2 SAMUEL 1 - Kemethajüh (N) (Re-editing) Bible (BSI)

David na Saul Keshü Chükeya

¹ Saul keshü seng wi David na Amalek nyithu miwi khangya nu kheneng gho Ziklag wi ghanan keni ben.

² Dhitsüwa wi Saul kemnanpen wina kepvüza nyi kesü na gho cuya. Ma ahathakina ghena ma thsümeni mezüqhe nu ayyinikhu pi ma li miwi chi pvü gho. Ma David wi wha nu ma kekü wina ayyi wi nkhwendu.

³ David na ma wi keü, “No khiewa na gho nu?” Ma luneng, “Hi Israel nyithu kemnanpen wina bvüyale.”

⁴ David na khi, “Khati sadha khe hi kizalo.” Ma luneng, “Ithu süpahizi kejon na aghi kesapen wina bvüdha, nu anyi la kejon na shüdha. Saul nu ma tsawa Jonathan la pathidhale.”

⁵ David na ma wi keü, “No khatinu Saul nu Jonathan manyi na shüdhale kesa chüben nu?”

⁶ Ma luneng, “Hi Gilboa Yikha miwi wayale, nu ciwi Saul na ma pie miwi keleki ben nu aghinyithu gorugarithu nu goru kessithu na ma tetsaki gho keten muyale.

⁷ Isanan ma khapeghe ghangchi nu hi muya nu hi cichi. Hi luneng, ‘Kediwa, hi hewi benle!’

⁸ Ma hi thowa khe keü, nu hi Amalek nyi kesü le kesa ma wi kiza.

⁹ Tsaseng wi ma khi, ‘Hewi ghola hi pathilo! Hi mesa-mena ntsa sadha, nu hi shü wa tendha na.’

¹⁰ Tsalina hi wala ma pathia, kepaghenanye ma mesa-mena keya seng wi tsü ma hangya nbendha kesa hi chüti kesalina. Tsaseng wi hi ma li wi ma kadiliwen nu ma hacü keqhan tsü khuya nu sen he no wi gho benle, kediwa.”

¹¹ David na ma hathakina wina ma thsümeni mezüqhe, nu ma nyithu tsüdila tsü makesü sa.

¹² Mathu na Saul, Jonathan, Israel nyithu, nu Apvüwa nyithu kejonla aghi wi shü kesalina qai, anongü, nu minulen kecu wi kezi sa.

¹³ David na kepvüza nyi kesü jühtheü sengho ma kecüwa wi keü, “No thowa, khiewa na ghoben nu?” Ma luneng, “Hi Amalek nyi kesü, isala hi no diyyiwa wi hangtenle.”

¹⁴ David na ma keü, “No khatinu Apvüwa na kessiya kesawa kadimi tsü pathi nmessi kwe?”

¹⁵ Tsaseng wi David na ma nyi kesü cichi nu khi, “Ma pathilo!” Anyi tsüna Amalek nyiwa tsü whengshi nu pathia,

¹⁶ nu David na Amalek nyiwa wi khi, “No ketanla ha sengho nmiwi chikeyale. No Apvüwa na kessi pi kadimi kesawa pathidhale kekhishi wi no ketanla no meshensadha.”

David na Saul nu Jonathan Kiqaiki

¹⁷ David na Saul nu ma tsawa Jonathan ghena anonkegü khwi ha sa,

¹⁸ nu tsüpi Judah nyithu sansi cülo ahza khuchia. (Hana Jashar Lesüshen wi zhütheng.)

¹⁹ “Israel yyishiphon thu miwi ithu ccülikesathu na shüdha! Ithu süpahi aghikekhang ntsathu na shüdha!

²⁰ Tsüpi Gath nyelela Ashkelon lentontithu wi nthangchi lalo. Filistin nzathu sapi anonghe nsa thsüla; Anyiza nkechü ngathu ya anonghe nsa thsüla.

²¹ ‘Atsankegho nyelela akejan na Gilboa yyishiphon thu miwi nkeghowa salo; allithu wi keshüthangla mangla nkeshigüwa salo. Kepaghenanye aghikekhang tsonhithu na ciwi kejügheyala ben; nu Saul tsonhi na adeli pi matsi nsaladha.

²² Jonathan lamugho na keshü thsü ji, Saul njünnu na nanketizen nmi, kekhangwa süthia, nu aghinyi pathia.

²³ “Saul nu Jonathan manyi ketizenli na amankesa ntsa; kahang wi le keshü wi lela manyi gweghe; amumu miwi mbhi, nu ssensitemi miwi züki.

²⁴ ‘Israel nzathu na Saul ghena anongü! Ma athsü menkedhu nmiepheü pi nthu mphi thsü, nu alon menkedhu nu suna pi nthu tsisa pvü thsü.

²⁵ “Süpahi kekhangthu na qancadha, aghi wi mathu pathia. Jonathan na yyishiphon thu miwi shüben.

²⁶ ‘Hi nghena ahathana benle, icünyuwa Jonathan; no khatila hi tizen gho nu! No hi ketizen khatila amansa nu, nza ketizen miwi lela mehaiki le!

²⁷ “Süpahi kekhangthu na qancadha, mathu ghighethu teshi pi nkesenwa sadha.”