2 KADIMITHU 24 - Kemethajüh (N) (Re-editing) Bible (BSI)

¹ Jehoiakim na kadimiwa sa keben wi Babylonia Kadimi Nebukhadnezzar na Judah nkagho, nu amapi kecheng Jehoiakim meten pi ma kekhang kesen kekhu wi ben thsüa; tsaseng wi Jehoiakim na ma matang shagha.

² Apvüwa na Babilon, Siriya, Moab, nu Ammon nyithu süpahizithu kesun pi Judah yasa thsüale Jehoiakim shun thsüa, tsüna Apvüwa na ma tsüti sa benle kesa ma magha atusenjüh-kechüthu wina khi theng.

³ Hawa ha Kadimi Manasseh na kesamithu kesa tsüdi ghena Apvüwa tuwi Judah nyithu khu piale kesalina Apvüwa jüh kenie wina sa,

⁴ nu tsüdi miwi ma anyi kesami nkemithu tsüdi pathi kesa ghena. Apvüwa na tsüghena kesami teshi pi Manasseh cü meyala.

⁵ Jehoiakim na kekuli cükithu tsüdila Judah kadimithu cüki kezhü wi zhü theng.

⁶ Jehoiakim na shü, nu ma tsa Jehoiakhin na ma shiwa sa kadimi saya.

⁷ Ejipt kadimiwa nu ma süpahizi na khiela Ejipt thenkeghe sen nu amei wi nshula, kepaghenanye Babylonia kadimiwa na khili Eufrat Ghaku na wa Ejipt na aghawa kemeggü yyi kheni Ejipt ji sa kegho tsüdi miwi kekhang senyadha.

Judah Kadimi Jehoiakhin

⁸ Jehoiakhin na ma kahang mapi tagha nu tazen wi Judah kadimiwa saya, nu ma asha kecheng Jerusalem wi kekhang sen. Ma jja na Jerusalem wina keghowa Elnathan nga Nehushta.

⁹ Ma ba tsütsonca kenie wina Jehoiakhin na sami pi Apvüwa shun.

¹⁰ Hawa ha ma kadikesa tsüwi Kadimi Nebukhadnezzar kekhu wi kedithu na Babilon nyi süpahizi ssisen wala Jerusalem shun nu tsü vüya.

¹¹ Vüsen keben wi Nebukhadnezzar ma ketanla Jerusalem wi du,

¹² nu Kadimi Jehoiakhin na ma jja, ma tsathu, ma kekhu wi kedithu, nu kadijjen wi kedithu gweghe Babilon nyithu kwen wi dua. Nebukhadnezzar na kadikesa mapi tazenwa wi ma Jehoiakhin ghan pi atssüzü saya,

¹³ nu Kekinyijjen nu kadijjen wi keben tsüdi pvü nu Babilon wi wa. Apvüwa na npi wina khi ketheng ti Kadimi Solomon na Kekinyijjen wi kesen ji suna pi ahyikhuthu kesa tsü Nebukhadnezzar na tsüdila pakhhia.

¹⁴ Nebukhadnezzar na Jerusalem nyithu, kadi tsangathu tsüdi, nu anyi paghangthu tsüdi saghu hazar tagha ghan pi atssüzüthu sala ssi bvüa. Ma Judah wi anyi ketha-u ntsathu ketan teshitheng nu kekuli nyi sapichüthu tsüdi pi amighekecüthu saghu ghan sen nu bvüa.

¹⁵ Nebukhadnezzar na Jehoiakhin pi ma jja, ma wubvüthu, ma kekhu wi kedithu, nu Judah wi anyi paghangthu ghan pi atssüzü sa sen bvüa.

¹⁶ Nebukhadnezzar na anyi kemechanthu hazar tagü, nu anyi kekuli sapichüthu pi amighekecüthu saghu hazar kesü, mathu tsüdila akhüton mehaitsü aghisaya kemehai nyi tsüdi kesun pi Babilon wi chia.

¹⁷ Nebukhadnezzar na Jehoiakhin biza Mattaniya pi Judah kadimiwa sa thsüa, nu ma nyan kemiyili pi Zadekiya sa.

Judah Kadimi Zadekiya

¹⁸ Zadekiya na ma kahang mapi ngwe nu kesüwa wi Judah kadimi saya, nu ma Jerusalem wi amapi taghakhen kekhang sen. Ma jja na Libnah nyunutiwa wina keghowa Jeremiya nga Hamutal.

¹⁹ Kadimi Jehoiakhin na kesa ti Kadimi Zadekiya la sami pi Apvüwa shun.

²⁰ Apvüwa na Jerusalem nu Judah nyithu miwi aghepvü ntsa sa nu ma tuwi mathu khu pia.