ADECHHÜ 11 - Kemethajüh (N) (Re-editing) Bible (BSI)

Babilon Ducükezhü

¹ Adechhü wi ayyi nyi mabenla ajühjja kesü nu ajüh la kesütan.

² Mathu nishu wina kegoe sen nu Babylonia deshentijü kesü wi ghoya nu ciwi hang wa.

³ Mathu khokho wi khi, “Ghalo, ithu na yimecanglon sa nu mecang kemehai saa na.” Isanu mathu na yimecanglon saya nu zententssü pi tsüthu zenghuya.

⁴ Mathu khi, “Ithu anyunuti kesü sa nu ciwi aducü zhü senki akulu cu cü na, isanu tsüpi ithu nyan kemehai sa nu ithu ayyi tsüdi wi bvüzighe nwala na.”

⁵ Tsaseng wi Apvüwa na dughola anyithu na sa ketheng anyunuti nu aducü tsü ghang,

⁶ nu ma khi, “Khili anyi hathu ha tsüdila kesü nu mathu ajühjja la kesütan khiben; hawa ha mathu mangwa samvu ben khe tsü ketegü bendha. Mathu wan nu mangwa samvu ben khe tsü saya mehaidha.

⁷ Tsalina ikhang cüla mathu jüh tsü pakivvü pi nu mathu ya khokho jühjja kekhi tsü nchü thsüla na.”

⁸ Tsalina Apvüwa na mathu jügü zighe pi ayyi tsüdi wi chi nu mathu anyunuti tsü nsa thsüla.

⁹ Anyunuti tsüwa nyan na Babilon, kepaghenanye Apvüwa na ciwi anyithu ajühjja pakivvü pi nu anyithu ya ayyi tsüdi wi bvüzighe wa thsüa.

Shem Shicüthu

¹⁰ Hathu hana Shem shicübvüghathu. Atssükedon seng amapi keni Shem kahang mapi 100 wi ma atsa kesü Arpakshad muya.

¹¹ Tsaseng wi ma amapi 500 hang nu atsanga kepa wi la muya.

¹² Arpakshad na amapi 35 wi atsa kesü Shela muya,

¹³ ma tsaseng wi amapi 403 hang nu atsanga kepa wi la ben.

¹⁴ Shela na amapi 30 wi atsa kesü Eber muya,

¹⁵ ma tsaseng wi amapi 403 hang nu atsanga kepa wi la ben.

¹⁶ Eber na amapi 34 wi atsa kesü Peleg muya,

¹⁷ ma tsaseng wi amapi 430 hang nu atsanga kepa wi la ben.

¹⁸ Peleg na amapi 30 wi atsa kesü Reu muya,

¹⁹ ma tsaseng wi amapi 209 hang nu atsanga kepa wi la ben.

²⁰ Reu na amapi 32 wi atsa kesü Serug muya,

²¹ ma tsaseng wi amapi 207 hang nu atsanga kepa wi la ben.

²² Serug na amapi 30 wi atsa kesü Nahor muya,

²³ ma tsaseng wi amapi 200 hang nu atsanga kepa wi la ben.

²⁴ Nahor na amapi 29 wi atsa kesü Tera muya,

²⁵ ma tsaseng wi amapi 119 hang nu atsanga kepa wi la ben.

²⁶ Tera na ma kahang amapi 70 seng wi Abram, Nahor, nu Haran ma kecheng ba saya.

Tera Shicübvüghathu

²⁷ Hathu hana Abram, Nahor, nu Haran mathu ba Tera shicübvüghathu. Haram na Lot ba,

²⁸ Haran na ma ba hang keben tsüwi ma nyu Ur, Babilon yyi wi shüa.

²⁹ Abram na Sarai yaya, nu Nahor na Milka yaya. Haran na Milka nu Iska manyi ba.

³⁰ Sarai na atsanga nmi.

³¹ Tera na ma tsa Abram, Haran tsa Lot, nu ma cünyiewa Abram wubvü Sarai ssiya nu mathu Babylonia wi Ur nyunuti tsü teshi theng nu Kanaan yyi wi wa. Mathu Haran yyi kecu wa nu ciwi hang wa.

³² Tera na ciwi ma kahang amapi 205 wi shüa.