2 SAMUEL 16 - Kemethajüh (N) (Re-editing) Bible (BSI)

David nu Ziba

¹ David na yyishiphon shoni tsü keu thenkeghe whanan ma Mefibosheth maghawa Ziba metuya. Ziba na amesa be meza keni, kemeshentsse keqen acü meza kesü, kedsau kahang acü meza kesü, nu kisengtssü pi akhüti kesü pongti tsüti pi gada keni khhi sapvüden.

² Kadimiwa David na ma wi keü, “No hathu hapi mangwa sale ben nu?” Ziba na luneng, “Gadathu hapi Njenkeben Kadimiwa theghi pvü, nu anyithu na aghansha wi nchala lethu, amesa nu kedsauthu hapi mathu dsa thsü, nu kisengtssü hapi mathu jjüya thsüle kesalina.”

³ Kadimiwa na ma wi keü, “Npvüwa Saul tsawa tsa Mefibosheth na khiewa ben nu?” Ziba na lunneng, “Ma Jerusalem wi benle, kepaghenanye ma khili Israel nyithu na ma baqhai Saul kadiyyiwa tsüpi ma cü neng shaben le nondiben.”

⁴ Kadimiwa na Ziba wi khi, “Mefibosheth na keben tsü tsüdila nji.” Ziba na khineng, “Hi nmaghawa, hi keshüthangla Njenkeben Kadimiwa kenen pvü keyawa salo.”

David nu Shimei

⁵ Kadimi David na gho Bahurim cukeya wi Saul theghi kesü Gera tsa Shimei na shhugho ma metu, nu ma kishencü shagha.

⁶ David nyithu nu ma ghikehiethu na ma vüben lela Shimei na alon pi David nu ma kekhu wi kedithu kicen shagha.

⁷ Shimei na ma kishencü nu khi, “Shagha bvülo! Shagha bvülo! No nyu kepathiwa nu ayen kepakhhiwa!

⁸ No Saul kadiyyi khuya nu Saul theghi kejon pathi kesalina Apvüwa na khili no meten bendha. Apvüwa na kadiyyi pi ntsa Absalon cüdha, nu no yasadha, no nyu kepathiwa!”

⁹ Abishai ma jja Zeruiya na kadimiwa wi khi, “Njenkeben Kadimiwa, mangkesa na affü hawa yala no kishencü thsüben nu? Hi ya wala ma li wiya thsülo!”

¹⁰ Kadimiwa na Abishai nu ma cünyuwa Joab wi khi, “Hawa ha nkutili mangla nmile. Keujüla Apvüwa na ma hi kishencülo kiza nu saben lethu, thowa na ma mangkesa na tsüti sa ben nu khiya mehai nu?”

¹¹ David na Abishai nu ma kekhu wi kedithu wi khi, “Itsa na hi pathile sa benthu nthu mangkesa na Benjamin nyithu na hati kesa miwi amansa ben nu? Apvüwa na ma kiza nu kishencü thsüben; tsalina ma teshilo nu ma ya tsüti sa thsülo.

¹² Apvüwa hi ketizen kesa ha muya nu ma kishen-keshi kuti wi kesawegü pahan pi hi cü nashe.”

¹³ Tsalina David nu ma nyithu na alen wi wa. Shimei na mathu kaghape yyishiphon wiwa lentsen; ma kewalen sa kishencü nu alon nu kenenkaghathu pi mathu wiwa kecenchi sa.

¹⁴ Kadimiwa nu ma nyithu tsüdi wala Jordan cukeya wi nchala, nu mathu ciwi mnanya.

Absalon na Jerusalem wi Keben

¹⁵ Absalon nu ma nieketen Israel nyithu tsüdi gweghe Jerusalem wi du, nu Ahithofel la mathu gwegheden.

¹⁶ David pvüshangwa Hushai na Absalon metu keya wi jisha, “Kadimiwa kesie kahangwa salo! Kadimiwa kesie kahangwa salo!”

¹⁷ Absalon na ma wi keü, “No npvüshangwa David wi jühkeya tsü khati sadha nu? No mangkesa na ma gweghe nwala nu?”

¹⁸ “Hi khati saya nu? Hi anyi hathu nu Israel nyi tsüdi ghena Apvüwa na kessiya kesawa ghena le. Hi no gweghe bentenle.

¹⁹ Hi ipvüwa tsawa nyelethu thowa kekuli sa nu? Hi nba kekuli sa kegho ti khili no kekuli saaden.”

²⁰ Tsaseng wi Absalon na khapeghewa Ahithofel wi khi, “Ikhang na khati nsathu yishü khe no ikhang kiza ma?”

²¹ Ahithofel na luneng, “Wala nba wubvü meshibvüthu teshi pi kadijjen noncca thsü kethengthu tsü ssijenlo. Isalethu, Israel nyi tsüdila nba na no pi ma ghinyi saben kesa chüyaben, nu nsenkeniethu kechü-kenong ntsa saben.”

²² Tsalina mathu na Absalon ghena kadijjen miwi nithsüjjen kesü sa, nu Absalon na anyi tsüdi kemu wina wa ma ba wubvü meshibvüthu tsü ssimehai.

²³ Tsü tsüwi David nu Absalon manyi qho Ahithofel na kesansijüh mangwa khuchi khe tsüpi Anyiza jüh ti yaya nu nieden.