2 PITOR 3 - Kemethajüh (N) (Re-editing) Bible (BSI)

Apvüwa Ghoketen Kekhishi

¹ Hi ketizenthu, hawa ha khili ilesü keni tughuwa zhü pi nthu cübendha. Hi nthu yala kemeshen metha shhughoya thsüle kesalina hi keni tughu qho pala hathu pi nthu kiza neng ben.

² Nthu ya kheni atusenjüh- kechüthu na kekhi jüh, nu Apvüwa nu Hangshawa jühkhukechi nthu apostelthu na pi nthu kecü tsü meshenya thsü mvuben.

³ Atuwa sa, asakhen tsathang wi anyi pahan na nyu nankeqhe nu mathu sajjü kenen wi kahang nyi na shhugho ben kesa nthu chüyalo. Mathu na nthu nankeqhe,

⁴ nu keüben, “Ma gho neng benle khishikechi tsü khati sadha nu? Ma khiwa ben nu? Ithu bathu na shüdha, isala pala tsüdila kheni ayyi sachi tegü wi makesü saben le!”

⁵ Mathu na aghandu kheni Anyiza na ajühkhuchi nu atssan ayyi sa keya jjügi tsü nkechüghe saben. Ayyi ha atssü wina nu atssü sen nu sachi,

⁶ nu kheneng atssü pi kheni yyi kaghawenwa tsü danbhon nu yasa thsüa.

⁷ Isala Anyiza jühkhukechi tsü makesü wina atssan nu ayyi khili kebenwa ha anni pi yasa le kesalina noncca senben, nu tsü pi anyi Anyiza nkechüthu jühkaghaten nu yasa keten tsathang tsü ghena theng.

⁸ Isala ipvüshangthu, pala kesü nmali lalo. Apvüwa tu wi tsü ghanan kesü tsüna amapi hazar kesü ti, nu amapi hazar kesü tsüna ghanan kesü ti le!

⁹ Anyi pahan kemeshen ti Apvüwa na ashina ma jühkhukechi tsü sa nten. Tsüti kesawa nye, ma nthu ghena lebensie ben, kepaghenanye ma anyi kesütanla pi yasa thsü kesawa nyela tsüdila mathu kesami wina kheneng gho thsü mvuben.

¹⁰ Isala Apvüwa tsathangwa tsüna kaghanfü ti ghoaden. Tsü tsathang wi atssan na ahhai sa sen nu nmila, nu ciwi kebenthu tsü mecang nu yasa ben; ayyi nu ciwi kebenthu tsüdila nmila ben.

¹¹ Pala hathu tsüdila hati nmila ben lethu, nthu anyithu tsü khati kesa-u nu? Nthu kahang metha nu pi Anyiza kecü-u,

¹² nthu Anyiza tsathangwa tsü hie keben ti nthu piketsü sa nu tsü ya wan gho thsülo — tsü tsathang wi atssan mecang nu yasa ben, nu sah ntsa kesalina ciwi kebenthu tsüdila tssüzigheaben.

¹³ Isala ithu na Anyiza khishi ketheng ketsatan nyi wa hang keten atssan nu ayyi ketheüwa tsü hieben.

¹⁴ Tsalina ipvüshangthu, nthu na atsathang tsüwa hie keben jü wi nthu piketsü sala metha nu Anyiza tu wi kemeshensa nmi, nu ma gweghe kemehai sayalo.

¹⁵ Anyiza na kemetsa pi ithu cünyuwa Paul cü nu ma zhü pi nthu kecü tsüti ithu Pvüwa leben kesie na nthu hangshaya kemehai matsü pi cü keben tsü ghangchilo.

¹⁶ Ma ha jjügi kekhi wi ma lesü zhü kechi tsüdi wi hati khiden. Ciwi ma jjügi chü kedhu pahan na ben, anyi pala nkechüthu nu kemeshen nkezüthu na ha la pi Ntsawajüh apen kepa wi khizzi keten tsüti saden. Tsalina mathu ketanla mathu keyasawa tsü sengho den.

¹⁷ Isala nthu ipvüshangthu tsü ha chüyadha. Tsalina anyi ayen nkemi kesazzithu ya nthu ssi wa nthu keyazi pen wina khuli nwa thsüle kesalina nthu kiden-kesha yalo.

¹⁸ Isala ithu Pvüwa nu Hangshawa Jisu Khrista cüki kechü nanketizen wi shigü kayi wa keyawa salo. Khili nu anuphanla ma nyanthang keyawa salo! Amen.