2 KADIMITHU 17 - Kemethajüh (N) (Re-editing) Bible (BSI)

Israel Kadimi Hoshea

¹ Judah Kadimi Ahaz na kadikesa mapi taghakeniwa wi Ela tsa Hoshea na Israel kadimi saya, nu ma Samaria wi amapi tugu kekhang sen.

² Ma sami pi Apvüwa shun, isala ma ma tuwi kekhang kesen Israel kadimithu ju kesami nsa.

³ Assiriya Kadimiwa Shalmaneser na ma ssinu aghisa; Hoshea na Shalmaneser kwen wi du nu amapi kaghapenla keküju pi ma cü.

⁴ Isala amapi kesü Hoshea na nyilothu kesun pi Ejipt Kadimiwa Soi wi chi nu ma wi kekiqa khie, nu amapi kaghapen keküju pi Assiriya cü keten tsüpi ncüla. Khathansha wi Shalmaneser na tsü chüya khe ma Hoshea ghan pi atssüzüjjen wi chia.

Samaria Keqanca

⁵ Tsaseng wi Shalmaneser na Israel nkaya nu Samaria vüya. Vükeya kecheng mapi

⁶ tsüna Hoshea na kadikesa tugu mapi wi Assiriya nyi kadimiwa na Samaria nkaya, Israel nyithu ghan pi atssüzü sala Assiriya wi wa, nu mathu pahan pi Hala nyunutiwa, pahan pi Gozan elakha wi Habor ghaku kete, nu pahan pi Media nyunutithu wi hang wa thsüa.

⁷ Israel nyithu na sami pi Ejipt Kadimiwa kwen wina mathu kekashaya nu Ejipt wina mathu ssi keshhughowa Apvüwa mathu Nyiza shun kesalina Samaria na qanca. Mathu na acenpvü kepathu kinyi,

⁸ Israel nyithu na atujügü kewa wi Apvüwa na ciwi anyithu jügüshi kesathu kahang yenthu tsü nie wa, nu Israel kadimithu na sakechi yenthu tsü yaya.

⁹ Israel nyithu na Apvüwa mathu Nyiza na nkenanmvuthu tsü sa. Mathu na anyu kizza ntsawa wina wa anyunuti keti ntsawa kecu tsüdi wi Anyiza nkechü kekinyipenthu sa.

¹⁰ Yyishiphon thu nu achantonthu cakhu tsüdi wi mathu na acenpvü nzawa Asherah tsikezhü nu alonthu pi sheng,

¹¹ nu Apvüwa na ayyi ciwi kahang nyithu jügüshi kesathu kahang yenthu kenie wina mathu na Anyiza nkechü kekinyipenthu tsüdi miwi hankedemvu pi mecang. Mathu na gheshighena kekuli tsüdi sapi Apvüwa lebenketsu cüssi,

¹² nu Apvüwa na atsikezhüthu nkinyi lalo kesa ayenkhukechi tsü meya mvu.

¹³ Apvüwa na ma nyilothu nu atusenjüh-kechüthu kesun pi Israel nu Judah kitsan thsü: “Nthu na nkemehai lenthu tsü teshi nu iyenkhukechithu tsü nie yalo, tsüna hi Ayenwa pi nthu bamyithu kecü nu hi imaghathu nu atusenjüh-kechüthu wina pi nthu kecü witsü ben le.”

¹⁴ Isala mathu na tsü n-nie mvu; mathu na mathu bamyithu ti leben-dhu nu Apvüwa mathu Nyiza tsü n-nondi.

¹⁵ Mathu na ma kecükegwethu tsü n-nie mvu; mathu bamyithu na ma ssinu cenkethenjüh tsü n-nie mvu, nu ma kekitsanthu tsü nkinala. Mathu na ma men nkemi atsikezhüthu tsü kinyi nu mathu na ma men nkemi nyithu sa wa, nu mathu kevü mizzatentithu kahang yenthu tsü nie wa, tsüthu ti nsalalo kesa Apvüwa yenkhukechi tsü n-nie mvula.

¹⁶ Mathu na Apvüwa mathu Nyiza yenthu tsüdila pakhhia nu amighe pi amesü zza asüpon keni zhü nu kinyi; mathu na acenpvü nzawa Asherah tsikezhü kesü la zhü, ghotsithu kinyi, nu Baal cenpvü kekuli sa.

¹⁷ Mathu tsangathu pi ahhansha sala mecang pi Anyiza nkechü cenpvüthu kinyi; mathu na keshü ghamu keccünengthu nu tusencüki kekhinyi wi wa kecenkinali, nu mathu ketanla mathu pi Apvüwa tuwi kesazziwa tsü satha wa nu tsü ghena Apvüwa lebenketsu tsü cüssia.

¹⁸ Tsalina Apvüwa na Israel nyithu miwi aghepvü nu Judah kadiyyi ketan khe ma tuwi na mathu tsüdi khupia.

¹⁹ Isala Judah nyithu lela Apvüwa mathu Nyiza yenthu tsü n-nie mvula; mathu na Israel nyithu na yayakesa kahang yenthu tsü sen wa.

²⁰ Apvüwa na Israel nyithu tsüdi meya mvula, mathu pi mathu ghinyithu kwen wi chia nu ma tuwi na mathu khupi nkesa chu mathu meten cü.

²¹ Apvüwa na Judah wina Israel khuthipi kesa seng wi Israel nyithu na Nebat tsa Jeroboam pi mathu kadimiwa sa thsüa. Jeroboam na mathu sapi Apvüwa teshitha sa thsüa nu mathu ssi wa qhethiketen kesami sa wa thsüa.

²² Mathu na Jeroboam nie wa nu ma kesamithu sa keten tsüdi sakila ben wa.

²³ Apvüwa na ma maghathu nu atusenjüh-kechüthu wina ma tsüti sa benle kitsanchi ketheng ti asakhenwa Apvüwa na ma tuwi na mathu npi kekhu chu tsüthu sa. Tsalina Israel nyithu ghan sen wa kushiyyi Assiriya wi chia, nu mathu khilila ciwi hangben.

Assiriya Nyithu na Israel wi Pen wakea

²⁴ Assiriya kadimiwa na anyunuti hathu — Babilon, Kuth, Iva, Hamath, nu Sefarvaim, wi anyithu ssiya nu mathu pi Israel nyi kushinyithu mithon wina Samaria nyunutithu wi ben wa thsüa. Mathu na anyunuti hathu wi keben khuya nu ciwi hang wa.

²⁵ Mathu na atuwa ciwi keben wi Apvüwa nkinyi, tsalina ma ssensitemi kesun pi mathu pahan ghan thsüa.

²⁶ Nyu na Assiriya kadimiwa wi ma anyi pi Samaria nyunutithu wi ben thsü kethengthu na ayyi ciwi cenpvü yenwa tsü nkechü ghena acenpvü na ssensitemi kesunchi pi mathu pahan ghan thsüdha le kiza.

²⁷ Tsalina kadimiwa na khi, “Ithu na atssüzüthu ghan sen kegho jawi keqhaikedi kesü kesun neng chilo; ayyi tsüwa wi cenpvü yenwa tsüpi anyithu sansi thsüle kesalina ma ciwi kheneng whala hang wa thsülo.”

²⁸ Tsalina Israel nyi keqhaikedi kesü Samaria wina kesunshi kesawa na whala Bethel wi hang nu ma khatinu Apvüwa kinyiten khe pi anyithu sansi cüa.

²⁹ Isala anyi Samaria wi ben wa kesathu na mathu ghena atsikezhüthu saya nu tsüthu pi Israel nyithu na kesa kekinyipenthu witsü chia. Akhang kepapa tsüdila mathu na hangkeben nyunutithu wi atsikezhüthu tsü saya:

³⁰ Babilon nyithu na acenpvü Sukkoth Benoth tsikezhüthu saya; Kuth nyithu na Nergal tsikezhüthu; Hamath nyithu na Ashima tsikezhüthu;

³¹ Iva nyithu na Nibhaz nu Tartak tsikezhüthu; nu Sefarvaim nyithu na mathu tsangathu pi ahhansha sala mecang pi mathu cenpvüthu Adrammmelek nu Anammelek cüa.

³² Anyi hathu na Apvüwa la kinyi nu mathu jawi anyi ghameme lela kessi pi keqhaikedithu sa nu Anyiza nkechü kekinyipenthu wi kuli nu ciwi mathu ghena ahhanshathu sa thsü.

³³ Tsalina mathu na Apvüwa kinyi, isala mathu diyyithu wina kegho kahang yenthu kenie wina mathu cenpvüthu la kinyi.

³⁴ Mathu na khilila mathu kheni kahang yenthu tsü saden. Mathu na Apvüwa nkinyi nyelela ma ayenthu nu ayenkhukechithu pi Jakob ma nyan pi Israel keciwa shicübvüghathu kecü tsü nkina mvu.

³⁵ Apvüwa na mathu ssinu cenkethenjüh kesü sa nu mathu wi kiza theng: “Acenpvü kepathu nkinyila; mathu tuwi nkukedula; mathu kekuli nsala nyelela ahhanshathu sapi mathu ncüla.

³⁶ Hi kekhang nu kezü wina Ejipt wi nthu ssi keshhughowa, Apvüwa, nthu na ijühkinalo; nthu na ituwi kukedu nu ahhanshathu sapi hi cüben.

³⁷ Nthu na keshüthangla hi nthu ghena zhükechi ayenthu nu ayenkhukechithu tsü nie ben. Nthu na acenpvü kepathu jüh nkinala,

³⁸ nu nthu na hi nthu ssinu cenkethenjüh sa kethengwa tsü nmalila.

³⁹ Hi Apvüwa nthu Nyiza, nthu na ijüh kina ben, nu hi nthu ghinyithu kwen wina nthu kekasha cüben.”

⁴⁰ Isala anyi tsüthu na tsü nkina, nu mathu kahang yen kaghawenthu tsü nieki sa.

⁴¹ Tsalina anyi tsüthu na Apvüwa kinyi, isala mathu na mathu cenpvüthu tsü la kinyi, nu nansü kecula mathu shicübvüghathu na tsü makesü saden.