2 KADIMITHU 22 - Kemethajüh (N) (Re-editing) Bible (BSI)

Judah Kadimi Josiya

¹ Josiya na ma kahang mapi tazen wi Judah kadimi saya, nu ma amapi changha nu kesü Jerusalem wi kekhang sen. Ma jja na Bozkath nyuti wina keghowa Adaiya nga Jedida.

² Josiya na Apvüwa kenenwa tsü sa; nu ma baqhai Kadimi David tsütsonca tsü nienu Anyiza yenthu tsüdila nie kaketsü sa.

Ayenwa Lesüshen Tsü Mukeya

³ Kadimi Josiya na kadikesa mapi tagha nu tazenwa wi ajühkekaghatenpen wi kezhüwa Meshullam tsa Azaliya tsawa Shafan kesun pi hati khila Kekinyijjen wi chia:

⁴ “Keqhaikedi ntsawa Hilkiya wi wala keqhaikedithu na Kekinyijjen kedulen wi kekuli sa keben wi anyithu wi apisa khaju saghuya khe tsü cüki kezhü tsü khuyalo.

⁵ Apisa tsüpi anyi Kekinyijjen sapfü keben tsü kaghangthu cülo ma kiza lo. Mathu na tsüpi

⁶ achankecüthu, ajjenkesathu, nu alonkahathu cüben; nu pi kesapfü wi kesen ghena achan nu alonthu shüben.

⁷ Kekuli tsü keghangthu na atsentsa ntsa nyi, tsalina mathu wi apisa cüki kezhü tsü n-ghangla mehai.”

⁸ Shafan na kadimiwa na ahza khukechi tsüpi Hilkiya cüa, nu Hilkiya na ma Kekinyijjen wi Ayenwa lesüshen tsü muyale kesa pi ma wi kiza. Hilkiya na lesüshenwa tsüpi ma cüa, nu Shafan na tsü si.

⁹ Tsaseng wi ma kadimiwa wi wha neng nu tsüpi ma wi kiza: “Nmaghathu na Kekinyijjen wi apisa khuya nu tsüpi ajjen sapfü keben tsü keghangthu kwen wi chidha.”

¹⁰ Tsaseng wi ma khi, “Hi Hilkiya na lesüshen kesü pi hi kecü tsü hewi benle.” Nu ma kadimiwa wi tsü misikhhali sichi.

¹¹ Khathansha wi kadimiwa na lesüshen tsü sikeben zaya khe ma hathakina wina ma thsümeni mezüqhe,

¹² nu ahza pi hathu cü, keqhaikediwa Hilkiya, Shafan tsa Ahikam, Mikaiya tsa Akhbor, ajüh kekaghatenpen wi kezhüwa Shafan, nu kadimi ketsikinawa Asaiya:

¹³ “Wala ighena nu Judah nyithu tsüdi ghena lesüshen hawa wi kesansijüh cüki pi Apvüwa wi kecenkinali nanlo. Apvüwa na ithu miwi aghepvü ben, kepaghenanye ithu bamyithu na lesüshen hawa wi salo khi kebenwa tsü nsa lale.”

¹⁴ Hilkiya, Ahikam, Akhbor, Shafan hathu na wala nza atusenjüh-kechü kesü Jerusalem wi apen ketheü wi hang ketenwa ma nyan Hulda wi kecenkinali. (Ma wuba Shallum na Harha tsa Tikva tsawa, ma Kekinyijjen wi athsümenithu tsü keghangwa.) Mathu na pala khati sadha khe tsü cüki khipi nzawa kiza,

¹⁵ nu nzawa na mathu na kadimiwa wi wha neng

¹⁶ nu Apvüwa wi ketsijüh hapi ma cülo kiza : “Kadimiwa na lesüshen hawi zhü ketheng sikeya ti hi Jerusalem nyithu tsüdi meten cüden.

¹⁷ Mathu na hi meya mvula nu ahhanshathu sapi acenpvü kepathu cü, nu mathu kekuli tsüdi wi ilebenketsu cüssidha. Ilebenminu ntsa pi Jerusalem shun ben, nu tsüna gha nben.

¹⁸ Kadimiwa ghena hi, Apvüwa Israel Nyizawa na ha khiben: No lesüshen hawi zhü ketheng tsü kinayalo,

¹⁹ nu no khathansha wi hi Jerusalem nu ma nyithu meten cüle khiteqhe keben ha zaya khe nleben khapegheya nu ituwi no satemeniya, nthsümeni mezüqhe nu qailo. Hi tsü sapi qhethiketen kesa pen kesü sa thsü nu anyithu na tsü nyan pi kishen-keshi wi sen thsüaden. Isala hi no kekhie zayadha,

²⁰ nu hi kemeten sen nu Jerusalem miwi gho ketenwa tsüna no npi keshü chu sengho nben. Hi no ya cca shü thsüaben.” Anyithu na ketsijüh ha sen nu Kadimi Josiya wi gho neng.