2 THESSALONIKANYI 1 - Kemethajüh (N) (Re-editing) Bible (BSI)

Ajühtuwa

¹ Paul, Sila, nu Timothi wina pi Thessalonika wi ithu Bawa Anyiza nu Apvüwa Jisu Khrista kemehu nyithu kecü:

² Ithu Bawa Anyiza nu Apvüwa Jisu Khrista ya nanketizen nu kecca pi nthu kecüwa salo.

Khrista Gho neng Keten wi Ajühkekaghaten

³ Icünyuthu, ikhang na matsü tsüdi wi la nthu ghena Anyiza nsengthu yishü ben. Ikhang na tsüti kesa-u, kepaghenanye nthu kenondi na shigü kayi ntsa saben nu nthu khokho ketizenli tsüna di kayi ben.

⁴ Tsalina ikhang na nthu ghena Anyiza kemehuthu wi kapvü den. Nthu na khili metu keben ti kemeten-kemesha nu ketizen kesa tsüdi wi kethankehi nu nondiki ben keten ghena ikhang na kapvü den.

⁵ Ha tsüdi wi Anyiza jühkekaghaten tsüna meshon kesa chüya nu tsüna nthu sa pi nthu na tsü ghena ketizen sa keben Kadiyyi wi tsü kewa qo saya thsüben.

⁶ Anyiza na kemeshonwa tsü saben; ma ketizen kesa sengho nthu ya ketizen sa thsü kebenthu cüben,

⁷ nu ma kecca pi nthu ketizen sa kebenthu nu ikhang la cüben. Apvüwa Jisu na ma nyilo kekhangthu ssinu tang wi na kegho wi ma ha saben,

⁸ annikeqhe sen nu ithu Pvüwa Jisu cüki Jühtheü Kemehaiwa tsü nkina nu Anyiza meya mvula kesathu meten cüden.

⁹ Mathu na anuphan keyasa kemeten-kemesha wi ketizen sa, Apvüwa tu wi nu ma nyankethang kekhang wina mathu khu pi,

¹⁰ ma nyithu nu nondi ketenthu tsüdi wi anyankethang nu kinyikü muyale gho keten tsathang wi nthu la mathu jawi benden, kepaghenanye nthu na ikhang ketsijüh pi nthu kekiza tsü nondiyadha.

¹¹ Tsalina ikhang na keshüthangla nthu ghena khie benden. Ma nthu ci pi hanglo kesa kahang qo saya thsüle kesalina ikhang na Anyiza wi khie. Ma kekhang pi pong cü nu nthu kemehaiwa kesa mvu nu nthu kenondi kekuli tsüdi sacen keyawa salo.

¹² Hati nu ithu Nyiza nu Apvüwa Jisu Khrista nanketizen ghena nthu ma wina nu nthu wina ithu Pvüwa Jisu Khrista nyankethang muyaben.