2 SAMUEL 2 - Kemethajüh (N) (Re-editing) Bible (BSI)

David pi Judah miwi Kadimiwa kesa thsü

¹ Haseng wi David na Apvüwa wi keü, “Hi wala Judah nyuti kesü tsü yayala khati sa nu?” Apvüwa na luneng, “Anlo.” David na keü, “Khawa nu?” Apvüwa na luneng, “Hebron le.”

² Tsalina David na wa ma wubvü keni Jezreel wina keghowa Ahinoam, nu Karmel wina keghowa kheni Nabal wubvü kesawa Abigail manyi ssinu Hebron wi wa.

³ Ma ma nyithu nu mathu theghithu la ssi wa Hebron kevü wi anyutithu wi hang wa.

⁴ Tsaseng wi Judah wi anyithu na Hebron wi gho adeli pi David nyen pi Judah kadimiwa sa thsüa. David na Gilead wi Jabesh nyithu na Saul pi vhüdhale kesa zakeya wi,

⁵ ma anyi pahan kesun pi ketsijüh ha pvü nu ciwi wa thsü: “Nthu na nthu kadimiwa jühkeya wina ma pi vhü kecü ghena Anyiza na sawegü pi nthu kecüwa salo.

⁶ Nu khili Apvüwa na nthu tuwi ccatssü nu jühtsentsa kesawa salo. Nthu kekuli kemehai ghena hi la nthu tuwi mehaitsü saben.

⁷ Kempvüza sa nu lebenzü yalo! Nthu kadimiwa Saul na shüdha, nu Judah nyithu na adeli pi hi nyen pi mathu kadimiwa sa thsüdha le.”

Ishbosheth pi Israel Kadimiwa kesa thsü

⁸ Saul süpahizi benchüwa Ner tsawa Abner na Saul tsa Ishbosheth ssisen Jordan pvüdhi sen nu Mahanaim wi wa.

⁹ Ciwi Abner na Ishbosheth pi Gilead, Asher, Jezreel, Efraim, nu Benjamin nyithu, nu Israel tsüdi miwi kadimiwa sa thsüa.

¹⁰ Ma pi Israel kadimiwa kesa tsüwi ma kahang mapi jügha saben, nu ma amapi keni kekhangsen. Isala Judah mizza na David jühkeya wi ben,

¹¹ nu ma Hebron wi Judah miwi amapi tagü nu pahan kekhangsen.

Israel nu Judah jüwi Aghikesa

¹² Abner nu Ishbosheth kedithu na Mahanaim wina Gibeon nyunuti wi wa.

¹³ Joab, ma jja na Zeruiya, nu David kekhu wi kedi kepathu na wala acüceng kesü wi mathu metu, mathu tsüdila akhang kesü na acüceng katen kesü wiwa nu akhang kepawa na kaghapewa donki.

¹⁴ Abner na Joab wi khi, “Kesükesü wi anyi kepvüzathu pahan ya shagha ithu tuwi kesali thsü na.” Joab na luneng, “Anlo, mathu ya kesali thsülo.”

¹⁵ Tsalina meshu taghakeni na Ishbosheth nu Benjamin mizza mithon sala wa David nyithu meshu taghakeni ssisa.

¹⁶ Anyi meshu kesüsü na ma ssisa kebenwa li kemahhaliya nu njünnu hanshi pi kesüthili shan, tsalina mathu ngwe nu mejü tsüdila gweghe ciwi shü. Tsalina Gibeon wi apen tsüpi “Njünnu Lli” isa khia.

¹⁷ Tsaseng wi aghisa ntsa sa, nu David nyithu na Abner nu Israel nyithu chaya.

¹⁸ Zeruiya tsa kecheng: Joab, Abishai, nu Asahel na ciwi ben. Asahel na ameshü ti mbhi ntsa bvüyaden,

¹⁹ ma meshonqhe bvü sen nu Abner jügü wa.

²⁰ Abner na khapeghe ghangchi nu khi, “Asahel, tsüna no kwe?” Ma luneng, “Anle, hi le.”

²¹ Abner na khi, “Hi njügü lalo! Süpahithu kesü jügü wa nu ma mangwa pvüten khe khuyalo.” Isala Asahel na nteshila ma jügüki sa.

²² Abner na kheneng ma wi khi, “Hi njügü lalo! Mangkesa na hi no pathi thsüale saben nu? Hi khati whala ncünyuwa Joab metu nu?”

²³ Isala Asahel na kheneng nbvü mvusa; tsalina Abner na asengwa na ma pie pi Asahel pvü kecun cü nu apie na ma sengwa shhugho. Asahel na khulidu ayyi wi shüa, nu tsüdila gho ma khuli keben pen tsü cukeya wi ciwi ngan wa.

²⁴ Isala Joab nu Abishai manyi na Abner jügü wa, nu aghani kedu pang wi manyi na Gibeon ghansha wi kewalen Gia na nishuwa Amma yyishiphon wi ghoya.

²⁵ Benjamin mizza wi anyithu na kheneng Abner vüya nu yyishiphon kesü shoni wi mathu pen kidenya.

²⁶ Abner na Joab cichi, “Ithu na anuphanla aghisa benten kwe? Asakhen wi mangla nmila isala ketizenkesa ketan sa keben tsü no nchü kwe? Ikhang la nthu nyi le. No ahza pi n-nyithu cü nu ikhang njügü thsülale kesa matsü khathu ben nu?”

²⁷ Joab na luneng, “Hi hang kebenwa Anyiza wina kishenben, keujüla no ajüh tsüti nkhi lethu, inyithu na ghanen kecu nthu jügü kesale.”

²⁸ Tsaseng wi Joab na ma nyithu na Israel nyithu njügüla yilo kesa tutuwa khouchia, tsalina aghi nsala.

²⁹ Abner nu ma nyithu na tsü ghaja thangthang Jordan yyiketijü tsü pvüdhi; mathu na Jordan Ghaku pvüdhi nu ghanenwa kecu lenketsen seng wi mathu na gho Mahanaim cu nengya.

³⁰ Joab na jügü nwala teshi kesa seng wi ma nyithu tsüdi saghu wa nan Asahel nsila meshu tagha nu tugu nmila kebenla muya.

³¹ David nyithu na Benjamin mizza wi Abner nyithu 360 pathia.

³² Joab nu ma nyithu na Asahel kamang pieya nu sen wa Betlehem wi ma theghi shüjjen wi vhüa. Tsaseng wi mathu na aghaja thangthang lentsen nu thangtheghi wi mathu na kheneng gho Hebron cuya.