2 SAMUEL 17 - Kemethajüh (N) (Re-editing) Bible (BSI)

Hushai na Absalon Ssi dejakea

¹ Tsaseng wi matsü kesie npi kesa wi Ahithofel na Absalon wi khi, “Hi ya anyi hazar taghakeni kessiya thsülo, nu hi shita David jügü waden.

² Ma nchala accükwenshü keben wi hi wala ma ssi kaghashen den. Ma messi nu ma nyithu tsüdila bvüaben. Hi kadimiwa ketan pathi

³ nu ma nyithu tsüdi ssinu shanyili na ma wuba wi gho keten ti no wi gho neng den. No anyi kesütan tsü pathi nu anyi kepathu tsüdi apvü-nsala ben thsü mvuben.”

⁴ Kesansijüh hawa ha Absalon nu Israel ccülikesathu tsüdi tuwi mehai keben ti sa.

⁵ Absalon na khi, “Khili Hushai cichilo, nu ithu na ma mangwale khiten khe kina nan na.”

⁶ Hushai na gho cukeya wi Absalon na ma wi khi, “Hawa ha Ahithofel na kesansijüh pi ikhang kecü le; ikhang na tsü niela nye nu? Nyelethu, ikhang na khati saten khe no ikhang kizalo.”

⁷ Hushai na luneng, “Nansü Hushai na kesansijüh pi nthu kecü ha mehai le.

⁸ Nba David nu ma nyithu na aghikekhang ntsathu nu mathu na aduweng bvü kesü nyu na ma zza ghanfüya kesa ghekina ti kesa tsü no chüben. Nba na aghisa kinan nyi kesü nu ma aghaja wi ma nyithu ssinu ben nten.

⁹ Ma khili lela ayyiku kesü wi kuthi nyelela apen pahan wi tenla metsiben. David na gho n-nyithu ssi kaghashen gweghe thowa na tsü cüki zaya khe n-nyithu na nyu nchaladha le khiaben.

¹⁰ Isalethu, anyi kempvüza ssensitemi ti messi nkentenwa lela messiaben, kepaghenanye Israel wi anyi tsüdila nba na süpahi kekhang kesü nu ma nyithu na aghi kekhangthu le kesa chüben.

¹¹ Hi no kesansijüh na hale, no diyyi katen pahanwa na wa kesü kecu wi Israel nyi tsüdi saghu pi atssükedone ghüsa wi ahachan ti saya, nu no ketanla mathu ssinu aghi wi walo.

¹² Ikhang na David na khiewa ben khe bhaya, nu ma mangwa saben khe npi chükeya tuwi na ma ssi kaghashen den. Isanu ma nyelela ma nyithu lela hangya nben.

¹³ Keujüla ma anyunuti kesü wi du lethu, ithu nyi tsüdila ali sengho anyunuti tsü zansha pi ayyiketijü non wi chiaden. Ciwi yyishiphon shoni wi alon kesüla nmila ben.”

¹⁴ Absalon nu Israel nyi tsüdila khi, “Hushai kesansijüh na Ahithofel miwi mehaiki le.” Agükeccü na Absalon miwi ghothu keyishü ghena Ahithofel kesansijüh kemehaiwa tsü n-nie lalo kesa Apvüwa na südheyadha.

David Kitsanchi nu Bvüyakea

¹⁵ Tsaseng wi Hushai na keqhaikedi keni Zadok nu Abiathar wi ma nu Ahithofel na kesansijüh mangwa pi Absalon nu Israel nyi ccülikesathu cüdha khe pi manyi wi kiza.

¹⁶ Hushai na khi, “Khili wanlo! Nyilo kesü kesun pi David wi ma nu ma nyithu tsüdi ghanya nu npathi thsüle kesalina ma aghaja wi aghansha wi aghakughu witsü nbenla, isala wan Jordan Ghaku tsü pvüdhi walo kizalo.”

¹⁷ Abiathar tsa Jonathan nu Zadok tsa Ahimaaz manyi na Enrogel tssükebvüpen wi ben nu hieben, Jerusalem na ameiwa, kepaghenanye manyi na anyunutiwa wi kedu wi nyu manyi muthu kemessi ghena. Maghale kesü keshüthangla mangwa khati saben khe wala pi manyi kizaden, isanu manyi na wala tsüpi Kadimiwa David kizaden.

¹⁸ Isala ghanan kesü pvüzanyi kesü na manyi muya nu ma tsüpi Absalon kiza, tsalina manyi kaghaji sen wa Bahurim wi anyi kesü jjen wi kuthi wa. Ma ma jjen kete atssükhang kesü na ben, nu manyi na ciwi dua.

¹⁹ Anyi tsüwa wubvü na aphi kesü khuya nu sen wa atssükhang pang tsü shibhon nu asu pi ma miwi thsüya, isanu anyi thola ciwi mangla nmu thsüla.

²⁰ Absalon kekhu wi kedithu na ajjen ciwi gho nzawa wi keü, “Ahimaaz nu Jonathan manyi tsüna khie nu?” Nzawa na luneng, “Manyi na aghaku pvüdhi wadha le.” Anyithu na manyi bha isala nmula kesalina mathu na Jerusalem wi wha neng.

²¹ Mathu na kebvü seng wi Ahimaaz nu Jonathan manyi atssükhang wina shhugho nu wa tsüpi Kadimi David kiza. Manyi na Ahithofel na khati ma keshun kidenben khe pi ma kiza nu khi, “Wan kidenya nu aghakuwa tsü pvüdhi walo.”

²² Tsalina David nu ma nyithu na shagha Jordan Ghaku tsü pvüdhi wa, nu atsathang keshagha wi mathu tsüdila tsü pvüdhi yadha.

²³ Khathansha wi Ahithofel na nyu ma kesansijüh tsü n-nieladha kesa muya khe, ma gada khhi saya nu ma nyu wi wha neng. Ahithofel na ma jjen wi atsanqai tsanbekeya seng wi ma ketanla ma hanthia. Nu ma pi ma theghi shüjjen wi vhüa.

²⁴ Absalon nu Israel nyithu na Jordan kepvüdhi tsüwi tsü David na wala Mahanaim cuya.

²⁵ (Absalon na Amasa pi Joab mithon wi süpahizi benchüwa sa thsütheng. Amasa na Ishmael nyiwa Jether tsa; ma jja na Abigail, Nahash nga nu Joab jja Zeruiya pvünonwa.)

²⁶ Absalon nu ma nyithu na Gilead yyi wi kemnanpen saben.

²⁷ David na wa Mahanaim cukeya wi Ammon yyi wi Rabbah nyunutiwa wina keghowa Nahash tsa Shobi, nu Lodebar wina keghowa Ammeil tsa Makhir, nu Gilead yyi wi Rogelim wina keghowa Barzillai hathu na gho ma metu.

^28-29 Mathu na akhuzza, ayyipfü, nu awe thsümenithu, nu David nu ma nyithu ghena la awhengsu, achentha, anün, asu keman, ahati, akwentsa anikholi, atsenitssütsen, nu khaghaneni pahan sengho. Mathu na David nu ma nyithu na aghansha wi ghama, dighe, nu keyha kesa chüben.