2 SAMUEL 24 - Kemethajüh (N) (Re-editing) Bible (BSI)

David na Nyanzhüghu kesa

¹ Matsü kepa wila kuti Apvüwa na Israel miwi aghepvü nu ma David yala agükeccü sengho mathu miwi chi thsü. Apvüwa na ma wi khi, “Wala Israel nu Judah nyithu si nanlo.”

² Tsalina David na ahza pi süpahizi benchüwa Joab cü: “No kedithu ssiya nu wala diyyiwa kesü na wa pahanwa kecu wi Israel mizzathu tsüdi wi anyithu si nanlo. Hi anyi khaju na ben khe chüya mvuben.”

³ Isala Joab na kadimiwa luneng, “Njenkeben Kadimiwa, Apvüwa n-Nyiza na Israel nyi sapi mathu khili keben miwi meza tughu ji kayi, nu no hang wa ma tsüti kesa mukeyawa salo. Isala Njenkeben Kadimiwa na mangkesa na hati samvu ben nu?”

⁴ Isala kadimiwa na Joab nu ma kekhu wi kedithu ya ma ahza khukechi tsü sa thsüa; tsalina mathu na ma tuwi na wa Israel nyithu tsü si.

⁵ Mathu na Jordan pvüdhi wa Gad yyi wi yyiketijü non wi anyunutiwa Aroer na acülawa kemnanpen sa. Mathu ciwi na Jazer na aghawa wa,

⁶ nu Hitti yyi wi Gilead nu Kadesh wi wa. Tsaseng wi mathu na Dan wi wa, nu Dan wina Sidon na niduwa wa.

⁷ Tsaseng wi mathu na Tur nyunutithu khweti na acülawa wa, ciwi na Hivi nu Kanaan nyithu nyunutithu tsüdi wi wa, nu asakhenwa Judah yyi acülawa Beersheba wi wa.

⁸ Tsalina mathu asha tugu nu ghanan ngwe diyyiwa maben wi kewa seng wi ccüna Jerusalem wi gho.

⁹ Mathu na gho kadimiwa wi anyi süpahi kesa qo Israel wi 8,00,000, nu Judah wi 5,00,000, na benle kiza.

¹⁰ Isala David na nyanzhüghu keya seng wi ma leben nccala nu ma Apvüwa wi khi, “Hi ha kesa ghena qhethiketen kesami kesü sadha le! O Apvüwa, hi kesami teshi cülo. Hi kejüphon kekuli sadha.”

^11-12 Apvüwa na David ghena atusenjüh-kechüwa Gad wi khi, “Wala David wi hi ajjügi kecheng pi ma tuwi chiben le kizalo. Ma khawa kessiya khe hi tsü saden.” Ghanenwa wi David na keshagha seng wi,

¹³ Gad na ma wi wa nu Apvüwa na mangwale khi khe pi ma wi kiza, nu keü, “Kecheng ha khawa sa thsüten nu? N-yyi wi amapi kecheng azeng, nyelela asha kecheng nghinyithu tubvü, nyelela ghanan kecheng n-yyi wi adhagha kesü kesa? Ha meshenchi nu südhe yalo, nu mangwa sen wa Apvüwa kizaten khe hi kizalo.”

¹⁴ David na luneng, “Hi sakeyishü ntsa wi bendha le! Isala hi anyi yala hi nmeten thsü mvu. Apvüwa ya ma ketanla ithu meten thsülo, kepaghenanye ma nantizen ketenwa tsüle!”

¹⁵ Tsalina Apvüwa na adhagha kesü kesun pi Israel miwi chi, tsüna tsü ghanan na wala matsü ssan ketheng tsü npi kecu chu sa. Diyyiwa tsü kesü na wa pahanwa kecu wi Israel nyithu hazar achentagü na shüa.

¹⁶ Apvüwa nyilowa na Jerusalem yasale keben wi Apvüwa na anyithu meten kesa wi ma kemeshen kemiliya nu mathu pathi keben nyilowa wi khi, “Teshi yilo! Tsüna mehaidha le!” Tangnyilowa na Jebus nyiwa Arauna niegi kete wi ben.

¹⁷ David na tangnyilowa na anyi pathi keben tsü muya nu Apvüwa wi khi, “Hi samidhale. Hi kesazziwa tsüle! Isala anyi hathu na mangwa sazzi theng nu? No hi nu itheghi kemeten-ule!”

¹⁸ Tsü ghanan Gad na David wi wa nu khi, “Arauna niegi witsü shula kekinyi kesü sapi Apvüwa cülo.”

¹⁹ David na Apvüwa jühkhukechi tsü kinaya nu Gad na ma kekiza ti wa.

²⁰ Arauna na ghangchi nan kadimiwa nu ma kekhu wi kedithu na ma wi shhugho keten muya. Ma David tuwi ayyi wi nkhwendu

²¹ nu keü, “Njenkeben Kadimiwa, no mangkesa na hewi ghoben nu?” David na luneng, “N-niegi tsü shüya nu adhagha tsü khen thsüale kesalina Apvüwa ghena kekinyipen kesü saden.”

²² Arauna na khi, “Njenkeben Kadimiwa, no kenenwa khuya nu pi Apvüwa cülo. Hewi amesü süponthu hapi kekinyipen miwi mecang pi kekinyi ghena ben; mathu sun wi achan nu kaghaceng chanthu hapi kemecang chan sayalo.”

²³ Arauna na tsüthu tsüdi pi kadimiwa cü nu ma wi khi, “Apvüwa n-Nyiza na no kekinyi tsü yakeyawa salo.”

²⁴ Isala kadimiwa na luneng, “Nyele, hi tsüthu men pi no cüaten le. Hi ma men nkesa pi ahhansha sapi Apvüwa iNyiza cü nbenle.” Isanu ma rükatssü deni pi aniegi nu amesü süponthu tsü shüya.

²⁵ Isanu ma kekinyipen kesü saya nu mecang pi kekinyi nu kecca ghena kekinyi sapi Apvüwa wi chi. Apvüwa na ma kekhie tsü kina cü, nu Israel miwi adhaghawa tsü khen.