ciya. Ma nansü Ammon nyithu baqhai.