2 KADIMITHU 9 - Kemethajüh (N) (Re-editing) Bible (BSI)

Adeli pi Jehu Nyen pi Israel Kadimi Kesathsü

¹ Tsü tsüwi atusenjüh-kechüwa Elisha na atusenjüh-kechü kepvünyi kesü cichi nu khi, “Kidenya nu Gilead yyi Ramoth wi walo. Oliv deli hikhu ha khuya,

² nu no wa ciwi cuya lethu, Nimshi tsawa Jehoshafat tsa Jehu tsü bhayalo. Ma gweghe ketenthu jawi na ma kepa ssinu ajjen keshondhi kesü wi dula

³ oliv deli pi ma li miwi keshuchi nu khi, ‘Apvüwa na adeli pi no nyen pi Israel kadimiwa sa thsüben le pi thangchiben.’ Tsaseng wi no kaghaji ntsa sala apen tsü teshilo.”

⁴ Tsalina atusenjüh-kechü kepvünyiwa na Ramoth wi wa,

⁵ ciwi ma süpahizi kedithu na mehu nu keccünengli kesü sa keben muya. Ma khi, “Kediwa, hi nghena ketsijüh kesü ben le!” Jehu na keü, “No ikhang thowa ccüneng ben nu?” Ma khineng, “Kediwa, no wi khiben.”

⁶ Tsaseng wi manyi gweghe ajjen khenten dua, nu atusenjüh-kechü kepvünyiwa na oliv deli pi Jehu li miwi keshuchi nu ma wi khi, “Apvüwa Israel Nyizawa na thangchiben, ‘Hi adeli pi no inyi Israel kadimiwa le kesa nyenben.

⁷ No npvüwa Ahab tsa kadimiwa tsü pathiaben, isanu hi imaghathu nu atusenjüh-kechüthu pathi kesa ghena Jezebel meten cüle kesalina.

⁸ Ahab theghithu nu shicübvüghathu tsüdila shüaben; hi ma theghi wi npvüza ghanyi le keqhai lela tsüdi nmila thsüaden.

⁹ Hi ma theghi pi Israel Kadimi Jeroboam nu Kadimi Baasha theghithu kesa ti sa cüden.

¹⁰ Jezebel keshü kamang tsüpi vhü nben, isala Jezreel yyiwi affüthu na dsa ben.’ ” Ha kekhi seng wi atusenjüh-kechü kepvünyiwa na ajjen keshondhiwa tsü teshi nu bvüa.

¹¹ Jehu na ma pvüshang kedithu wi wha neng nu mathu na ma wi keü, “Pala tsüdila mangla nsa ma? Mangkesa na anyi kedejawa tsüna no wi gho nu?” Jehu na luneng, “Nthu na ma mangwa yamvu ben khe chüben.”

¹² Mathu na khineng, “Nyele, ikhang na nchüle! Ma mangwale khi nu?” Jehu na khi, “Ma hi kiza la Apvüwa na thangchiben: ‘Hi adeli pi no inyi Israel kadimiwa le kesa nyenben.’ ”

¹³ Tsü meyi Jehu pvüshang kedithu na mathu thsü pi acükha miwi shi nu Jehu yala ma miwi ngan thsü, tutuwa khou nu jisha, “Jehu na kadimiwa le!”

Israel Kadimi Joram Kepathi

^14-15 Tsaseng wi Jehu na Jezreel wi keben Kadimi Joram keshun cho kiden, ma ciwi wa Ramoth wi Siriya Kadimi Hazael ssinu aghisa nu mesa-mena keya yisü tsü mehaiyale saben. Tsalina Jehu na ma pvüshang kedithu wi khi, “Keujüla nthu na hi wiwa lethu, thola Ramoth wina kuthila wa Jezreel wi anyithu nkitsan chila metsilo.”

¹⁶ Tsaseng wi ma gorugari wi duya nu Jezreel wi wa. Joram na ma kesakinaa wi npi mehaiya, nu Judah Kadimi Ahaziya na ciwi ma hhainan ghoben.

¹⁷ Aghikehie kesü na Jezreel wi aghikehie kaghabipen miwi ben nu Jehu nu ma nyithu na gho keten muya nu khi, “Hi anyi pahan goru miwi na gho keten muben le!” Joram na khineng, “Goru kessi- nyi kesü kesun pi wa tsüthu na apvüshangthu la aghinyithu khe chüya thsülo.”

¹⁸ Nyilowa na goru miwi na Jehu wi wa nu ma wi khi, “No apvüshang kesü ti sa gho tenla nye khe kadimiwa na chüya mvu benle!” Jehu na luneng, “Nkutili mangla nmile! Iseng wi walo.” Aghikehie kaghabipen miwi aghihie kebenwa na nyilowa na wala akhangwa tsü cuyadha isala ma kheneng ngho ladhale kesa pi kiza chia.

¹⁹ Nyilo kepawa la kesunchi nu ma wala kishi kekeü tsü makesü pi Jehu wi keü. Jehu na kheneng lunneng, “Nkutili mangla nmile! Iseng wi walo.”

²⁰ Kheneng aghihie kebenwa na nyilowa na wala akhangwa tsü cuyadha isala ma kheneng ngho ladhale kesa pi kiza chia. Nu ma khi, “Akhang tsüwa wi aliwa tsüna Nimshi tsa Jehu ti, ma kedeja nyi kesü ti gorugari tsü ssitenle!”

²¹ Kadimiwa Joram na ahza khuchia, “Hi gorugari tsü kiden chilo.” Nu khathansha wi tsüna kidenya khe ma nu Kadimi Ahaziya manyi papa gorugari wina Jehu metule wa. Manyi wa Naboth lli wi ma metuya.

²² Joram na Jehu mukeya wi keü, “No keccawa ghena ghoten ma?” Jehu na luneng, “Khatinu ciwi njja Jezebel na atsikezhü kekinyi nu kedema kekuli tsüdi sa keben chu keccawa ghena saya mehai nu?”

²³ Tsaseng wi Joram na khapegheya nu Ahaziya wi hati khila bvüa, “Ahaziya, ha nyu kematsa chole!”

²⁴ Jehu na ma lamugho khushiya nu ma kezü tsüdi pi chi nu alakusü pi asengwa na Joram ga pi ma leben wi shu thsüa. Joram na ma gorugari wina qancadu shüa,

²⁵ nu Jehu na ma kekiqawa Bidkar wi khi, “Wala ma kamang tsüpi Naboth lli witsü khalalo. Kheni ishinyi gweghe goru miwi na Kadimi Joram ba Ahab seng wi wa keten wi Apvüwa na Ahab keshun jüh hathu kekhi tsü meshenyalo.

²⁶ ‘Hi ghanie Naboth nu ma tsathu kepathi tsü mule. Nu hi alli hawa wina no meten cüten kesa khishiben.’ Tsalina Apvüwa na khishi ketheng jüh tsü cenya thsüle kesalina wala Joram kamang tsüpi Naboth lli wi khalalo.”

Judah Kadimi Ahaziya Kepathi

²⁷ Kadimi Ahaziya na mangwa khati sadha khe muya, tsalina ma bvüsen Beth Haggan wiwa wa nu Jehu na ma jügü. Jehu na ma nyithu wi “Ma la pathilo” khi, Ibleam nyutiwa kete Gur kewalen kecu wi mathu na ma gorugari jügü wa ma mesa-mena cüa. Isala ma bvü wa Megiddo nyunutiwa cuya nu ciwi shüa.

²⁸ Ma kekhu wi kedithu na gorugari kesü wina ma kamang tsü pvü neng wha Jerusalem, David Nyunutiwa wi kadi shüjjenthu wi vhüa.

²⁹ Ahab tsa Joram na Israel Kadimi sakeya tagha mapi wi Ahaziya na Judah Kadimi saya.

Kadijja Jezebel Kepathi

³⁰ Jehu na gho Jezreel cuya. Jezebel na mangwa khati sadha khe zakeya wi ma nyon nyenya nu ma li hheya, nu kadijjen kukebhi wina alentonti wiwa ghangben.

³¹ Jehu na kaghapeng-jenka wi kedu wi nzawa na khi, “No Zimri! No nyu kepathiwa! No hewi mangwa saten nu?”

³² Jehu na yaki ghang nu jisha, “Thowa na hi wiwa sa nu?” Kadijjen wi kedithu keni kecheng na ajjenkubhi kesü wina yasha ma ghang,

³³ nu Jehu na mathu wi khi, “Nzawa tsü ghan pi hewi khalachilo!” Mathu na ma ghan pi khalachia, nu ma jjü na ajjen-keshon nu goruthu miwi kecenkia. Jehu na ma goruthu nu gorugari ssinu nzawa kamang miwi wa,

³⁴ nu kadijjen wi dula dsajjüya. Tsaseng wi ccüna ma khi, “Kishen-keshi kepvüwa nzawa kamang tsü pieya nu sen wa vhülo, kepaghenanye ma kadimiwa nga kesüle!”

³⁵ Isala ma pi vhüale kewathu na ma li gü, ma ccü, nu ma kwen güthu ketan khe mangla nmula.

³⁶ Mathu na tsüpi Jehu kekiza wi ma khi, “Hawa ha Apvüwa na hati sa ben kesa ma Elijah keccüneng wina khidha: ‘Jezreel yyiwi affüthu na Jezebel kamang tsü dsaben.

³⁷ Ma gwo tsü dezighe pi amesü keku ti sa nu thola tsüna Jezebel le kesa chüshi meyala ben.’ ”