2 KADIMITHU 3 - Kemethajüh (N) (Re-editing) Bible (BSI)

Israel nu Moab jüwi Aghikesa

¹ Judah Kadimi Jehoshafat na kadikesa mapi tagha nu tazen wi Ahab tsa Joram na Israel Kadimi saya, nu ma Samaria wi amapi taghakeni kekhang sen.

² Ma sami pi Apvüwa shun, isala ma ma ba nu ma jja Jezebel ti tsü nmehai nsa; ma ma ba na Baal kekinyi ghena atsiketon sa ketheng tsü zansha.

³ Isala ma tuwi Nebat tsa Kadimi Jeroboam ti ma Israel ssi wa kesami wi chia nu tsü khen meyala.

⁴ Moab Kadimi Mesha na khaghanenithu kicen nu amapi kaghapenla khaghaneni zza 100,000 nu khaghaneni 100,000 wi ssenthsü pi keküju sapi Israel kadimiwa cüden.

⁵ Isala Israel Kadimi Ahab keshü seng wi Mesha na Israel matang nu shun shagha.

⁶ Kadimi Joram na wan Samaria teshi nu wa ma süpahithu tsüdi saghuya.

⁷ Ma ketsijüh pi Judah Kadimi Jehoshafat wi kesunchi: “Moab kadimiwa na hi matang nu shunben; no ghola hi gweghe nu ma ssisala nu?” Kadimi Jehoshafat na khineng, “Hi no gweghe waben. Hi no kiqa ben, nu inyithu le igoruthu lela tsüti sa ben.

⁸ Ithu na alen khiewa na wa ma ssisa nu?” Joram na luneng, “Ithu na Edom ghansha lenwa tsü pvüdhi sen nu wa na.”

⁹ Tsalina Kadimi Joram nu Judah nu Edom kadimithu na gweghe wa. Mathu na ghanan tagü alenketsen seng wi mathu na atssü nmila, nu ciwi anyithu nu asahangthu ghena la nmitha sa.

¹⁰ Kadimi Joram na khi, “Ithu na cendha man! Apvüwa na kadimi hi kecheng saghu pi Moab kadimiwa kwen wi chidha le!”

¹¹ Kadimi Jehoshafat na keü, “Hewi ithu na atusenjüh-kechüwa wina Apvüwa ccüneng ya kemehai kesüla benla nu?” Kadimi Joram kedi kesü na luneng, “Shafat tsa Elisha na hewi ben. Ma Elijah kekiqawa sale!”

¹² Kadimi Jehoshafat na khi, “Ma atusenjüh-kechü tsentsa kesü le!” Tsalina kadimi kecheng na Elisha wi wa.

¹³ Elisha na Israel kadimiwa wi khi, “Mangsale hi no kiqa nu? Wala nba nu njja na ccüneng kegho atusenjüh-kechüthu tsü ccüneng nanlo.” Joram na khi, “Nyele, Apvüwa na kadimi hi kecheng saghu pi Moab kadimiwa kwen wi chidha.”

¹⁴ Elisha na luneng, “Hi ma kekuli sa ketenwa, hangkebenwa Apvüwa nyan wina kishenben, keujüla hi Judah Kadimi Jehoshafat no gweghe ketenwa ha nkinyikü lethu, hi no ssinu mangla sa nkesa le.

¹⁵ Khili akhwikechü nyi kesü pi hi cülo.” Akhwi kechüwa na ma harp kekhou wi Apvüwa kekhang na Elisha miwi dugho,

¹⁶ nu ma khi, “Apvüwa na hati khiben: ‘Aghaku katen keqha hawi ayyiku chhü kevüli yalo.

¹⁷ Nthu na atsankegho nyelela ameghü nmu lela aghaku katen hawi atssü na pong aben, nu nthu, nthu mesüsithu, nu asahang kepathu la atssü kejjü kejon muyaben na.’ ”

¹⁸ Nu Elisha na khiwa, “Isala ha Apvüwa ghena lekete; ma Moab nyithu miwi khangkeya la pi nthu cüben.

¹⁹ Nthu na ma khwetivü ketheng nyunuti tsikemehai tsüdila nkayaben; nthu na mathu kedsau tonthu tsüdila shüchi, mathu tssükebvüpen tsüdila khen, nu mathu lli ayyi kemehai tsüdi wi alon pi pong nu yasa ben.”

²⁰ Ghanenwa wi aghanen hhansha sa keten tsüwi atssü na Edom wina llesen dugho ayyiwa tsü pongya.

²¹ Khathansha wi Moab nyithu na kadimi kecheng na mathu ssisale ghoben le kesa zaya khe, mathu ghanyiwa na wa keqhaiwa kecu aghighe pieya kemehai nyi tsüdi cipi aggü wi apenza saya.

²² Mathu na pitsü ghanenwa wi shagha nan aghani na atssü miwi wegüki pi ajjü ti nmieni keben muya.

²³ Mathu na khi, “Ha ajjüle! Aghinyi süpahithu na khokho kesali nu kepathili benla metsidha! Ithu na wala mathu kemnanpen shuya na!”

²⁴ Isala mathu na wa kemnanpenwa cukeya wi Israel nyithu na mathu ssisa nu mathu jügü neng. Israel nyithu na Moab nyithu jügüki nu pathi,

²⁵ nu mathu nyunutithu yasa. Mathu na alli yyikemehai kesü pvüdhi kewa wi Israel nyi kesüsü tsüdila alon pi cühchi nu asakhen wi alli tsüdi wila alon na pong; mathu na atssükebvüpenthu la khen nu kedsau tonthu shüchia. Asakhen wi ghazen nyunutiwa Kir Hares tsü ketan sa, nu anyi ali la kepiethu na wa tsü la vüya nu tsü ssisa.

²⁶ Moab kadimiwa na ma aghi wi khangya ntendha kesa chükeya wi ma njünnu kepie nyi meza tagü ssiya nu aghinyi jawi bvüghe sen Siriya kadimi wi bvüale sa lela sa meyala.

²⁷ Tsalina ma ma tsa tssütsewa ma shiwa sa kadimi sa ketenwa tsü ssiya nu wa ma pi anyunutiwa khweti miwi ahhansha sapi Moab cenpvü tsü cüa. Israel nyithu na qhethiketen nu anyunutiwa wina kheneng sen mathu diyyiwa wi wha neng.