2 KADIMITHU 2 - Kemethajüh (N) (Re-editing) Bible (BSI)

Elijah Ssinu Tangwi Wakea

¹ Apvüwa na ketsuekevü kesü wina Elijah ssinu tangwi kewa tsüwa na gho cua. Elijah nu Elisha manyi na Gilgal wina wa,

² nu alenca wi Elijah na Elisha wi khi, “No hewi ben lalo; Apvüwa na hi Bethel wi walo kesun chiben.” Isala Elisha na luneng, “Hi hangkebenwa Apvüwa nu njühkeya wina hi no teshiya nbenle kesa kishenben.” Tsalina manyi gweghe Bethel wi wa.

³ Ciwi hangketen atusenjüh-kechüthu akhang kesü na Elisha wi wa nu ma keü, “Apvüwa na nansü no wina npvüwa ssi bvüa le keben tsü no chüben ma?” Elisha na luneng, “Anle, hi chüben. Isala tsü cüki nkhila na.”

⁴ Tsaseng wi Elijah na Elisha wi khi, “Khili no hewi ben lalo; Apvüwa na hi Jerikho wi walo kesunchi benle!” Isala Elisha na luneng, “Hi hangkebenwa Apvüwa nu njühkeya wina hi no teshiya nbenle kesa kishen ben.” Tsalina manyi gweghe Jerikho wi wa.

⁵ Ciwi hangketen atusenjüh-kechüthu akhang kesü na Elisha wi wa nu ma keü, “Apvüwa na nansü no wina npvüwa ssi bvüa le keben tsü chüben ma?” Elisha na luneng, “Anle, hi chüben. Isala tsü cüki nkhila na.”

⁶ Tsaseng wi Elijah na Elisha wi khi, “Khili no hewi ben lalo; Apvüwa na hi Jordan Ghaku wi walo kesunchi benle!” Isala Elisha na luneng, “Hi hangkebenwa Apvüwa nu njühkeya wina hi no teshiya nbenle kesa kishen ben.” Tsalina manyi gweghe wa,

⁷ nu atusenjüh-kechüthu meshu deni na manyi niesen Jordan wi wa. Elijah nu Elisha manyi na aghaku katen wi ngan, nu atusenjüh-kechüthu deni tsüna temeja wi ngan.

⁸ Tsaseng wi Elijah na ma gwomejuwa khushi pi mishengya, nu tsüpi atssü kihhechi; atssü na gishü zighe, ma nu Elisha manyi na ayyi keqha wina khhakawa kiya.

⁹ Ciwi Elijah na Elisha wi khi, “Hi npi ssi kebvü wi hi nghena mangwa sachi thsü mvu ben khe hi kiza lo.” Elisha na luneng, “Hi ya no kekhang tsü muya nu nshiwa saya thsülo.”

¹⁰ Elijah na khineng, “Kekhie hawa ha sapi cüle kesa kedhu kesü sadha. Isala no wina hi ssi bvü keten wi keujüla no hi mu lethu, no tsü muya ben; keujüla no hi nmu lethu, no tsü muya nben.”

¹¹ Manyi wa keten wi tsüti keccünengli; zuli anni goruthu na anni gorugari kesü zanpvü manyi jüwi dugho, nu ketsuekevü kesü wina Elijah ssisen tangwi wa.

¹² Elisha na tsü mu nu Elijah wi jisha, “Iba, iba! Israel kekhwe kekhangwa! No bvüdha man!” Nu ma khiela Elijah nmu nenla. Elisha na ma hathakina wina ma thsü mezüqhe pi keni sa.

¹³ Tsaseng wi ma Elijah gwomejuwa ma wina qanca kedughowa tsü khuya nu wa Jordan ghüsa wi ngan ben.

¹⁴ Ma Elijah gwomejuwa tsüpi atssü kihhe nu khi, “Apvüwa, Elijah Nyizawa tsüna khiewa ben nu?” Tsaseng wi ma kheneng atssü tsü kihhe, nu tsüna gishü zighe, nu ma alentsen sen khhakawa kia.

¹⁵ Jerikho wi atusenjüh-kechüthu deni tsüna ma mu nu khi, “Elijah ghamu tsüna Elisha miwi ben le!” Mathu na wa ma metu nu ma tuwi kukedu,

¹⁶ nu khi, “Hewi anyi kezüthu hi deni na ben. Ithu gweghe npvüwa ghang wa na. Apvüwa ghamu na ma ssi wa ayikha nyelela ayyiketijü pahan wi teshithengla nashe.” Elisha na luneng, “Nmale, nthu na nwa lalo.”

¹⁷ Ma deni na wa ghanan kecheng ayikha nu kedhu tsüdi wi Elijah bha, isala mathu na ma mu meya.

¹⁸ Tsaseng wi mathu na Elisha na Jerikho wi mathu hie keben wi tsü gho neng, nu ma mathu wi khi, “Hi nthu na nwa lalo nkiza kwe?”

Elisha na Amankesa kekulithu

¹⁹ Jerikho wi anyi pahan na Elisha wi wa nu khi, “No chüben, ha anyunuti kemehai kesü, isala atssü na nkemehai ghena pala mangla mehai nten.”

²⁰ Ma khi, “Amcü pahan pi akhuzza ketheü kesü wi chi sen gho hi cülo.” Mathu na tsü sen nu ma wi gho,

²¹ nu ma tsü sen nu atssükebvüpen wi wa, amcü tsüpi atssü miwi keshuchi nu khi, “Apvüwa na hati khiben, ‘Hi atssü ha sapi metha thsüa, nu tsüna sapi shü thsü nyelela pala mangla nmehaila sa nbendha.’ ”

²² Nu Elisha na tsüti sa benle kekhi ti tsü nten na atssü na metha.

²³ Elisha na Jerikho teshi nu Bethel wi wa keten alenca wi pvüzanyithu pahan na anyu kesü wina shhugho ma nankeqhe. Mathu na jisha, “Atiekemethawa, hewi na bvülo!”

²⁴ Elisha na mathu ghangkevüli chi nu Apvüwa nyan wina mathu kishencüa. Tsaseng wi aduwengbvü keni agheja wina shhugho pvüzanyithu tsü jügha nu keni ghan pi mezüdhi-mezüghe.

²⁵ Elisha na Karmel Yikha wi wa nu tsaseng wi Samaria wi gho nen.