2 SAMUEL 10 - Kemethajüh (N) (Re-editing) Bible (BSI)

David na Ammon nu Siriya nyithu Chayakesa

¹ Matsü pahan seng wi Ammon kadimiwa Nahash na shü, nu ma tsa Hanun na kadimiwa saya.

² Kadimiwa David na khi, “Nahash na hi wi kesa ti hi apvüshang jühkeya pi Nahash nccücathu yishü.” Tsalina David na nyilothu kesun pi ma ba ghena ma ketizen jjügi khiwa thsü. Mathu na wala Ammon cukeya wi,

³ Ammon nyi ccülikesathu na kadimiwa wi khi, “No tsü David na nba kenyuwakü ghena anyi hathu kesun pi no ketizen jjügi khigho thsü benle meshen ben kwe? Nyele! Ma anyi hathu kesun pi wahhaithu sala anyunutiwa hhainan thsü nu ma ithu miwi khangyale saben le!”

⁴ Hanun na David nyilothu tsü ghan pi mathu pangkenye pahanwa whi, mathu geshi wi athsümeni mezüqhe, nu mathu kesun pi bvü thsüa.

⁵ Mathu na ajjen wi wha nengle kesa jüghe ntsa sa. David na tsü cüki zakeya wi mathu na wala mathu pangkenye npi shigü keshagha chu ngho neng la Jerikho wi benlalo kesa ajüh pi mathu wi kesunchi.

⁶ Ammon nyithu na mathu na David sapi mathu ghinyi sa thsüdha kesa chükeya wi mathu na Bethrehob nu Zoba wi Siriya nyi süpahithu hazar ngwe, Tob wi anyi hazar taghakeni, nu Maaka wi kadimiwa pi anyi hazar kesü wwala melliya.

⁷ David na tsü zakeya wi ma Joab kesun pi süpahizi maben ssi wa mathu ssikaghashen thsü.

⁸ Ammon nyithu na lentsen shhugho mathu ghazen nyunutiwa Rabbah kedulen wi mathu pen kidenya, nu kepathu Siriya nyithu nu Tob nu Maaka wi kegho anyithu na diyyiwa jujü witsü mathu pen kidenya.

⁹ Joab na aghinyi süpahi na asengwa nu atuwa la ma ssisale keben muya, tsalina ma Israel süpahi kemehai ntsathu kessiya nu mathu pi Siriya nyithu kepeghewa kidenya thsüa.

¹⁰ Ma süpahi kepathu pi ma cünyuwa Abishai na benchüwa sala ma Ammon nyithu kepeghewa kidenya thsüa.

¹¹ Joab na ma wi khi, “Keujüla Siriya nyithu na ighena khang mtsü lethu, no ghola hi kiqalo; nu keujüla Ammon nyithu na nghena khang mtsü lethu, hi ghola no kiqachi ben.

¹² Kempvüza sa nu lebenzüyalo! Ithu nyithu nu Anyiza nyunutithu ghena apiketsü sala ssikesalina. Apvüwa kemeshen ti sakeyawa salo!”

¹³ Joab nu ma nyithu na atujügüla ssisa wa, nu Siriya nyithu na bvüa.

¹⁴ Ammon nyithu na Siriya nyithu bvü keten kemu wi mathu na Abishai wina kheneng bvüsen anyunutiwa wi dua. Tsaseng wi Joab na Ammon nyithu ssikesa wina kheneng sen Jerusalem wi wha.

¹⁵ Siriya nyithu na mathu Israel nyithu ncha ladha kesa chüya, tsalina mathu süpahithu tsüdi cighuya.

¹⁶ Kadimiwa Hadadezer na nyu kesun pi Eufrat Ghaku na nishuwa keben Siriya nyithu na gholo kesa kiza wa thsü, nu Zoba wi kadimiwa Hadadezer süpahizi benchüwa Shobak na aliwa sala mathu na Helam wi gho.

¹⁷ David na tsü zakeya wi ma Israel süpahithu saghuya nu Jordan Ghaku pvüdhi sen Siriya nyithu na ma kepeghewa mathu pen kiden sen keben Helam witsü wa. Ciwi kesali shu

¹⁸ nu Israel nyithu na Siriya nyithu süpahizi jügü neng. David nu ma nyithu na Siriya gorugari kessithu meza tagü nu goru kessithu hazar jügha pathia, nu mathu na ghinyi benchüwa Shobak mesa-mena, nu ma aghikesapen wi shüa.

¹⁹ Kadimiwa Hadadezer kekhu wi kebenthu na mathu Israel nyithu ncha ladha kesa chükeya wi mathu na Israel nyithu ssinu gweghe kemehaiwa sa nu mathu kekhu wi ben wa. Tsaseng wi Siriya nyithu na Ammon nyithu kiqa messi wa.