2 SAMUEL 4 - Kemethajüh (N) (Re-editing) Bible (BSI)

Ishbosheth Pathikea

¹ Saul tsawa Ishbosheth na Hebron wi Abner pathidhale kesa zakeya wi ma messi nu Israel nyi tsüdila leben dhendhen sa wa.

² Ishbosheth na yilakeshu zi wi ccülikesa keni na ben. Tsüna Benjamin mizza wi Beeroth wina keghowa Rimmon tsa Baanah nu Rekhab manyi. (Beeroth pi Benjamin yyi wiwa sichiden.

³ Adechhü na ciwi hang keshaghathu na bvü sen nu Gittaim wi wa nu mathu na khilila ciwi hangben.)

⁴ Saul shicübvügha kepa wi kesü na Jonathan tsawa Mefibosheth, Saul nu Jonathan manyi pathi kesa witsü ma kahang mapi manga saben. Jezreel nyunuti wina manyi keshü jühtheü tsü zakeya wi ma kenonccawa na ma pie nu bvüa; isala nzawa ma kenonccawa na kaghaji ntsa kesalina ma pi ayyi wi khuli thsü nu ma ccü nmehaila.

⁵ Rekhab nu Baanah manyi na Ishbosheth jjen wi wa, nu Ishbosheth na ghanan lapvü khhali keben wi manyi na gho cuya.

⁶ Nzawa na ajenka wi awhengsu meshü keben wi kumvu nu jen wa, tsalina Rekhab nu Baanah manyi na kuthila nduku wi du.

⁷ Manyi na Ishbosheth kejenpen wi du nan ma jenchi ntsa benla nu manyi na ma pathia. Manyi na ma li wiya nu ghaja thangthang Jordan Yyiketijü tsü pvüdhila lentsen gho.

⁸ Manyi na ali tsüpi Hebron wi Kadimiwa David cü nu ma wi khi, “Hawa ha no pathiale kesawa Saul tsa Ishbosheth li le. Apvüwa na nansü hi kadimi ajenkebenwa yala Saul nu ma shicübvüghathu miwi ajukhiya thsüdha.”

⁹ David na manyi luneng, “Hi hang kebenwa Anyiza na kemessi tsüdi wila hi hangsha kecüwa nyan wina kekishen kesü saben!

¹⁰ Nyilo kesü Ziklag wina hi wi keghowa na Saul keshü cüki pi hi kiza, nu ma tsüna jühtheü kemehai sengho tenle meshen. Hi ma ghanya nu pi shü thsüa. Tsüwa tsüna hi ma jühtheü kemehai sen kegho kutimen pi ma cü!

¹¹ Anyi nkemehai na anyi kesami nkemi kesü na ma jjen wi jen keben pathi kesa ghena tsü miwi khati nmehaiki sadha nu! Nshinyi na ma pathi kesa ghena hi khili nshinyi miwi ajukhiya nu ayyi ha miwi nshinyi pi nmi thsü laden!”

¹² David na ahza khuchia, nu ma süpahithu na Rekhab nu Baanah manyi pathi nu manyi kwen nu manyi ccüthu dhiya, nu mathu na tsüpi Hebron wi acüceng kete wi dügüa. Mathu na Ishbosheth li tsü khusen wa Hebron wi Abner shüjjen wi vhüa.