2 SAMUEL 3 - Kemethajüh (N) (Re-editing) Bible (BSI)

¹ Saul theghi kekiqa süpahithu nu David kekiqathu jüwi aghikesa na matsü kesiela sa. David na zü pfüpfü sathu ma ssisa kebenthu na nkhang pfüpfü sa wa.

David Tsathu

² Atsathu tugho mathu kepvügha kesennie kesa hathu ha Hebron wi pvügha pi David kecü: Ammon, ma jja na Jezreel wina keghowa Ahinoam;

³ Khileab, ma jja na Karmel wina keghowa kheni Nabal wubvü kesawa Abigail; Absalon, ma jja na Geshur wi kadimiwa Talmai nga Maaka;

⁴ Adonijah, ma jja na Haggith; Shefatiya, ma jja na Abital;

⁵ Ithream, ma jja na Egla. Atsa hathu ha tsüdi Hebron wi pvüghakeya.

Abner na David Gwegheyakea

⁶ David süpahithu nu Saul theghi kekiqathu jüwi aghisa, Abner na Saul kekiqathu ja wi khang pfüpfü shagha.

⁷ Ghanan kesü wi Saul tsawa Ishbosheth na Abner na ma ba wubvü meshibvüwa Rizpa, Aia ngawa ssikejen ghena ma kimenni.

⁸ Ishbosheth jüh ghena Abner na aghepvü ntsa sa nu khi, “No hi Saul matsa benle meshen ben kwe? No ntsakhiwa hi Judah kekuli sabenle meshen ben kwe? Adechhü na shhugho nansü kecu hi nba Saul, ma cünyuthu, nu ma pvüshangthu jühkeya wi bengho, nu hi David yala nthu chaya thsü nsa; isala nansü nza kesü tuwi kesazzi mukeya ghena no hi kimenni benla!

^9-10 Apvüwa na David wi khishi ketheng, ma Saul nu ma shicübvüghathu wina kadiyyi tsü senbvü nu David pi Israel nu Judah diyyi keni katen kesü na wala pahanwa kecu miwi kadimiwa sa thsüaden. Khili hi ha sapi cen thsü nsa lethu Anyiza na hi pi shü thsü kesawa salo!”

¹¹ Ishbosheth na Abner messi ntsawa sa nu ajüh kesüla nkhila.

¹² Tsü tsüwi David na Hebron wi ben, Abner na nyilothu kesun pi ma wi chi nu khi thsü, “Thowa na ayyi hawa miwi kekhang senten nu? Hi ssinu cenkethenjüh kesü sayalo, nu hi no kiqa nu Israel tsüdi lepi no wiwa chiya na.”

¹³ David na luneng, “Mantsadha! Hi ajjügi kesü wina no ssinu cenkethenjüh kesü saden; no khathansha wi hi metule gho khe, no Saul nga Mikhal tsü ssinu hi wi nghothu yishü.”

¹⁴ David la nyilothu kesun pi Ishbosheth wi chi nu khi thsü, “Iwubvü Mikhal pi hi cü nenglo. Hi ma yale kesalina Filistinthu hyu meza han pi cütheng.”

¹⁵ Tsalina Ishbosheth na Mikhal wuba Laish tsa Paltiel wina Mikhal ssiya.

¹⁶ Paltiel na wala Bahurim nyuti kecu wi nzawa senniela qai. Isala Abner na ma wi khi, “Ajjen wi wha nenglo,” kiza ccüla ma wha neng.

¹⁷ Abner na Israel ccülikesathu wi wa nu mathu wi khi, “Matsü kesiela nthu na David pila nthu kadimiwa sa thsü mvuthi ghodha.

¹⁸ Khili ha nthu ghena matsü kemehai sadha. Apvüwa na hati khiketheng tsü meshenchilo, ‘Hi imaghawa David sen nu Filistinthu nu mathu ghinyi kepathu kwen wi Irsael nyithu kekashayaden.’”

¹⁹ Abner na ajühkhi pi Benjamin mizza nyithu la kiza, nu tsaseng wi Benjamin nu Israel nyithu na mangwa sale cendha khe pi David kizale Hebron wi wa.

²⁰ Abner na anyi ngwe ssinu Hebron wi David wi kegho wi David na mathu ghena kemishu kesü sa.

²¹ Abner na David wi kiza, “Hi khili wala Israel nyithu tsüdi lepi no, hi kadimiwa wi chiyaden. Mathu na no pi kadimiwa saya nu tsaseng wi no nleben wi nmvu keben ti no ayyi maben miwi kekhang senyaben.” David na apvü-nkesa jühkhi pi Abner kiza nu ma kesun pi bvü thsüa.

Abner Pathikea

²² Matsü pahan seng wi Joab nu David kekhu wi kedi kepathu na yilashu wa nu atsanqai shukeya kejon sen nu gho neng. Isala Abner na ciwi Hebron wi David gweghe nmi, kepaghenanye David na apvü-nkesa jühkhi pi ma kiza nu kesun pi bvü thsüdha.

²³ Joab nu ma nyithu na gho cukeya wi Abner na kadimiwa David wi gho nu David na apvü-nkesa jühkhi pi ma kiza nu kesun pi bvü thsüdhale kesa nyu na ma kiza.

²⁴ Tsalina Joab na kadimiwa wi wa nu ma wi khi, “No khati sadha nu? Abner na no wi kegho wi no khati kesa na ma kesun pi bvü thsüdha nu?

²⁵ Ma hewi no mechule gho nu no kekuli tsüdi nu no kewapen tsüdi chüyale ghole. No tsü chütiben!”

²⁶ David teshi nu kebvü seng wi Joab na wala Abner ssigholo nyilothu kesun chi, nu mathu na wa Sira Tssükhang wina ma ssineng gho; isala David na tsü cüki mangla nchü.

²⁷ Abner na gho Hebron cukeya wi Joab na kekuthi jüh pi ma kiza keten ghe sala ma ssinu kaghapeng jenka wi wa nu ciwi ma pvü kecun pi shü thsüa. Abner na Joab cünyuwa Asahel pathi kesalina ma la ma pathidha.

²⁸ David na jühtheü tsü zakeya wi khi, “Hi nu ikekhu wi kebenthu na Abner kepathi ha ghena kesazzi mangla nmi le kesa Apvüwa na chüben.

²⁹ Tsü ghena kemeten na Joab nu ma theghi tsüdi miwi kebenwa salo! Abvüye tsüdi wila ma theghi ja wi anyi pahan na agwotssü keji nyelela agükedsanaa nyelela nza kekuli ketan kesa qo nyelela aghi wi pathi nyelela kedsakejjü nkemi na kebenwa salo!”

³⁰ Tsalina Joab nu ma cünyuwa Abishai manyi na Abner na Gibeon wi aghikesa wi manyi cünyuwa Asahel pathi kesa ghena ma miwi ajukhiya.

Abner pi Kevhü

³¹ David na Abner ghena Joab nu ma nyithu na mathu thsümeni mezüqhe, aleshithsü mphi, nu anongülo kesa ahza khuchia. Keshü ssikechi wi Kadimiwa David la akamang-nku tsü nie wa.

³² Abner pi Hebron wi vhüa, nu kadimiwa na ashüjjen wi misikhhali qai, nu anyi tsüdila tsü makesü sa.

³³ David na Abner ghena anonkegü khwi ha sa: “Mangkesa na Abner na kejüphon kesü ti shü nu?

³⁴ Ma kwen nu ma ccüthu na bhen ntheng; Ma gheshighenathu na kepathi ti shüdha!” Nu anyithu na kheneng ma ghena qai.

³⁵ Ghanan thangthang anyithu na David ya pala pahan dsaya thsüle sa, isala ma kekishen kesü sa, “Keujüla hi atsathang ha npi kecen wi pala pahan dsa lethu, Anyiza na hi pi shü thsü kesawa salo!”

³⁶ Mathu tsüdila tsü mu pi mathu nen ntsawa sa. Ntsakhiwa, kadimiwa na mangwa sachi khe anyithu na tsü nen.

³⁷ David nyithu nu Israel wi anyi tsüdila Abner kepathi witsü kadimiwa na ma kemeshen nyele kesa chüben.

³⁸ Kadimiwa na ma kekhu wi kedithu wi khi, “Nansü ha Israel wi ccülikesa kedi kesü na shüben kesa nthu na nchü kwe?

³⁹ Anyiza na kessikeya kadimiwa hi lela nansü nkhang laben. Zeruiya tsathu ha ighena yasayala mtsüle. Gheshighenathu mathu na kemu-u ti Apvüwa na kemeten pi mathu kecüwa salo!”