2 SAMUEL 6 - Kemethajüh (N) (Re-editing) Bible (BSI)

Cenkethenjüh Khitsonwa tsü sen nu Jerusalem wi kegho

¹ David na kheneng kuti Israel süpahi kemehai ntsathu hazar changha cighu chi,

² nu mathu ssinu Judah yyi Baala wi wa ciwi Anyiza Cenkethenjüh Khitson, Apvüwa Kekhang ntsawa nyan wina cherubim ma kadipen miwi kebenwa tsü senghole kesalina.

³ Mathu na yyishiphon wi Abinadab jjen wina tsüpi amesü gari ketheü kesü miwi chiya. Abinadab tsa keni Uzza nu Ahio manyi na amesü gari tsü ssi,

⁴ Ahio na tsü tuwi lentsen.

⁵ David nu Israel nyithu tsüdila mathu ghechhen sala Apvüwa kinyikü wi nashü nu akhwisa. Mathu na harp, lair khou, apha kihhe, nu lezza khu pi kekhali.

⁶ Mathu na Nakon niegi wi kegho wi amesü süpon na cüchen chi, nu Uzza na wala Cenkethenjüh Khitson tsü ghansenya.

⁷ Apvüwa Anyiza na wan Uzza miwi aghepvüya nu ma pathia kepaghenanye ma tsü kinyikü nkesalina. Uzza na ciwi Cenkethenjüh Khitson kete wi shü,

⁸ nu tsü nten na apen tsüpi Perez Uzza cia. Apvüwa na ma lebenketsu wi kemeten pi Uzza cü kesalina David na aghepvü ntsa sa.

⁹ Tsaseng wi David na ma messiya nu Apvüwa wi khi, “Hi khili khatinu Cenkethenjüh Khitsonwa tsü sen nu wa nu?

¹⁰ Tsalina ma tsü sen nu Jerusalem wi kewawa nyela alen kepawa na tsü sen wa Gath nyunuti wi kahangwa anyi kesü Obed Edom jjen wi chia.

¹¹ Tsüna ciwi asha kecheng ben wa, nu Apvüwa na sawegü pi Obed Edom nu ma theghi cü.”

¹² Kadimiwa David na Cenkethenjüh Khitsonwa ghena Apvüwa na sawegü pi Obed Edom theghi nu ma keben tsüdi miwi chile kesa zaya; tsalina ma kemini keti kesü sa nu Obed jjen wi Cenkethenjüh Khitsonwa tsü pie nu Jerusalem wi wa.

¹³ Anyithu na Cenkethenjüh Khitson tsü pie nu acükha tugho wakesa seng wi David na mathu pi ngan thsü nu ma amesü süpon kesü nu ma zza kekunon kesü pi ahhansha sa.

¹⁴ David na linen kesütan pi ma geshi qhanpvü nu Apvüwa kinyikü wi ma piketsü sala nashü.

¹⁵ Tsalina ma nu Israel nyi tsüdila anonkeghe sala jisha nu tutuwa khou nu Cenkethenjüh Khitson tsü sen nu Jerusalem wi ghoa.

¹⁶ Akhitson tsü sen nu anyunutiwa non wi kedu wi Saul ngawa Mikhal na ajjenkubhi wina ghangchi nan Kadimiwa David na Apvüwa tuwi nashü nu kephenki keben mu; nu ma leben wina David nankeqhe.

¹⁷ Mathu na Akhitson tsü sengho David na Nithsüjjen wi ma pen kiden ketheng witsü chia. Tsaseng wi David na mecang pi kekinyi nu kecca ghena kekinyi sapi Apvüwa cü.

¹⁸ Ma ahhansha sapi kekinyithu tsü kesacen seng wi Kekhang ntsawa Apvüwa nyan wina sawegü pi anyithu cü,

¹⁹ nu kedsakejjü pi mathu tsüdi gishü cü. Ma amesa kesü, asa kegü sakü kesü nu kemeshentsse bi keqen pahan pi Israel wi nza nu npvüza kesüsü tsüdila cü. Isanu anyi tsüdila ajjen wi wha.

²⁰ Tsaseng wi David na ma theghithu shalom sale ajjen wi wha nan Mikhal na shhugho ma metu. Nzawa na khi, “Israel Kadimiwa na nansü ma ketanla ma nyankethang ntsa sadha! Ma kejüphon kesü ti njüghela ma kekhu wi kedithu maghalethu tuwi kemissü sale!”

²¹ David na luneng, “Hi nashü pi Apvüwa na nba nu ma theghi mithon wina hi kessi pi ma nyi Israel ccüli sa thsü kesawa kinyikü. Nu hi hela Apvüwa kinyikü wina nashüden,

²² nu hi tsümiwi la hi ketanla inyankekinyen saden. No hi mangla nyele meshen benlaya mehai, isala ghalathu tsüna hi meshen pi misi ntsawa sabenle!”

²³ Saul ngawa Mikhal na atsanga nmila shü.