2 KADIMITHU 20 - Kemethajüh (N) (Re-editing) Bible (BSI)

Kadimi Hezekiya na Naa nu Mehainengya

¹ Ha tsüwi Kadimi Hezekiya na naa nu shü keten ti sa wa. Amoz tsa Isa atusenjüh-kechüwa na ma hhainan wa nu ma wi khi, “Apvüwa na no pala tsüdila kiden-kesha pi theng yalo, kepaghenanye no mehaiya nben na no kiza ben. Shü le kesa ghena kidenyalo.”

² Hezekiya na khapeghe sen wa agacüwa ghang nu kekhie sa:

³ “Apvüwa, hi leben tsentsa nu jühkeya wina no kekuli sagho, nu hi keshüthangla no hi ya sa thsü mvu kebenwa tsü sa le kiden.” Isanu ma qai ntsa sa wa.

⁴ Isa na kadimiwa teshia, isala ma kadijjen ccühha tsü npi thenkeghe yala Apvüwa na ma kiza,

⁵ Hezekiya, Apvüwa nyithu miwi kekhang kesenwa wi wha neng nu ma wi hati khilo kesa kiza, “Hi Apvüwa, nbaqhai David Nyizawa, no kiqai hhai zaya nu n-nyontssü keqanca tsü mudha. Hi no sapi mehaiya thsüaben, nu ghanan kecheng jüwi no Kekinyijjen wi waben.

⁶ Hi no ya amapi taghamanga hang nengya thsüaden. Hi Assiriya kadimiwa kwen wi no nu Jerusalem nyunutiwa tsü kekasha yaben. Hi ketanla hi kekinyikü nu hi imaghawa David wi khishi ketheng ghena hi anyunuti hawa khweyaben.”

⁷ Tsaseng wi Isa na kadimiwa tsikinathu wi khhaghabvü pi kesa senghola avünen miwi dacü nu ma ya mehaiya thsülo kiza.

⁸ Kadimi Hezekiya na keü, “Apvüwa na hi sapi mehai cüaben nu ghanan kecheng seng wi hi Kekinyijjen wi waya mehaile kesa chütha yale kesa azensu mangwa ben nu?”

⁹ Isa na khineng, “Apvüwa na khishikechi tsü nie benle kesa chütha yale kesalina ma azensu kesü pi no cüben. No khili akekhwen tsü ya kekilen miwi acükhaku tagha atuwi shu thsü mvu benla acükhaku tagha aseng wi wa thsü mvu ben nu?”

¹⁰ Hezekiya na luneng, “Akekhwen tsüna acükhaku tagha aseng wi waneng thsülo.”

¹¹ Isa na Apvüwa wi kekhie sa, nu Apvüwa na akekhwen ya Kadimi Ahaz na kekilen sa kethen miwi tsü acükhaku tagha aseng wi wha thsüa.

Nyilothu Babylonia wina Kegho

¹² Tsü matsü makesü wi Babylonia Kadimi Baladan tsawa Merodak Baladan na Kadimi Hezekiya na naa benle kesa zaya, tsalina ma lesükezhü nu aju kesü pi ma wi kesunchia.

¹³ Hezekiya na nyilothu ssiya nu ma keben-keyeng rükatssü, suna, cüdemvu, nu hankedemvu, nu ma süpahizi tsanqai kebenthu tsüdi pi mathu ccüca. Ciwi ma keben ketheng-jjen nyelela ma kadiyyi kahe wi lela mangla pi mathu nkeccüca nmila.

¹⁴ Tsaseng wi atusenjüh- kechüwa Isa na Kadimi Hezekiya wi wa ma keü, “Anyi hathu ha khiewa na gho nu mathu na mangwale no kiza nu?” Hezekiya na luneng, “Mathu na diyyi alenkesie wi Babylonia wina ghole.”

¹⁵ Ma keü, “Mathu na no kadijjen wi mangwa mu nu?” Hezekiya na luneng, “Mathu na pala tsüdila mudha. Hi keben ketheng-jjenthu wi mangla pi mathu nkeccüca nmidha le.”

¹⁶ Tsaseng wi Isa na Kadimiwa kiza, “Kekhang ntsawa Apvüwa na khiben,

¹⁷ nbamyithu na pi tsanqai sengho nansü cu ketheng no kadijjen wi keben atsanqaithu tsüdila pvü nu Babylonia wi wa keten matsü kesü na ghoden. Ciwi mangla nmi laben.

¹⁸ Ntsathu pahan ssi wa Babylonia kadimiwa kadijjen wi kedithu sala kekuli sa thsüaben.”

¹⁹ Kadimi Hezekiya na ha majjügi ma kahang tsüwi kecca nu apvü-nkesa na ben kesa chüya, tsalina ma luneng, “No Apvüwa wina ketsijüh pi hi kecüwa ha mehaile.”

Hezekiya na Kadikesa Sakhen

²⁰ Kadimi Hezekiya na kempvüza sa kekuli, ma atssü kethengpen kesü sa nu atssülen chhü nu atssü llesen anyunutiwa wi kegho cükithu tsüdila Judah kadimithu cükikezhü wi zhü theng.

²¹ Hezekiya na shü nu ma tsa Manasseh na ma shiwa sa kadimi saya.