2 KADIMITHU 18 - Kemethajüh (N) (Re-editing) Bible (BSI)

Judah Kadimi Hezekiya

¹ Ela tsa Hoshea na Israel kadimi saya nu kadikesa mapi kechengwa wi Ahaz tsa Hezekiya na Judah kadimi saya,

² ma kahang mapi nkwen nu manga wi, nu ma Jerusalem wi amapi ngwe nu tugu kekhang sen. Ma jja na Zekhariya nga Abijah.

³ Ma baqhai Kadimi David tsütsonca tsü nie nu ma Apvüwa kenenwa tsü sa.

⁴ Ma Anyiza nkechüthu kekinyipenthu tsü yasa, alon kishengthu pakhhi, nu acenpvü nzawa Asherah tsikezhü tsü pacha. Ma Mosa na lezza pi amaghang zhüpi Nehushtan le ci kesawa tsü la pacha zighe. Tsü tsü kecu wi Israel nyithu na hankedemvu mecang pi tsü kinyikü den.

⁵ Hezekiya na Apvüwa Israel Nyizawa tsü nondi; Judah wi Hezekiya tuwi le ma seng wi lela ma ti kesa kadimi nmi.

⁶ Ma Apvüwa wi jüh tsentsa sa nu khiela ma jüh nkinala nsa, isala kiden-kesha ntsa sa nu Apvüwa na ayenkhukechi pi Mosa kecüthu tsüdi nie.

⁷ Tsalina Apvüwa na ma ssi, nu ma kekuli tsüdi wi haicenya sa. Ma Assiriya kadimiwa matangla shun nu ma kekhu wi ndu mvula sa.

⁸ Ma Filistinthu chaya nu mathu kahang penthu anyu kizza ntsa na wala anyunuti keti ntsa kecu Gaza nu tsü kevü wi ayyi pi saghula ayelashua.

⁹ Hezekiya na kadikesa mapi mejüwa, tsüna Kadimi Hoshea na Israel wi kadikesa mapi tagüwa wi Assiriya Kadimi Shalmaneser na Israel nkagho nu Samaria vüya.

¹⁰ Vükeya kecheng mapi wi Samaria na qanca; hana Hezekiya na kadikesa mapi tughowa wi nu Hoshea na kadikesa mapi tuguwa wi sa.

¹¹ Assiriya nyi kadimiwa na Israel nyithu ghan pi atssüzü sa sen nu Assiriya wi wa mathu pahan pi anyunuti Hala, pahan pi Gozan elakha wi Habor ghaku kete, nu pahan pi Media nyunutithu wi ben wa thsüa.

¹² Israel nyithu na Apvüwa mathu Nyiza jüh nkinala kesalina Samaria na qanca, isanu ma mathu ssinu cenkethenjüh tsü pakhhi nu Apvüwa maghawa Mosa wina ayenkhuchi kethengthu tsüdila n-nie mvula. Mathu na tsü nkina mvu nu tsü la n-nie mvula.

Assiriya Nyithu na Jerusalem Kepateqhe

¹³ Kadimi Hezekiya na kadikesa mapi taghamejüwa wi Assiriya Kadimi Sennakherib na Judah nyunutithu khweti vükethengthu tsü ssisa nu tsüthu miwi khangya.

¹⁴ Hezekiya na ketsijüh kesü kesun pi Sennakherib na Lakhish wi keben ciwi chi: “Hi sazzidhale; no nchala hi ssi nkaghashenla yilo, hi no mangwa khie khe pi no cüaben na.” Kadimiwa na luneng kechi na Hezekiya na rükatssü kilogram hazar tagha nu suna kilogram hazar kesü kesun pi ma wi chilo khi.

¹⁵ Hezekiya na Kekinyijjen wi nu kadijjen kebenkechipen wi rükatssü tsüdi khupi ma wi kesun chia;

¹⁶ ma Kekinyijjen jenkathu wi suna nu ma suna pi ajenka donbvüthu meju kethengthu tsü la khushaya nu tsüdi kesun pi Sennakherib wi kesun chicüa.

¹⁷ Assiriya nyi kadimiwa na Lakhish wina ma süpahizi keti kesun chipi Jerusalem wi Hezekiya ssikaghashen thsü; tsüna ma benchüthu kedi ntsa kecheng na ssigho. Mathu na gho Jerusalem cukeya wi mathu na wa acüceng meiwa na atssü hhisen gho keben wi athsü ghasü ketenthu lenwa tsü khenya.

¹⁸ Tsaseng wi mathu na wa Kadimi Hezekiya ci sen gholo kesun chi, nu ma kedithu meshu kecheng na shula mathu metu: kadijjen kenonccawa Hilkiya tsa Eliakim; ajühkekaghatenpen wi kezhüwa Shebna; nu kezhüthu kenonccawa Asaf tsa Joa.

¹⁹ Assiriya nyi kedithu kesü na mathu kiza la Kadimiwa na mangwa na Kadimi Hezekiya sapi kempvüza sa thsüben khe chüya mvu benle.

²⁰ Ma khi, “No kemeshen tsü ajühthu tsüna süpahithu sapichü nu kekhang mithon saya mehai le ben kwe? Thowa na no kiqa pi Assiriya matang shunya mehai le ben nu?

²¹ No Ejipt na no kiqa kecü ghangben, isala tsüna ahuphon pi akhhatssü kesü sasen keten ti tsü pashi pi nkwen kecun yaben. Kesü le kesü lela Ejipt Kadimiwa nondi ketenwa na tsüti sa ben.”

²² Assiriya nyi kediwa tsüna khi, “Nyelela no Apvüwa n-Nyiza nondi tenle hi kiza ten kwe? Hezekiya na Judah nu Jerusalem nyithu wi Jerusalem wi kekinyipen wi ketan kinyilo kekiza wi ma Apvüwa kekinyipenthu tsü yasa le.

²³ Hi kadimiwa nyan wina no ssinu shüsheng nanden, keujüla no goru kessithu anyi kejon muya ben lethu hi goruthu hazar keni pi no cü na!

²⁴ No Assiriya nyi kedi jawi kizza ntsawa lela nsa qole, isala no Ejipt nyithu na gorugarithu nu goru kessithu kesun pi no kecü ghang benle!

²⁵ No hi Apvüwa kekiqa nsenla no diyyiwa ssikaghashen nu tsü yasa le meshenben kwe? Apvüwa na hi wala tsü ssikaghashen nu yasa lo kiza.”

²⁶ Tsaseng wi Eliakim, Shebna, nu Joa na kediwa kiza, “Kediwa, Aramaik jüh wina ikhang ccüneng lo. Ikhang na tsü chüben. Ibri jüh nkhila; anyi tsüdila akhweti miwi ben nu kinaben.”

²⁷ Ma khineng, “Nthu hi kadimiwa na hi kesun pi nthu nu nthu kadimiwa wi ketan hathu ha tsüdi khi thsüle meshenben kwe? Nyele, hi anyi akhweti miwi kebenthu la ccüneng ben; mathu la nthu ti mathu keku dsa nu mathu kejon jjüden.”

²⁸ Tsaseng wi kediwa na shagha nu Ibri jüh wina jisha, “Assiriya Kadimiwa na mangwale nthu kiza ben khe kinachilo!

²⁹ Hezekiya yala nthu nmechu thsü lalo ma nthu kitsan chiben. Hezekiya na nthu hangshaya nben.

³⁰ Ma ya nthu jupi Apvüwa nondi thsü nsa lalo. Apvüwa na nthu hangshaya nu ma ithu Assiriya nyi süpahizi na nthu nyunutiwa nkakeya tsü khenya benle nmeshen lalo.

³¹ Hezekiya jüh nkina lalo. Assiriya kadimiwa na nthu na nthu nyunutiwa wina shhugho ma kwen wi dugholo khiben. Nthu tsüdi yala nthu kemeshentsse tonthu nu nthu khhaghabvü tonthu wi mabi dsaya nu nthu tssükhang wi atssü jjüya thsüben,

³² tsüna kadimiwa na nthu pi nthu ji ti kesa kisengtssü saya kemehai kemeshentsse llithu nu amesa saya kemehai asu keben diyyi kesü wi npi keben thsü chu; hawa ha oliv, oliv deli, nu anikholi keben yyi kesü. Keujüla nthu na ma mangwa khi khe tsü sa lethu, nthu na nshüla hangyaben. Hezekiya yala nthu mechu pi Apvüwa na nthu kekashaya benle nmeshen thsü lalo.

³³ Mizzatenti kepathu cenpvüthu kesüla Assiriya kadimiwa tuwi mathu diyyithu hangshaya kwe?

³⁴ Hamath nu Arpad cenpvüthu na khili khiewa ben nu? Sefarvaim, Hena, nu Iva cenpvüthu na khiewa ben nu? Mathu kesüla Samaria hangshaya kwe?

³⁵ Diyyi hathu tsüdi cenpvüthu kesüla ithu kadimiwa tuwi mathu diyyiwa hangshaya kwe? Isalethu, mangwa na nthu sapi Apvüwa na Jerusalem hangshaya mehaile meshenben nu?”

³⁶ Kadimiwa Hezekiya na anyithu kekiza ti mathu na ceen ben wa, nu mathu ajüh kesüla nkhi.

³⁷ Tsaseng wi Eliakim, Shebna, nu Joa, mathu hathakina wina mathu thsümeni mezüqhe, nu mathu na wa Assiriya nyi kediwa na mangwale khi khe pi Kadimiwa kiza.