2 SAMUEL 19 - Kemethajüh (N) (Re-editing) Bible (BSI)

Joab na David Kekha

¹ Kadimiwa David na Absalon ghena qai nu anongü benle kesa nyu na Joab kiza.

² Tsalina David süpahithu ghena tsü ghanan khangkeya ghena anonkeghewa nyela ahathakinawa sa, kepaghenanye kadimiwa na ma tsawa ghena anongü benle kesa mathu na zaya.

³ Mathu na süpahithu na aghi tubvü kesalina mathu kejüghe ti, mathu na ceen anyunutiwa wi du neng.

⁴ Kadimiwa na athsü pi ma mmi shan pvü “O itsawa! Itsawa Absalon! Absalon, itsawa!” isala misikhhali qaiben.

⁵ Joab na kadimiwa jjen wi wa nu ma wi khi, “No nansü n-nyithu na no, ntsa, n-nga, nwubvü, nu nwubvü meshibvüthu kahangli hangsha kecü ghena mathu kimenni cüdha.

⁶ No no ketizenthu shun nu no nankemeghüthu kiqaben! No nkekhu wi kedithu nu n-nyithu na ntuwi ma men nmile sadha. Keujüla nansü ha Absalon na hangben nu ikhang tsüdila shü lethu, no n-nonghe ntsa sa kesale kesa hi muben.

⁷ No khili wala n-nyithu leben satecca cülo. Nyelethu, hi Apvüwa nyan wina kishenben, ghanen wi mathu kesütanla no gweghe nbenla tendha. Tsüna no kahang wi hatu wi ketizensa kegho miwi nmehaiki laben.”

⁸ Tsaseng wi kadimiwa na shagha nu wa anyunutiwa kaghapeng jenka kete wi donki, nu mathu tsüdila saghu gho ma vüya. Tsü tsüwi Israel nyithu tsüdi bvüzighe nu papa jjen wi wadha.

David na Jerusalem wi Kewa neng

⁹ Diyyi maben wi mathu ketanla mathu ja wi kitagha shagha. Mathu na khokho wi khi, “Kadimiwa David na ithu ghinyithu kwen wi ithu hangsha cüle. Ma Filistinthu kwen wi ithu kekasha cü, isala ma khili Absalon tuwi nu diyyiwa ha wina bvüdha.

¹⁰ Ithu na adeli pi Absalon nyen pi ithu kadimiwa sa, isala ma aghi wi shüdha. Tsalina mangkesa na anyi pahan na wala Kadimiwa David ssi neng ghole nsa nu?”

¹¹ Israel nyithu khi keben jühtheü tsüna wa Kadimiwa David cuya. Tsalina ma keqhaikedi keni Zadok nu Abiathar manyi kesun pi Judah ccülikesathu wi keü thsü, “Kadimiwa ssineng gho ma kadijjen wi chiale kesa Israel tsüdi wi ajüh gho keben hawi nthu mangsale asakhenwa saben nu?

¹² Nthu na ishilithu, isa nu ijjü le; nthu mangsale hi ssineng kegho wi asakhenwa saben nu?”

¹³ David na manyi ya Amasa wi la khilo kiza, “No ishinyi kesü. Hi khili no pi Joab mithon sala isüpahizi benchüwa sa thsüaden. Keujüla hi tsüti nsa lethu, Anyiza na hi pathi kesawa salo.”

¹⁴ David jüh tsüna Judah nyi tsüdi lepi jühkeya wi chiya, nu mathu na ma nu ma kekhu wi kedithu tsüdi ssinu ghonenglo kesa ajüh pi ma wi kesun chia.

¹⁵ Kadimiwa na ghoneng keten alenca wi Judah nyithu na Jordan Ghaku wi ma metu, mathu na Gilgal wi gho ma ssinu aghaku pvüdhile kesalina.

¹⁶ Tsü tsüwi Bahurim wina kegho Benjamin nyi Gera tsa Shimei na Kadimiwa David metule kaghajila Jordan wi wa.

¹⁷ Ma Benjamin nyi hazar kesü ssiden. Nu Ziba, Saul theghi maghawa la ma tsathu taghamanga nu amaghathu ngwe ssisen Jordan wi kadimiwa tuwi gho.

¹⁸ Mathu na aghaku pvüdhi ki kadimiwa ghekhha ssinu pvüdhi nu kadimiwa kesa mvuwa tsü sale kesalina. Kadimiwa na Jordan pvüdhi wale kidenkeya wi Shimei na ma tuwi kukedu

David na Shemei Nantizenkechi

¹⁹ nu khi, “Njenkeben Kadimiwa, no Jerusalem keteshi ghanan wi hi ntuwi kesazzi tsü teshi cülo. Tsüpi imiwi nchila nyelela tsü nmeshen nengla yilo.

²⁰ Kediwa, hi sazzidha kesa chükeben ghena aghawa mizza ja wi hi nansü atuwa sala no Njenkeben Kadimiwa metu benle.”

²¹ Zeruiya tsa Abishai na ajühkhi shagha: “Shimei pi shü thsü kesau le, kepaghenanye ma Apvüwa na kessi pi kadimiwa sa thsü kesawa ha kishencü le.”

²² Isala David na Abishai nu ma cünyuwa Joab wi khi, “Thowa na no kemeshen keüben nu? No agükeccü sengho hi cüle benla? Hi khili Israel kadimiwa sadha, nu nansü Israel nyi kesüla pi shü thsükeya nmi.”

²³ Nu ma Shimei wi khi, “No pi shü thsü nben kesa hi ntuwi ijüh khuchiben.”

David na Mefibosheth Nantizenkechi

²⁴ Saul tsawa tsa Mefibosheth na gho kadimiwa metu. Ma kadimiwa na Jerusalem keteshi tsü wina khangya nu npi kheneng kegho chu ma ccü nbhu, ma pang kenye ncah, nyelela ma thsümeni nghasü.

²⁵ Mefibosheth na Jerusalem wina gho kadimiwa kemetu wi kadimiwa na ma wi khi, “Mefibosheth, no mangkesa na hi gweghe nwala nu?”

²⁶ Ma luneng, “Njenkeben Kadimiwa, hi accü nmehai kesa tsü no chüben. Hi no gweghe wale kesalina imaghawa wi gada miwi kedonpen sachilo kiza, isala ma hi matsale.

²⁷ Ma ighüsa pi Njenkeben Kadimiwa kiza, isala no Anyiza nyilo ti kesa, tsalina ntuwi kemeshonwa tsü sayalo.

²⁸ Njenkeben Kadimiwa na iba theghi tsüdila pi shü thsü qole, isala no hi ya nmiz wi dsajjüya kemehai pi cü. Njenkeben Kadimiwa wi hi kenen kekhieneng-u mangla nmidhale.”

²⁹ Kadimiwa na luneng, “No mangla nkhinengla yilo. Ziba nshinyi na Saul keben tsüpi gishüyalo südhe cüdha na.”

³⁰ Mefibosheth na khineng, “Ziba ya tsü tsüdila yathsülo. Njenkeben Kadimiwa na kemehai sala ajjen wi ghoneng kesa ha ighena mehai mtsüdha.”

David na Barzillai Nantizenkechi

³¹ Gilead wina keghowa Barzillai la Rogelim wina dugho kadimiwa ssinu Jordan pvüdhile gho.

³² Barzillai na keqhai nyi kesü, ma kahang amapi achentazen sadha. Ma keban ntsa nu kadimiwa na Mahanaim wi keben wi ma kedsakejjü pi ma cü.

³³ Kadimiwa na ma wi khi, “Hi gweghe Jerusalem wi ghalo, hi ciwi no nonccaya ben na.”

³⁴ Isala Barzillai na luneng, “Hi matsü kesie hang ntendha; mangsale hi Njenkeben Kadimiwa gweghe Jerusalem wi wa nu?

³⁵ Hi kahang amapi achentazen sadha nu mangla ituwi anonkeghe nmidha. Hi ipang wi mangla dsa kemehai nu jjü kemehai nmiladha, nu nyu khwikesa hhai la nzaladha. Hi agükeccü pi Njenkeben Kadimiwa kecü ketan saben.

³⁶ Hi akutimen keti ha meya qole. Tsalina hi no gweghe keu Jordan thenkeghe waten le.

³⁷ Tsaseng wi hi ya ajjen wi kheneng whala ibajja shüjjen kete wi shü thsülo. Itsawa Khimham na hewi ben, ma no kekuli saben; no ma ssiyalo, Njenkeben Kadimiwa, no ma ghena kemehai tsü sapi cülo.”

³⁸ Kadimiwa na luneng, “Hi ma ssinu hi gweghe waden, nu no hi ya ma ghena mangwa sa thsü mvuben khe hi tsü saben. Nu hi no mangwa khie khe sa cüben.”

³⁹ Tsaseng wi David nu ma nyithu tsüdi Jordan pvüdhi wa. Ma Barzillai kimang nu sawegü pi ma cü, nu Barzillai na ajjen wi whaneng.

Judah nu Israel na Kadimiwa miwi Keccücanli kesa

⁴⁰ Khathansha wi Judah nyi tsüdi nu Israel nyi kegishü pahan na kadimiwa ssinu pvüdhiya khe, ma Gilgal wi wa nu Khimham na ma gwegheden.

⁴¹ Tsaseng wi Israel nyi tsüdi kadimiwa wi wa nu ma wi khi, “Njenkeben Kadimiwa, mangkesa na ithu cünyu Judah nyithu na mathu na no, ntheghi, nu n-nyithu ssinu Jordan kepvüdhiu le meshenten nu?”

⁴² Judah nyithu na luneng, “Kadimiwa na ikhang nyi kesü ghena ikhang na tsüti sale. Tsalina mangkesa na ha nthu sapi aghepvü thsüben nu? Ma kedsakejjü men pi ikhang ncü nyelela mangla pi ikhang npi cü na.”

⁴³ Israel nyithu na khineng, “Kadimiwa David na nthu nyi kesü lela nthu na ma miwi khie keben miwi ikhang na tagha tughu kekhie-u na benle. Mangkesa na nthu na ikhang nkhichila ben nu? Kadimiwa ssineng ghoale kesa ikhang na atuwa sa kekhi tsü nmali lalo!” Isala Judah nyithu jüh na Israel nyithu jüh miwi khangkila khi.