2 SAMUEL 21 - Kemethajüh (N) (Re-editing) Bible (BSI)

Saul Shicübvüghathu pi Shü thsükea

¹ David na kadikesa tsüwi azeng kedhu ntsa kesü na amapi kecheng kemtson sa. Tsalina David na tsüghena Apvüwa ccüneng nu Apvüwa na khi, “Saul nu ma theghi na anyi kepathi ghena samile; ma Gibeon nyithu pi shü thsüle.”

² (Gibeon nyithu tsüna Israel nyithu nye; mathu na Amor nyithu akhang kizzakeu kesü Israel nyithu na khwecüle khishikethengthu, isala Saul na ma Israel nu Judah nyithu ghena mathu yasatha sale sa.)

³ Tsalina David na Gibeon nyithu cighu chi nu mathu wi khi, “Hi nthu ghena mangwa sacü nu? Nthu ya sawegü pi Apvüwa nyithu cü thsüle kesalina hi nthu miwi sazzi kethengwa tsü satemeshon mvuben.”

⁴ Mathu na luneng, “Ikhang na Saul nu ma theghi ssinu kekitagha ha rükatssü nyelela suna wina südheya nben, nyelela ikhang na Israel nyi kesüla pathi mvu nbenle.” David na luneng, “Isathu, hi nthu ghena mangwa kesau meshenben nu?”

⁵ Mathu na luneng, “Saul na ikhang nyi pathia nu ikhang nyi thola Israel yyi khiewi la nhang thsü mvula sale.

⁶ Tsalina ma shicübvüghathu npvüza tagü tsü pi ikhang kwen wi chicülo, nu ikhang na mathu pi Apvüwa na kessikeya Kadimiwa Saul jjen nyutiwa Gibea wi Apvüwa tuwi hanthiaben.” Kadimiwa luneng, “Hi mathu khuchiaben”

⁷ Isala David nu Jonathan manyi na Apvüwa wi kemetha kekishen sa ketheng ghena ma Saul tsawa Jonathan tsa Mefibosheth npathila hei cüa.

⁸ Isala ma Aia nga Rizpa na pvügha pi Saul kecü tsa keni Armoni nu Mefibosheth; ma Saul nga Merab na pvügha pi Mehola wina keghowa Barzillai tsa Adriel kecü tsüthu manga la ssiya.

⁹ David na mathu pi Gibeon nyithu kwen wi chicü nu mathu pi ayikha miwi Apvüwa tuwi hanthia, nu mathu tagü gweghe shüa. Hana leghe sakhen sawadha nu acentha wwi wa kesa tsüwi mathu pi shü thsüa.

¹⁰ Tsaseng wi Saul wubvü meshibvüwa Aia nga Rizpa na aleshithsü pi akamang chiketheng pen wi alonshi miwi akekhwen saya nu ma allikewwi aghatsan na wala vvüthimeyi tsankegho npi kegho chu ciwi ben. Ma aghanan thu awathu ghena nu aghaja thu aghangsathu ghena akamangthu tsü hie.

¹¹ David na Rizpa khati sa khe tsü zakeya wi

¹² ma wa Gilead wi Jabes nyithu wi Saul nu Jonathan manyi güthu tsü khuya. (Mathu na Filistinthu na Gilboa Yikha miwi Saul kepathi ghanan akamangthu pi Beth Shan wi anyi tsüdi kemu pen wi dügü ketheng tsü ghanfüya.)

¹³ David na Saul nu Jonathan güthu tsü khuya, nu meshu tagü pi hanthi kesathu gü la saghuya.

¹⁴ Tsaseng wi mathu na Saul nu Jonathan güthu tsüpi Benjamin yyi Zela wi Saul ba Kish shüjjen wi vhüa, nu kadimiwa na kekhi tsüdila sa. Tsaseng wi Anyiza na mathu na diyyiwa ghena kekhie tsü luneng chicüa.

Filistin Kücanyithu SSinu Aghikesa

¹⁵ Filistin nu Israel manyi jüwi aghi kepa wi kesü sa, David nu ma nyithu na wala Filistinthu ssisa. Aghikesa kesü wi David na nchala sa.

¹⁶ Kücanyi kesü ma nyan Ishbibenob na lezza pie kekiyan kilogram kecheng nu pahan khusen nu njünnu la ketheü kesü pvüden, ma David pathiya benle meshen.

¹⁷ Isala Zeruiya tsa Abishai na gho David kiqa nu kücanyiwa ssikaghashen nu ma pathia. Tsaseng wi David nyithu na David ya haseng wi mathu gweghe aghi wi nwa nengdhale kishen thsüa. Mathu na khi, “No Israel kaghang kepvüwa, nu ithu na no pi dedi thsü mvu nben.”

¹⁸ Hawa ha seng wi Gob wi Filistinthu ssinu aghisa, Husha wina keghowa Sibbekai na kücanyi kesü ma nyan Saf tsü pathia.

¹⁹ Gob wi Filistinthu ssinu aghi kepa wila sa, nu Betlehem wina keghowa Jair tsa Elhanan na Gath wina keghowa Goliath ma pie bvügi kesha na ada-kannen ti sen ketenwa tsü pathia.

²⁰ Tsaseng wila Gath wi aghi kepa wi sa, kücanyi kesü aghikesa mvuwa na ciwi ben. Ma kwenzza nu accüzanza la tughogho ben.

²¹ Ma Israel nyithu kimenni, nu David cünyuwa Shamma tsa Jonathan na ma pathia.

²² Ha mejü hathu hana Gath wi kücanyi shicübvüghathu, David nu ma nyithu na mathu pathia.