2 KADIMITHU 19 - Kemethajüh (N) (Re-editing) Bible (BSI)

Kadimiwa na Isa Kesansijüh Kekeü

¹ Kadimi Hezekiya na mathu kekhi tsü zaya meyi ma hathakina wina ma thsümeni mezüqhe, aleshithsü mphi nu Apvüwa Kekinyijjen wi wa.

² Ma kadijjen kenonccawa Eliakim, ajühkekaghatenpen wi kezhüwa Shebna, nu keqhaikedi jawi keqhaithu kesun pi Amoz tsawa Isa wi chi. Mathu la aleshithsü mphi den.

³ Ma ketsijüh hawa ha pi mathu kiza nu pi Isa chü thsü: “Nansü ha ketizenkesa tsathang; ithu meten-mesha nu kejüghe yaben. Ithu na nza kesü na pvüghale keben ti saben, isala tsüti sale kesa kezü nmitha laben.

⁴ Assiriya nyi kadimiwa na ma kekhu wi kedi ntsawa kesun pi Hangkebenwa Nyiza kimenni thsüben. Apvüwa n-Nyiza na kimennijüh zaya nu tsü kekhithu meten kecüwa salo. Tsalina ithu nyi hangkeyathu ghena Anyiza wi kekhie salo.”

⁵ Isa na Kadimi Hezekiya ketsijüh tsü mukeya wi

⁶ ma ajüh ha lunengchi: “Apvüwa na no kiza ben, Assiriya nyithu yala Apvüwa na no hangshaya nbenle khipi no npateqhe thsü lalo.

⁷ Apvüwa na kadimiwa tsü sapi ajühjüwa kesü kiza ghena ma diyyiwa wi kheneng wha thsü, nu ciwi Apvüwa na ma pathiaben.”

Assiriya Nyithu na Kepateqhe Kepa wi Kesunkechi

⁸ Assiriya nyi kediwa na Kadimiwa na Lakhish teshi nu wa Libnah nyunuti kete wi kesali benle kesa chüya; tsalina ma ciwi wa kadimiwa wi kecenkinali.

⁹ Sudan wi kadimi Tirhaka na Ejipt nyi süpahizi ssinu Assiriya nyithu ssikaghashen gho tenle kesa ajüh gho mathu cuya. Kadimiwa na ha zakeya wi ma lesü kesü zhüpi Judah Kadimi Hezekiya wi chi,

¹⁰ nu ma kiza, “No acenpvü nondi ketenwa tsüna no ikwen wi ndugho lalo no kiza dha, isala tsü yala no nmechu thsü lalo.

¹¹ Assiriya nyi kadimiwa na diyyi kesü le kesü miwi lela ma tsü yasa le südheya lethu sa keten tsü no zayadha. No kemeshen no bvüya mehaile ben kwe?

¹² Ibamyithu na anyunuti Gozan, Haran, nu Rezef hathu yasa, nu anyi Betheden yyiwi Telassar wi kahangthu tsü pathi lela mathu cenpvüthu kesüla mathu hangsha meya lale.

¹³ Hamath, Arpad, Sefarvaim, Hena, nu Iva, nyunutithu wi kadimithu na khiewa ben nu?”

¹⁴ Kadimi Hezekiya na nyilothu kwen wi lesükezhü tsü khupi si. Tsaseng wi ma Kekinyijjen wi wa lesükezhü tsüpi Apvüwa tuwi chi,

¹⁵ nu kekhie sa. “O Apvüwa, Israel Nyizawa, no kadipen cherubim miwi donki kebenwa, no ketan Anyiza le, ayyiwi kadiyyi tsüdi miwi kekhang sen ketenwa. No atssan nu ayyi sachi.

¹⁶ Apvüwa, no khili ithu miwi mangwa saben khe ghangchilo. Sennakherib na no Hangkebenwa Anyiza kekimennijüh khi keben tsüdi tsü kina chilo.

¹⁷ O Apvüwa, Assiriya kadimithu na mizzatenti kejon yasa pi nu mathu yyithu pi yisha thsüdha le kesa ithu tsüdila chüben,

¹⁸ nu mathu cenpvüthu mecang, tsüthu tsüna ntsakhiwa acenpvüthu nye, anyi na akwen pi achan nu alon pi atsikezhüthu kesa ketanle.

¹⁹ Apvüwa ithu Nyiza, khili Assiriya nyithu kwen wina ithu kekasha yalo, isanu ayyiwi mizzatenti tsüdila no ketan Anyiza le kesa chüya thsüle kesalina, O Apvüwa.”

Isa na Ketsijüh pi Kadimiwa Kecü

²⁰ Tsaseng wi Isa na ketsijüh kesü pi Kadimi Hezekiya wi kesun chi nu ma kiza la kadimiwa kekhie tsü keluneng tsü

²¹ Apvüwa na khidha, “Sennakherib, Jerusalem nyunutiwa na no nankeqhe nu no pi keponsa saben.

²² No thowa kimenni nu metsi-meni le meshen ben nu? No hi Israel Nyizawa kemetha tsü nkinyikütha sale.

²³ No nyilothu kesun pila no gorugarithu tsüdi ssinu Lebanon Yikha kemisi ntsathu nkayadha le kesa ituwi kapvü thsüa. No ciwi sedar chan kesie ntsathu nu sipress chan kemehai ntsathu shüchi nu no ayinong non ntsa wi duyadha le kesa kapvü.

²⁴ No asang yyiwi atssükhangthu chhü nu atssü jjü nu nsüpahithu ccü na Nil Ghaku cütekeqha le kesa kapvü.

²⁵ “Hi kheni na ha tsüdila kiden thengle kesa no khiela za meya kwe? Nu hi khili tsüthu tsü saben. Hi kekhang pi no cü nu no ya anyunuti khweti vükethengthu tsü yasa pi abhon sa thsüa.

²⁶ Anyi ciwi kahangthu na kekhang nmila; mathu qhethiketen nu ceen ben wa. Mathu na alli kesü wi aghangthu nyelela ajjenmili kesü miwi aghang na shigü keben nishuwa meghü kisa na gho moteshü kesa ti sa thsüa.

²⁷ “Isala hi no mangwa sa nu khiewa wa khe ncüki tsüdila chüben. No khatila hi shun khe hi chüben.

²⁸ Hi no nmehai pi keshun nu kekapvü cüki muyadha nu hi khili adhasü pi nmitsan gheya nu amighe ssüle kesü pi npang wi chiya, nu no ssisen no kaghalen witsü whaden.”

²⁹ Tsaseng wi Isa na Kadimi Hezekiya wi khi, “Hawa ha mangwa khati sa ten khe azensu kesü. Kisü nu vvüthi wi no asu maketanla keshhugho ketan dsaben, isala kechengwa mapi witsü no asu pi sheng nu tsü wwiya, nu kemeshentsse tonthu pi sheng nu ma bithu la dsayaben.

³⁰ Anyi Judah wi hang keyathu na achan ma ghazanthu cha pi ayyi non wi chiya nu mabi bün keya ti mathu na mehai kayi yaben.

³¹ Ciwi anyithu na Jerusalem wi nu Zion Yikha miwi hang yaben, kepaghenanye Apvüwa na tsüti sa thsüle kesa kiden pi thengdha.

³² “Nu Apvüwa na hati Assiriya nyi kadimiwa cüki khitheng: ‘Ma anyunuti hawa wi duya nyelela alakusü kesüla pi tsü gaya nben. Süpahithu na atsonhithu pvü nu anyunutiwa kete wi ghoya nben, nu ghanyale akhweti sapi tsü vüya nben.

³³ Ma anyunuti witsü ndula ma kaghalen wi kheneng whaben. Hi Apvüwa, hi khidha.

³⁴ Hi ketanla hi kinyikü nu imaghawa David wi khishi ketheng ghena hi anyunuti hawa khwe nu hangsha yaben.’ ”

³⁵ Tsü ghaja Apvüwa nyilo kesü na Assiriya nyi kemnanpen wi wa süpahithu 185,000 pathia. Dhitsüwa atsantheghi wi mathu tsüdila ciwi shü benla!

³⁶ Tsaseng wi Assiriya nyi kadimiwa Sennakherib na kheneng sen Nineve wi wha.

³⁷ Ghanan kesü wi ma ma cenpvü Nisrok kekinyijjen wi kinyi keben ma tsa keni, Andrammeleck nu Sharezer manyi na njünnu pi ma süthi nu Ararat yyiwi bvüa. Ma tsa kepa wi kesü Esarhaddon na ma shiwa sa kadimi saya.