2 PITOR 1 - Kemethajüh (N) (Re-editing) Bible (BSI)

¹ Simon Pitor, Jisu Khrista maghawa wina pi ithu Nyiza nu Hangshawa Jisu Khrista ketsatan wina ithu kenondi ti ma men kebenwa pi cü kethengthu wi kechi.

² Anyiza nu ithu Pvüwa Jisu cüki kechü wina nanketizen nu kecca ya nthu pong ntsa keyawa salo.

Anyiza Na Keci Nu Kekissi

³ Ithu ci pi ma ji anyankethang nu kemehai wi saghuya kesawa cüki kechü ghena Anyiza kekhang na ithu ya atsentsa kahang wi hangya thsüle kesa nsenthu keyishü tsüdi pi ithu cüdha.

⁴ Ma hati nu ajüh men kedhu nu kedi khishi pi ithu cüdha, isanu hathu wina nthu yala ayyi ha wi keyasa kesa mvu wina bvü shhuya, nu tang yencüki wi tsü saghuya thsüle kesalina.

⁵ Ha jjügi ghena nthu apiketsü sa nu kemehaiwa pi nthu kenondi wwaya; nthu kemehaiwa wi kechükeza pi wwaya;

⁶ nthu kechükeza wi kekheneng keya pi wwaya; nthu kekheneng keya wi kethankehi pi wwaya; nthu kethankehi wi Anyiza kemessikü pi wwaya;

⁷ nthu Anyiza kemessikü wi cünyunyi ketizenli pi wwaya; nu nthu cünyunyi ketizenli wi kaghali pi wwa yalo.

⁸ Nthu na hathu ha nsenthu yishü ben, nu nthu na hathu ha benya lethu, tsüthu na nthu sa pi ithu Pvüwa Jisu Khrista cüki kechü wi ma men ben nu ma bi bünya thsüben.

⁹ Isala thowa na tsüthu tsü nmi khe ma kemeshen nkemi nu anyon nkemu nyi, nu ma kheni kesamithu wi tsü ma satemethadha kesa malidha.

¹⁰ Tsalina icünyuthu, Anyiza na nthu ci keya nu kessi keya wi tsü ben mvuthi sayale kesa apiketsü salo; isaya lethu nthu khiela kesami wi khuli wa meyacha.

¹¹ Hati nu nthu ya ithu Pvüwa nu Hangshawa Jisu Khrista anuphan Kadiyyi wi tsü duya kemehai kekhang pi nthu cüden.

¹² Tsalina nthu na atsentsawa mukeya tsü chüya nu zükeqhe ghansen yadha lela hi keshüthangla hathu pi nthu kiza neng benden.

¹³ Hi hang keben chu hathu jjügi pi nthu kechü-kenong kesa-u na benle meshen ben.

¹⁴ Apvüwa Jisu Khrista na hi kekiza ti hi wan asajjü kahangwa ha teshia tendha kesa hi chüben.

¹⁵ Tsalina hi keshü seng wi nthu matsü tsüdila hathu ha meshen benya thsüle kesalina hi apiketsü saben.

Anyon Pi Khrista Nyankethang Kemu

¹⁶ Ithu Pvüwa Jisu Khrista na khang ntsa gho keten cüki pi nthu kekiza tsüna ikhang cho kemehai wi kekhi cüki nye, isala ikhang nyon pi ma kedi kemehai tsü muyadha.

¹⁷ Ma Abawa Anyiza wi kinyikü nu anyankethang mukeya, anyankethang kekhang kemisi ntsa wi ahhai kesü hati ma wi kegho wi ikhang na ciwi ben, “Hawa ha hi kaghaliwa iTsa, hi ma nenden!”

¹⁸ Ikhang na ma gweghe kemetha yikha miwi keben wi ahhai ha tang wina kegho ikhang na zaya.

¹⁹ Tsalina ikhang na atusenjüh- kechüthu ketsijüh miwi la kempvüza ben. Nthu na ajüh tsü nondiya lethu kemehaiwa sayaben, kepaghenanye tsüna aghanen thangtheghi npi keshagha chu ahula kecanki kesü ti kejang wi wegü nu aghanen ghotsi kewegü ti nthu leben wi wegüben.

²⁰ Isala tsüdi miwi la anyi thola Ntsawajüh wi atusenjüh-kekhi tsü ma ketanla khimethaya nben kesa meshenyalo.

²¹ Kepaghenanye atusenjüh-kekhi tsü kesüla anyi kemeshen wina ngho, isala Kemetha Ghamu na anyithu miwi ben nu mathu Anyiza wina kegho ketsijüh tsü khi.