2 PITOR 2 - Kemethajüh (N) (Re-editing) Bible (BSI)

Milikemesa Kesansithu

¹ Kheni tsü wi milikemesa tusenjüh- kechüthu na anyithu jawi shhugho, nu tsü makesü milikemesa kesansithu na nthu jawi shhugho ben. Mathu na keyasa, atsentsa nkenye kesansijüh sengho nu mathu khushi keyawa Apvüwa tsü meya mvu sa, isanu mathu ketanla wan keyasa sen nu mathu miwi ghoaben .

² Anyi kejon na mathu hang nkemetha len tsü nie waben; nu mathu kekuli ghena nyu kepathu na Atsentsa lenwa tsü khisaben.

³ Mathu pvükemene wina milikemesa kesansithu na chokemehai wi kekhi cüki pi nthu kiza nu mathu ghena kekiyi saben. Kepaghenanye kheni tsü wina mathu jühkaghaten keten tsü kiden pi thengdha, nu mathu Keyasawa tsüna jen nben le!

⁴ Anyiza na tangnyilo sami kesathu la ntepaghala pi annighajü wi khalachia nu mathu bhen pi kejang wi ajühkekaghaten tsathangwa tsü hieben.

⁵ Anyiza na alamyi yyiwa tsü ntepaghala atssüdan sengho Anyiza nkechü nyithu yyiwa wi tsü chi; ma ciwi ketsatan pi kesansiwa Noah nu kepa wi meshu tagü ketan hangshaya.

⁶ Anyiza na Sodom nu Gommorah nyunutithu tsü meshensa nu anni pi yasa, nu mathu pi Anyiza nkechüthu miwi hati sa keben tsütsonca sacüa.

⁷ Ma Lot anyi ketsatanwa, ayen nmila kahang nyi hang nkemetha yencüki ghena lebennaa kebenwa tsü khushiya.

⁸ Anyi ketsatanwa tsüna mathu ja wi hang nu atsathangla mathu nkemehai kekuli cüki tsü mu nu za pi lebengüccü.

⁹ Tsalina Apvüwa na khati nu ketizen kesa wi ketsatanthu khushiya nu nketsatanthu pi ajühkekaghaten tsathang kemeten-kemesha wi chiaten khe chüben,

¹⁰ tsüthu na mathu sajjü kenen tsü nie nu Anyiza kekhang keben tsü nkhichi saden. Milikemesa kesansithu ha kapvü nu awisa, nu tang anyankethang nyithu tsü nkinyikü, isala mathu kimenni den.

¹¹ Tangnyilothu na milikemesa kesansithu miwi zü nu khangki lela Apvüwa tu wi mathu kekimenni jüh nkhi.

¹² Isala anyi hathu hana mangla meshenshiya nketen aghangsathu na cayathu ghan pi pathi ketenthu tsüti kuliden; mathu na katsüha lela chüshi nkeya tsü shun nu kimenni den. Mathu pi aghangsathu ti yasaden,

¹³ nyu mathu ghena ketizen sa kesa tsüti mathu la ketizen sa thsüden. Aghanan kewegü wi pala katsüha kekuli tsüna mathu sajjü kenenwa; mathu nkemejüghe nu gheshighena pvü nu nthu ja wi nthu gweghe dsajjü keben tsüna mathu choghe nkemehai saben le!

¹⁴ Mathu na keqheza nzathu ketan khe kepa wi mangla ghang mvu nten; mathu kesami sa mvu kebenwa tsü sacenya nten. Mathu anyi kekhang nkemithu tsü lesen bvüden. Mathu leben wi apvükemene ketan. Mathu na Anyiza kishen-keshi kekhu wi bendha!

¹⁵ Mathu alen kemeshonwa tsü teshi nu deja bvüdha; mathu na Balaam tsawa Beor, kesazzi sa nu apisa nen wa kesawa,

¹⁶ nu ma kesami ghena ma khachi kesa lenwa tsü nie bvüdha. Ma gada na anyi jüh khi pi atusenjüh-kechü nmetsahaila kebenwa kekuli tsü khen.

¹⁷ Anyi hathu na awen atssü keqha nu caghamo na mo pi keten akulukeshü ti kesa; Anyiza na kejang ntsa non wi mathu ben kiden pi thengdha.

¹⁸ Mathu kapvü nu kejüphon jüh khiden, nu asajjü kenen hang nkemetha sen nu anyi kesami yyi wi hang kebenthu ja wi na bvüshhu ketenthu tsü die den.

¹⁹ Mathu na keyasa yencüki tssüzü sa ben lela mathu nyu kepa wi lisha chicü ben le khishi den, kepaghenanye anyi kesü pala mangwa na ma miwi khangya khe ma tsü tssüzü sa waden.

²⁰ Keujüla anyithu na ithu Pvüwa nu Hangshawa Jisu Khrista cüki kechü wina ayyi nkemehaiwa kekhang wina bvü shhuya kesa seng wi tsüthu yala mathu miwi khangya thsü lethu, mathu kahang na kheni miwi nansüwa nmehaiki laden.

²¹ Mathu na ketsatan lenwa tsü chüya nu pi mathu kecü kemetha jühkhukechi wi tsüna kheneng bvüa kesa tsü mathu kheni na khiela tsü nkechüwa mathu ghena mehai ntsa sa kesa.

²² Ajühbvü wi hati kekhi tsü mathu ghena ntsakhiwa: “Affü na wa ma keduwe dsa neng waden” nu “Avü na atssükizü pvü wa anisha kunun neng waden.”