2 KADIMITHU 7 - Kemethajüh (N) (Re-editing) Bible (BSI)

¹ Elisha na luneng, “Apvüwa na mangwale khiben khe kina chilo! Dhitsü wi hathansha wi no Samaria wi rükatssü kesü pi awhengsu kemehai ntsa kilogram kecheng nyelela achentha kilogram tugho shüya mehaile.”

² Kadimi ketsikinawa na Elisha wi khi, “Tsüti saya nben, Apvüwa na ma ketanla wan asu kesunchi lela tsüti saya nbenle!” Elisha na khineng, “No tsüti sa keben muyaben, isala no khiela tsü dsaya nben.”

Siriya Nyi Süpahizi Na Teshikesa

³ Meshu mejü na agükedsakenaa wi ketizen sala Samaria kaghapeng-jenka na ameiwa ben, nu mathu na khokho wi khi, “Mangsale ikhang npi keshü chu hewi hati saben nu?

⁴ Ikhang na anyunutiwa wi du lela ciwi ikhang kaghama ghena khwenthi shüaben; nu hewi ben lela ikhang na shüa tendha. Tsalina ikhang na Siriya nyi kemnanpen wi wa na; mathu na ikhang pathi lethu tsüdha, nyelethu ikhang kahangli heisha cüla mechü.”

⁵ Tsalina atsanjang keshagha wi mathu na Siriya nyi kemnanpen wi wa, isala mathu na wa tsü cukeya wi anyi thola ciwi nbenla.

⁶ Apvüwa na Siriya nyithu sapi süpahizi keti na goru nu gorugarithu ssigho keten hhai ti kesa zaya thsü, nu Siriya nyithu kemeshen na Israel kadimiwa na Hitti nu Ejipt nyi kadimithu nu mathu süpahizi ssisen mathu ssikaghashen ghotenle sa.

⁷ Tsalina tsü ghaja Siriya nyithu na mathu nithsüjjen, goru nu gadathu, nu mathu kemnanpen teshi theng nu mathu kahangli ghena bvüa.

⁸ Khathansha wi ma mejü na wa kemnanpen katen cuya khe mathu na nithsüjjen non wi du ciwi dsa nu jjüya, rükatssü suna, nu athsümeni mathu na mukeya tsü khuya nu sen wa kuthi; tsaseng wi mathu na kheneng nithsüjjen kepa wi du tsü makesü sa.

⁹ Isala tsaseng wi mathu na khokho wi khi, “Ikhang na hati sa yishüle! Ikhang ketanla hapi ikhang ghena ketan thengya yishü, ha ikhang ghena jühtheü kesü. Keujüla ikhang na ghanen kecu hie benla nu tsüpi nyu kiza lethu, ikhang meten cü metsiben. Ikhang na khili wala kadimiwa kedithu kiza na!”

¹⁰ Tsalina mathu na Siriya nyi kemnanpen tsü teshi nu Samaria wi wa neng, nu kaghapeng-jenka wi aghikehiethu cishi chi nu khi, “Ikhang na Siriya nyi kemnanpen wi wa nan anyi kesüla nmu nu ahhai mangla za meya; goru nu gadathu na nlisha, nu Siriya nyithu na nithsüjjenthu teshi kesa tsüna ben le.”

¹¹ Aghikehiethu na jühtheü tsüpi jisha chia nu tsüna khi wa kadijjen cua.

¹² Tsüna aghaja saben, isala kadimiwa na awe wina shagha nu ma kedithu wi khi, “Siriya nyithu na khati kiden ben khe hi nthu kiza den! Mathu na hewi azeng cüki ha chüben, tsalina mathu kemnanpen tsü teshi nu wa agheja wi kuthi ben. Mathu kemeshen na ithu anyunutiwa tsü teshi nu kedsakejjü bha wathu, mathu na ithu kahang ghanya nu anyunutiwa ha nkayale saben.”

¹³ Ma kekhu wi kedithu kesü na khi, “Anyunuti hawi anyithu na Israel nyi shü kesathu ti sadha. Tsalina anyi pahan kesun pi hewi goru manga kebenthu ha ssi wa thsü nu khati saben khe ithu na chüya na.”

¹⁴ Mathu na anyi pahan kessiya, nu kadimiwa na mathu kecükegwe pi wala Siriya nyi süpahizi na khati sadha khe chüyalo mathu pi gorugari keni wi kesun chia.

¹⁵ Anyi tsüthu na Jordan kecu wa, nu alenca chuli Siriya nyithu na mathu thsümeni nu atsanqaithu pi teshichi nu bvü kesa muya. Tsaseng wi mathu na kheneng ghola kadimiwa wi kiza.

¹⁶ Samaria wi anyithu na bvü wa Siriya nyi kemnanpen tsü shuya. Nu Apvüwa na khi ketheng ti awhengsu kemehai ntsa kilogram kecheng nyelela achentha kilogram tugho pi rükatssü kesü wi jeü.

¹⁷ Israel kadimiwa na ma ketsikinawa tsüpi kaghapeng-jenka kehiethu wi kediwa sa thsü theng. Kadimiwa na Elisha wi kewa wi Elisha na npi wina khi ketheng ti anyithu na kaghapeng-jenka wi kediwa tsü cüten nu ma ciwi shüa.

¹⁸ Elisha na kadimiwa wi dhitsü wi hathansha wi Samaria wi awhengsu kemehai ntsa kilogram kecheng nyelela achentha kilogram tugho pi rükatssü kesü wi jeü benle kesa kiza,

¹⁹ ciwi kediwa tsüna luneng, “Tsüti saya nben, Apvüwa na ma ketanla wan asu kesunchi lela tsüti saya nben le!” Nu Elisha na khineng, “No tsüti sa keben muyaben, isala no khiela tsü dsaya nben.”

²⁰ Nu ntsakhiwa ma miwi tsüti sa, tsüna anyithu na anyunutiwa kaghapeng-jenka wi ma cüten nu ma ciwi shüa.