2 KADIMITHU 5 - Kemethajüh (N) (Re-editing) Bible (BSI)

Naaman na Mehaikeya

¹ Naaman, Siriya nyi süpahizi benchüwa tsüna Siriya kadimiwa na ma kinyikü nu meshen pi misi ntsa saden, kepaghenanye Naaman wina Apvüwa na khangkeya pi Siriya nyi süpahithu cü. Ma süpahi kedi kemehai kesü, isala ma agükedsakenaa pvüden.

² Mathu na Israel yilashu kewa kesü wi Siriya nyithu na Israel nyi lanyi kesü ssigho ma pi Naaman wubvü maghale kesü sa thsüa.

³ Ghanan kesü lanyiwa na ma pvüwa wubvü wi khi, “Hi ipvüwa yala Samaria wi hang keten atusenjüh-kechüwa wi wa thsü mvu benle! Ma ma gükedsakenaa tsü sapi mehai cüaben.”

⁴ Khathansha wi Naaman na ha zaya khe ma kadimiwa wi wa nu lanyiwa na kekhi tsüpi ma kiza.

⁵ Kadimiwa na khi, “Israel kadimiwa wi wa nu lesükezhü ha sen wa ma cülo.” Tsalina Naaman na rükatssü abe changha, suna abe hazar tugho, nu athsümeni kemili ji kemehai abe tagha khuya nu wa.

⁶ Ma lesükezhü khukeya tsüna hati zhü theng: “Lesükezhü hawa ha ikekhu wi kediwa Naaman cüki khiben. Hi no yala ma gükedsakenaa tsü sapi mehaiya thsü mvu benle.”

⁷ Khathansha wi Israel kadimiwa na lesükezhü tsü siya khe ma thsümeni mezüqhe nu khi, “Khatinu Siriya kadimiwa na hi anyi ha sapi mehai kecü ghangya mehai nu? Ma hi kahang nu keshü kekhang kebenwa Anyiza le meshen ben kwe? Ma hi ssinu kitagha keben mutiya keben hana!”

⁸ Atusenjüh-kechüwa Elisha na mangwa khati sa khe zakeya wi ma ajüh pi kadimiwa wi kesunchi: “Mangkesa na athsümeni mezüqhe ben nu? Anyi tsüwa tsü kesun pi hi wi chilo, hi Israel jawi atusenjüh-kechü kesü benle kesa pi ma ccücaten na!”

⁹ Tsalina Naaman na ma gorugari nu goruthu ssi wala Elisha jjen kedulen wi ngan ben.

¹⁰ Elisha na amagha kesü kesun pi ma wala ma ketanla Jordan Ghaku tssü witsü tagü tughu tensha yalo, isathu ma agükedsakenaa tsü mehaitha yaben na kesa ma kiza thsü.

¹¹ Isala Naaman na ma lebentsu nu hati khila bvüa, “Hi kemeshen tsü ma shhughola hi metu, Apvüwa ma Nyiza wi kekhie sa, ma kwen pi hi kinaa ben wi chi nu hi sapi mehai cüa benshe sa nan!

¹² Tsümiwi Damaska wi aghaku Abana nu Pharpar na Israel ghakuthu miwi kemehaiki nmi kwe? Hi ciwi atssükizü nu sapi mehaiya kesale!”

¹³ Ma maghathu na ma wi wa nu khi, “Kediwa, keujüla atusenjüh-kechüwa na no pala kedhu pahan salo kiza lethu, no tsü kesaule. No mangkesa na khili wa ma kekhi ti no ketanla atssü wi no tenshaya nu sapi mehaiya nsa nu?”

¹⁴ Tsalina Elisha na kekhi ti Naaman na Jordan Ghaku wi cü ma ketanla atssü non wi tagü tughu du tensha nu ma mehaitha ya. Ma sa na züya nu mehai pi meme gwo ti sa.

¹⁵ Ma ma nyithu tsüdi ssinu Elisha wi gho neng nu khi, “Hi khili Israel Nyizawa ketan khe ciwi acenpvü kepa wi nmi kesa chüyadha; tsalina kediwa, nchala hi wi aju kesü ha khuyalo.”

¹⁶ Elisha na luneng, “Hi ma kekuli sa keten, hangkebenwa Apvüwa nyan wina hi aju kesüla ya nbenle kesa kishenben.” Naaman na ma tsü khuyalo khvu sa lela ma tsü meyala.

¹⁷ Tsalina Naaman na khi, “Keujüla no iju ha meya mvu lethu, hi yala ayyi gada khhi keni pvü nu hi gweghe ajjen wi wha thsülo, kepaghenanye hi khili nten na Apvüwa wi ketan khe acenpvü kepa wi ahhanshathu sa nyelela mecang pi kekinyithu nsadha le.

¹⁸ Tsalina hi khathansha wi hi kadimiwa gweghe Siriya cenpvü Rimmon kekinyijjen wi wa ma kinyi khe Apvüwa na hi kesami teshi cüben kesa nondiben. Apvüwa na hi kesami teshi cü metsiben!”

¹⁹ Elisha na khi, “Nleben cca whalo.” Nu Naaman na bvüa. Ma kesie npi wayala,

²⁰ Elisha maghawa Gehazi na ma ketanla khi, “Ipvüwa na Naaman ya mangla pi ma ncü thsüla bvü thsüdha le! Ma Siriya nyi na mang pi ma cü khe khuya kesau. Apvüwa na hangkeben ti hi ma jügü wa nu ma wi pala pahan khuyaden.”

²¹ Tsalina ma Naaman jügü wa. Khathansha wi Naaman na anyi kesü ma jügü keten muya khe ma gorugari wina cacü ma metu nu keü, “Pala pahan sazzi kwe?”

²² Gehazi na luneng, “Nyele, isala ipvüwa na hi kesun pi no wi Efraim diyyiwa yyishiphon wi atusenjüh-kechü khang wi meshu keni na khili ghoben, nu ma no yala rükatssü abe hazar kecheng nu kemili thsümeni kemehai keni pi manyi cü thsü mvu benle kiza thsüben.”

²³ Naaman na khineng, “Nchala, rükatssü abe hazar tugho khuyalo.” Ma tsü khi khvu sa, rükatssü tsüpi ajula keni wi chi, nu kemili thsümeni keni pi ma magha keni cü, nu manyi kesun pi Gehazi tuwi na wa thsüa.

²⁴ Mathu na khathansha wi wa Elisha kahang pen yyishiphon tsü cuya khe Gehazi na ajula keni tsü khusen ajjen non wi dua. Tsaseng wi ma Naaman magha keni tsü kesun pi wha neng thsüa.

²⁵ Ma ajjen wi kheneng du, nu Elisha na ma keü, “No khiewa wa nu?” Ma luneng, “Kediwa, hi khie wila nwale.”

²⁶ Isala Elisha na khi, “Anyi tsüwa na gorugari wina cadugho no kemetu witsü hi aghamu wina ciwi nben kwe? Matsü hawa wi ha apisa nu athsümeni, oliv sanku nu kemeshentsse llithu, khaghaneni nu amesüsi, nyelela amaghathu keyau nyele!

²⁷ Tsalina khili Naaman gükedsakenaa tsüna nmiwi gho nu anuphanla nshicübvüghathu miwi benben.” Gehazi na bvü keten wi ma gwo wi agükedsakenaa tsüna ben, nu ma hyu na aghola ti mikidhi sa.