2 SAMUEL 18 - Kemethajüh (N) (Re-editing) Bible (BSI)

Absalon Chaya nu Pathikea

¹ Kadimiwa David na ma nyithu tsüdi ssighu sengho mathu gishü pi hazar kesü nu meza kesü akhang khang saya nu kedithu pi mathu miwi benya thsüa.

² Tsaseng wi ma mathu kesun pi akhang kecheng sa nu akhang kesüsü wi benchüwa sa wa thsü, Joab, Joab cünyuwa Abishai, nu Gath wina keghowa Ittai. Nu kadimiwa na ma nyithu wi khi, “Hi ketanla nthu gweghe waden.”

³ Mathu na luneng, “Ithu gweghe nwa lalo. Keujüla ikhang na aghinyithu tuwi bvüa, nyelela ikhang kegishü pahan pathi lela mathu tuwi tsü makepa nsale; isala no na ikhang hazar tagha men makesüle. No hewi anyunuti wi ben nu kekiqa kesun pi ikhang kecüwa mehaile.”

⁴ Kadimiwa na luneng, “Nthu na mangwa mehaile saben khe hi tsü saden.” Tsaseng wi ma kaghapeng jenka kete wi ngan nu ma nyithu na hazar kesü nu meza kesü akhang khang sala lentsen shhu.

⁵ Ma ahza pi Joab, Abishai, nu Ittai cü: “Ighena pvüzawa Absalon tsü npatena lalo.” Nu David na ha khipi ma kekhu wi kedithu kiza keben tsü süpahithu tsüdila zaben.

⁶ David süpahizi na ajujü wi shula Efraim Yinong wi Israel ssi kaghashen.

⁷ Israel nyithu na David nyithu nchala; tsü ghanan aghikesa keti sa nu anyi hazar ngwe na shüa.

⁸ Kesali tsüna diyyiwa jujü wi bvüzighe, nu anyi na aghi wi keshüwa nyela ayinong wi keshüwa jia.

⁹ Absalon na zuli gho David nyi pahan metuya. Absalon na gada kesü miwi donkiben, nu tsüna ayangton kesü cakhu wi bvüshhu nu Absalon li na achanbe wi hagiya. Gada na bvü nu Absalon na mabe wi hagi wa.

¹⁰ David nyi kesü na ma muya nu wala tsüpi Joab wi kiza, “Kediwa, hi Absalon na ayang tonbe kesü wi hagi keben mule!”

¹¹ Joab na luneng, “Keujüla no ma muthu mangkesa na ciwi ma npathila nu? Hi rükatssü tagha nu ageshi keqhan pi no cü kesa nan.”

¹² Isala anyi tsüwa na luneng, “Keujüla no rükatssü hazar kesü pi hi cü lela hi ikwenzza la pieki pi kadimiwa tsa shun nbenle. No, Abishai, Ittai, nu ikhang tsüdila kadimiwa na ‘Ighena pvüzawa Absalon tsü npatena lalo’ kesa ahza khukechi tsü zayadha.

¹³ Isala keujüla hi kadimiwa jüh nkinala nu Absalon pathile keathu, kadimiwa tsü cüki tsüdila zaya kesa, nu no ishei khiya nkesale.”

¹⁴ Joab na khi, “Hi hati no gweghe matsü dediben ntendha.” Ma apie kecheng khuya nu Absalon na ayang tonbe wi hagi nu hangkeben witsü apie dhen pi ma deshi ghon cüa.

¹⁵ Tsaseng wi Joab süpahithu ma tagha na Absalon tetsaki whala ma pathia.

¹⁶ Joab na aghi nsala yilo tutuwa khouchi, nu ma süpahithu na Israel nyithu jügü keten wi kheneng ghoa.

¹⁷ Mathu na Absalon kamang pi ayinong ghansha wi ayyiku kedhu kesü wi khalachia, nu alon ketiti pi kecenbhon. Israel nyithu tsüdila bvü sen nu kepapa jjen wi wha.

¹⁸ Absalon na ma kahang tsüwi Kadimiwa Yyiketijü wi ma nyan wina apenkezhü kesü satheng, kepaghenanye ma atsa kesüla ma nyan sapi hangya thsü kemehai nmi. Tsalina ma tsüpi ma nyan sachi, nu tsüna nansü kecula pi Absalon Penkezhü le khiden.

Absalon Keshü Cüki pi David Kekiza

¹⁹ Tsaseng wi Zadok tsa Ahimaaz na Joab wi khi, “Hi ya jühtheü kemehaiwa ha pvünu kadimiwa wi Apvüwa na ma ghinyithu kekhang wina ma hangsha yadhale kiza wa thsülo.”

²⁰ Joab na khi, “Nyele, no nansü jühtheü kemehaiwa mangla sen wa nben. No nansü nyela atsathang kepa wi saya mehai, kepaghenanye kadimiwa tsa tsüna shüdha.”

²¹ Tsaseng wi ma ma nssümaghawa Sudan nyiwa wi khi, “Wala no mangwa mu khe pi kadimiwa kizalo.” Nssümaghawa na kukechi nu bvüa.

²² Ahimaaz na khi khvu sa, “Hasale hasa lela makesasalo; hi la ya jühtheü sen wa thsülo.” Joab na keü, “Itsawa, no mangkesa na tsü sa mvuben nu? No tsüghena akutimen muya nben na.”

²³ Ahimaaz na khineng, “Hasale hasa lela makesasalo; hi wa mvuben le.” Joab na khi, “Isathu walo.” Tsalina Ahimaaz na bvüsen Jordan Yyiketijü len wi wala nssümaghawa tugheya.

²⁴ David na anyunutiwa kaghapeng jenka nonwa nu ameiwa manyi jüwi donkiben. Aghikehiewa na ajjen-keshon shoni wi ki nu kaghapeng jenka miwi nganben; ma ghangchi nan anyi kesü na bvügho keten muya.

²⁵ Ma cüla kadimiwa cichi nu kiza, nu kadimiwa na khi, “Keujüla ma ketan lethu, ma jühtheü kemehaiwa sengho ten laben.” Anyi tsüwa na tsaki pfü bvügho.

²⁶ Aghikehiewa na anyi kepa wila ma ketan bvügho keten mu, nu ma ajenka kehiewa cichi nu khi, “Ghangchilo! Ka wi la anyi kesü na bvügho tenle.” Kadimiwa na luneng, “Anyi tsüwa la jühtheü kemehaiwa sengho ten laben.”

²⁷ Aghikehiewa na khi, “Hi anyi atuwa bvü keten katsü na Ahimaaz ti mubenle.” Kadimiwa na khi, “Ma anyi kemehai, ma jühtheü kemehaiwa sengho ten laben.”

²⁸ Ahimaaz na gho kadimiwa shalom sachi, ma tuwi ayyi wi nkhwendu nu khi, “Apvüwa n-Nyiza sengle, ma anyi Njenkeben Kadimiwa matangla shun ketenwa miwi khangkeya pi no cüdha le!”

²⁹ Kadimiwa na keü, “Acaliwa, Absalon na kemehai saben ma?” Ahimaaz na luneng, “Kediwa, nkekhu wi kediwa Joab na hi kesun kechi wi hi kethukehi ntsa sa keben mule, isala tsüna khati sa khe hi nchüle.”

³⁰ Kadimiwa na ma wi “No wa ciwi nganben lalo” kiza nu ma wa ciwi ngan wa.

³¹ Tsaseng wi nssümagha Sudan nyiwa na gho cuya nu kadimiwa wi khi, “Njenkeben Kadimiwa, hi nghena jühtheü kemehaiwa benle! No matangla shun ketenthu tsüdi miwi Apvüwa na nansü khangkeya pi no cüdha le!”

³² Kadimiwa na keü, “Acaliwa, Absalon na kemehai saben ma?” Nssümaghawa na luneng, “Kediwa, no matangla shun ketenthu nu nghinyithu tsüdi miwi la acaliwa miwi kesa tsüti sadhale.”

³³ Kadimiwa na ma hathana ntsa sa. Ma kaghapeng jenka miwi ajjen-keshondhi kesü wi du nu qai wa. Ma hati maghala qai, “O itsawa! Itsawa Absalon! Absalon itsawa! Hi nkuti wi shüthu mehai kesa nan, itsawa. Absalon, itsawa!”