2 KHENICÜKI 3 - Kemethajüh (N) (Re-editing) Bible (BSI)

¹ Solomon ba Kadimi David na Kekinyijjen ghena apen kesü kiden pi thengdha. Tsüna Jerusalem wi Moria Yikha miwi Jebus nyiwa Arauna na ma niegi kesa pen witsü. Kadimi Solomon na Kekinyijjen tsü sa shhu,

² tsüna ma kadimi sa keya mapi mejüwa asha keniwa wi.

³ Kadimi Solomon na Kekinyijjen kesawa tsüna kesie meter ngwe nu tagü nu kemeza meter tugu.

⁴ Kedulen keshondhiwa tsüna Kekinyijjen kemeza maben, nu tsüna meter tugu, nu kemisi na meter deni nu mejü. Ajjen keshondhi non mabenla suna kemetha pi nyen.

⁵ Keshondhi tsüna sedar chan ssen nu suna kemehai pi mejju pi matsi sala palm tonthu nu amighe ssüle tsi tontheng.

⁶ Kadimi na Parvaim yyiwi na pvükegho alon menkedhu nu suna pi Kekinyijjenwa tsü tsisa pi mehai ntsa sa.

⁷ Ma suna pi Kekinyijjenwa tsü keshon, kukhi, donbvü, nu ajenkathu nyen. Ajjen keshon miwi sapichüthu na cherubim tsithu hoki theng.

⁸ Keshondhi ndukUwa pi Kemetha ntsawa Pen le khi ketenwa tsüna ma kesie meter tugu nu kemeza meter tugu, tsüna Kekinyijjenwa kemeza tsü maben. Suna metric ton ngwe miwi pi Kemetha ntsawa Pen keshonthu tsü nyen;

⁹ suna gram 570 pi kejentenji sa, nu ajjen-keshondhi tangwa keshonthu la suna pi nyen.

¹⁰ Kadimiwa na ma nyi kepachüthu yala amighe pi cherubim keni la cü nu suna pi tsü meju, nu tsü keni pi Kemetha ntsawa Pen wi chi,

^11-13 ciwi tsü keni pi kedulen wi kaghanglila ngan thsüa. Manyi kesüsü na agisha kenini ben, nu agisha kesüsü kesie na meter 2.2, nu manyi gisha zanshigüpi ajjen keshondhiwa non wi khokho kekidhenli nu pi ma kemeza maben meter tugu tsü whengbhon sen wa ajjen-keshon katen ghapeli kidhen ben.

¹⁴ Athsü pi Kemetha ntsawa Pen jenka keshon tsüna linen nu kepa wi shvu pi atsena, nmiepheü, nu kenmie sa nu ma miwi cherubim tsi keton pi satheng.

Lezza pi kesa Keton keni

¹⁵ Kadimiwa na maketon keni kemisi meter taghamanga nu pahan saya nu tsü keni pi Kekinyijjen tuwi chi. Maketon keni qho ma shoni wi ketonji kesüsü kemisi na meter 2.2 saya.

¹⁶ Maketon shonithu wi amighe ssüleithu pi kemisükili kesa nu ahhibvüthu tsi meza tsisa theng.

¹⁷ Maketonthu tsüpi Kekinyijjen kedulen katen wi chhi; kesü pi acülawa chi nu tsü nyan pi Jakhin, nu kepawa pi aghawa chi nu tsü nyan pi Boaz cia.